6
1 Mãpai Salomonpa ùt'aa t'âji:
“Tachi Waibùa, pùa jaraji pù jâarara p'ãriu t'ãmaa bùde bapari. 2 Mùa te pi–ia ooji pù–it'ee, aùde pù ichita bapariimerã.”
3 Ma t'êepai jõmaarã israelitaarã bainâ p'anadap'edaa taide rey Salomón ak'ùnâ banaji ãramaa pedee pia jarait'ee. 4 Mãgaji:
“Tachi Waibùa jõmaarã k'ãyaara t'ãri piara bapari. Israelitaarã Ak'õre Waibùak'a wê–e iru juapa ooda perã ichia jaradak'a mù ak'õre Davidmaa nãga jarak'ãri: 5 ‘Mù p'uuru pidaarã Egipto eujãdeepa uchiapidak'ãriipa ârá mùa Israeldeepa uchiadap'edaarã p'uuru apida jùrùt'era–e paji mama mù–it'ee te oodamerã mù aùde bapariimerã. Ma awara eperã apida jùrùt'era–e paji mù p'uuru israelitaarã ak'ù bapariimerã. 6 Jîp'a Jerusalén p'uuru jùrùt'eraji mama bapariit'ee mãik'aapa David jùrùt'erajida aji, mù p'uuru ak'ùpariimerã.’
7 ”Mù ak'õre Davidpa Tachi Waibùa, israelitaarã Ak'õre Waibùa–it'ee te audú oo k'inia baji. 8 Mamîda Tachi Ak'õrepa irumaa jaraji: ‘Pù ome mù o–îa bù pùa mù–it'ee te audú oo k'inia bairã. 9 Mamîda pùa ma te oo–e pait'ee. Pùa warra oorúpata mù–it'ee te ooit'eeda’ aji.
10 ”Ârá Tachi Ak'õrepa mù ak'õremaa jaradak'a uchiaji. Mù ak'õre k'ap'ùa pari mù parã israelitaarã rey beeji mãik'aapa mùa ma te oopiji Tachi Waibùa, israelitaarã Ak'õre Waibùa–it'ee. 11 Ma tede mùa Tachi Ak'õre baaltek'a bù bùpiji. Ma baaltek'a bù edajãde ley p'ãda k'aurepa k'irãpadait'eeda aji, Tachi Ak'õrepa pacto ooda tachi israelitaarã ome.”
Salomonpa Tachi Ak'õremaa ùt'aa t'âda
(1 Reyes 8.22-50)
12 Mãpai ma israelitaarã jõmaarã taide, Tachi Ak'õre altar k'îrapite Salomonpa ichi jua ùt'aa ùap'eda, ùt'aa t'âji. 13 Aù naaweda Salomonpa tarimbak'a kuadria bù broncedee oopiji bùdamerã Tachi Ak'õre te ãuk'idaa bada patio esajîak'a. Chi teesoo dos metro veinticinco centímetro paji; chi jet'ee jida auk'a; jõdee chi ùt'ùa treinta y cinco centímetro paji. Ma tarimbak'a bùde Salomón bedabaip'eda, ichi jua ùt'aa ùaji 14 mãik'aapa nãga ùt'aa t'âji:
“Tachi Waibùa, israelitaarã Ak'õre Waibùa, pùk'a awaraa Ak'õre Waibùa wê–e ùt'ari, na eujãde paara. Pùa oopari pùa pactode jara bùk'a mãik'aapa pùa k'inia iru bapari pù–it'ee mimiapataarã, chi pù k'îrapite t'ãripa pia nipapataarã. 15 Pùa ooji pùa jaradak'a pù mimiapari, mù ak'õre Davidmaa. Pù juapa pùa na te oopiji idi unu p'anùk'a.
16 ’Ârá Tachi Waibùa, israelitaarã Ak'õre Waibùa, mùa iidi bù pùa ichiaba oomerã pùa jaradak'a pù mimiapari, mù ak'õre Davidmaa, nãga jarak'ãri: “Pùa ooparik'a mù leyde jara bùk'a, pù warrarãpa mù leyde jara bùk'a ooruta pùrã, ichita pùdeepa uchiada israelitaarã rey pait'eeda” aji. 17 ’¡Ârá Tachi Waibùa, israelitaarã Ak'õre Waibùa, óoji pùa jaradak'a pù mimiapari, Davidmaa!
