7
1 Salomón ùt'aa t'â aupak'ãri, ùt'ariipa t'ùpùtau baai cheji ne–animalaarã peedap'edaa ârù mãik'aapa paa jõji. Ma awara Tachi Ak'õre k'îra wãreepa iru te ipurudachi. 2 Mãga beek'ãri, p'aareerã ma tede p'oyaa t'îuda–e paji. 3 Israelitaarãpa unudak'ãri ma t'ùpùtau mãik'aapa Tachi Ak'õre k'îra wãree baai cheruta ma te ârù, bedabaidachida tau bùùrù eujãde t'õbairutamaa mãik'aapa ùt'aa t'âjida Tachi Ak'õremaa nãgà pedee pia jara p'anù misa: “Tachi Ak'õre t'ãri pia bapari. Irua ichita eperãarã chupùria k'awaa baparida” ajida.4 Mãpai reypa mãik'aapa jõmaweda p'uuru pidaarãpa ne–animalaarã peejida Tachi Ak'õre–it'ee paapidait'ee. 5 Rey Salomonpa veintidós mil p'ak'aarã mãik'aapa ciento veinte mil ovejaarã peepiji. Mãgá reypa awaraa israelitaarã ome ma te Tachi Ak'õre–it'ee awara bùjida.
6 P'aareerã ak'ùnâ p'anajida ãchi ichita ak'ùnâ p'anadap'edaamãi. Levideepa uchiadap'edaarãpa chaa p'anajida ne–inaa chaapata, Davidpa oopida Tachi Ak'õre–it'ee chaapataadamerã ichia nãgà pedee ãramaa k'aripik'ãri: “Ichita eperãarã chupùria k'awaa bapariit'ee.” Ma Levideepa uchiadap'edaarã k'îrapite p'aareerãpa trompeta chaajida jõmaweda israelitaarã bainâ p'anù misa.
7 Ma ewate rey Salomonpa ichiaba Tachi Ak'õre te t'îupata k'îrapite eerepema patio awara bùji, mama ne–animalaarã ûk'uru iru–it'ee paa jõpidamerã mãik'aapa mama ne–animalaarã traa paadamerã chi chiara jedek'odai naaweda ãchi auk'aarã ome. Irua mãgá ma patio awara bùji taawapema altar broncedee ooda audú ma–ãri bada perã ne–animalaarã aùde paa jõdamerã, ne–animalaarã traa paadamerã mãik'aapa net'a tau Tachi Ak'õre–it'ee aneedap'edaa paadamerã.
8 Ma fiesta oo p'anùde israelitaarã chok'ara p'anajida Salomón ome. Tomia aba ma fiesta oojida Tachi Ak'õre–it'ee. Chejida ãchi eujã norte eerepema Lebó Jamatdeepa sur eerepema eujã parumaa, Egipto eujã ide bù. 9 K'ãima siete ma fiesta oojida ma taawapema altar awara bùdait'ee. Mãpai ewari ochode chip'ejida ùt'aa t'âdait'ee âipata ewaride oopatap'edaak'a. Maap'eda awaraa k'ãima siete fiesta oojida. 10 Atane sietede ewari veintitrede Salomonpa israelitaarã pëiji ãchi te chaa. O–îa erreu wãjida Tachi Ak'õrepa mãgá pia ooda perã Davidmaa, Salomonmaa mãik'aapa israelitaarã p'uuru pidaarãmaa.
Tachi Ak'õrepa pacto ooda Salomón ome
(1 Reyes 9.1-9)
11 Salomonpa ichia k'îsia badak'a Tachi Ak'õre te, ichi palacio ome oo aupap'eda, 12 ewari aba p'ãrik'ua Tachi Ak'õrepa ichi unupiji irumaa mãik'aapa mãgaji:
“Mùa pù ùt'aa t'âda ûriji mãik'aapa na te jùrùt'eraji nama ne–animalaarã peedap'eda, mù–it'ee paadamerã. 13 Maperã mù p'uuru pidaarãpa mùde ijãa amaadaruta pùrã mãik'aapa ma k'aurepa mùa ãra eujãde k'oi chepi–e pùrã maa–e pùrã sisi pëiru pùrã ãrapa ne–uudap'edaa k'odamerã maa–e pùrã ãra t'ãide k'ayaa k'achia pëiru pùrã, 14 maap'eda mù p'uuru pidaarã, mùde ijãapata apataarãpa mùmaa chupùria iidiruta pùrã mãik'aapa ãrapa ne–inaa k'achia oo amaaruta pùrã, mãgara ùt'ariipa mùa ûriit'ee mãik'aapa ãrapa p'ek'au k'achia oopata ãyaa bùit'ee, ma awara ma k'achia ãra eujãde bada wêpapiit'ee. 15 Mùa na te pia ak'ù bapariit'ee mãik'aapa parãpa nama ùt'aa t'âpata ûripariit'ee. 16 Ârá mùa na te jùrùt'era bù mãik'aapa mù–it'ee awara bù aùde ichita bapariit'ee. Namãik'aapa waa mùa parã ak'ùpariit'ee mãik'aapa parã k'inia iru bapariit'ee.
17 Ârá Salomón, t'ãripa pùa mùde ijãaru pùrã pù ak'õre Davidpa ijãadak'a mãik'aapa mùa jara bùk'a ooru pùrã, ma awara mù leyde jara bùk'a ooru pùrã, 18 pù mãik'aapa pùdeepa uchiadait'eerã ichita rey padait'ee. Mùa mãga jaraji pù ak'õre Davidmaa mãik'aapa ârá mãga jara bù pùmaa. Israel eujãde pùdeepa uchiadait'eerã ichita rey padait'ee.
19 Mamîda pùa maa–e pùrã pùdeepa uchiadait'eerãpa mùde ijãa amaadaruta pùrã mãik'aapa oo amaadaruta pùrã mùa jara bùk'a wa mù leyde jara bùk'a awaraa ak'õre waibùa apataarãmaa ùt'aa t'âdait'ee, 20 mùa israelitaarã t'ùmà pëiit'ee mùa mù eujã parãmaa teedadeepa mãik'aapa na te mù–it'ee awara bùda atabaibëiit'ee. Mãpai jõmaweda awaraa eujãdepemaarãpa israelitaarã oo iru p'anadait'ee. 21 Ârá na te pi–ia unupata pùjida, ewari cherude eperãarã nama wãyaadak'ãri, ak'ùtrua para beeit'ee mãik'aapa iidi para beeit'ee: “¿Sãap'eda Tachi Waibùapa na eujã mãik'aapa na te paara nãgá k'achia oojima?” adait'ee. 22 Mãga iididak'ãri, awaraarãpa p'anaudait'ee: “Tachi Ak'õrepa mãga ooji irude ijãa amaa p'aneedap'edaa perã mãik'aapa awaraa ak'õre waibùa apata jùrùdap'edaa perã aù k'îrapite ùt'aa t'âdait'ee, irua ãra chonaarã Egipto eujãdeepa uchiapiji mîda. Maperã Tachi Ak'õrepa nãgá ãra k'achia oojida” adait'ee.