18 ’Mamîda ¿wãara pù, mù Ak'õre Waibùa, eperãarã ome na p'ek'au eujãde bapariik'ã? ¡Ùt'ari araa–e pùrã pù aùde bapariimerã, audupùara na te mùa oopidade araa–e pai! 19 Mamîda, Tachi Waibùa, mù Ak'õre Waibùa, chupùria k'awáaji mãik'aapa ûríji mù, pù mimiaparipa iidi bù nama pù k'îrapite. 20 Ichita na te pia ak'ù baparíiji, ãstaawa, p'ãrik'ua pida. Pùa jaradak'a nama baparíiji mãik'aapa ûríji mù, pù mimiaparipa iidi bù. 21 Ûríji mùa nama ùt'aa iidi bù mãik'aapa israelitaarãpa chupùria iidi p'anù nama ùt'aa t'âdak'ãri. ¡Ùt'ariipa, pù baparimãiipa ûríji mãik'aapa taipa p'ek'au k'achia oopata pùmaa jaradak'ãri, ãyaa bàji!
22 ”Eperãpa chîaramaa ne–inaa k'achia oop'eda, aneedak'ãri nama pù altar k'îrapite juraamerã, 23 ùt'ariipa ûríji mãik'aapa mãgà eperãpa ooda ak'àji k'awapiit'ee pia wa k'achia. Mãgá pù mimiapataarã, israelitaarãpa oopata ak'àji mãik'aapa k'awapíji chisãgà ne–inaa k'achia oopataarã, ãchi miapidamerã. Ichiaba k'awapíji chi ne–inaa k'achia ooda–eerã, ãchi ichiak'au bùdamerã.
24 ”Ma awara ewari cherude israelitaarã k'îra unuamaa iru p'anapataarãpa ãra p'oyaaruta pùrã pù ãpùte p'ek'au k'achia oodap'edaa perã, mãik'aapa ãchi eujãdee ateeruta pùrã, ma t'êepai ãra waya pùde ijãa p'aneeruta pùrã, ãra ûk'uru namaa, na tede pù k'îrapite chedai pùmaa ùt'aa iididait'ee. 25 Mãga p'asaru pùrã, ùt'ariipa ûríji mãik'aapa ãrapa p'ek'au k'achia oopatap'edaa ãyaa bàji. Maap'eda ãra jõmaarã waya anéeji na eujãdee, pùa eujã teeda ãra chonaarãmaa mãik'aapa ãramaa.
26 ’Ichiaba pùa k'oi chepi–e pùrã israelitaarãpa pùde ijãa amaa p'aneedap'edaa perã mãik'aapa ma t'êepai ãrapa namaa cheruta pùrã pùmaa ùt'aa iidide ãchia p'ek'au k'achia oopata oodaamaa k'inia p'anadairã, 27 ùt'ariipa ûríji mãik'aapa ãrapa p'ek'au k'achia oopatap'edaa ãyaa bàji ãra pù mimiapataarã mãik'aapa pù p'uurudepemaarã, Israel pidaarã perã. Pù o pia ãramaa ak'ùpíji aùde nipapataadamerã mãik'aapa k'oi waya chepíji na eujã, pù eujãdee, pùa teeda pù p'uuru pidaarãmaa ãrapa ichita jâadamerã.
28 ’Ichiaba jarrajara paru pùrã maa–e pùrã k'ayaa k'achia bariru pùrã maa–e pùrã ak'õrejîru wãsiapa ne–uu uratùdaru pùrã maa–e pùrã ne–uude ne–animal chak'eerã sisik'a audú îwaruta pùrã maa–e pùrã pù eperãarã k'îra unuamaa iru p'anapataarã ãra p'uuru wap'ùra ata cheruta pùrã maa–e pùrã awaraa k'ayaa wa ne–inaa k'achia p'asaru pùrã, 29 maap'eda israelitaarã chaachaa t'ãri p'uapa ãra jua na temaa ùaruta pùrã pùmaa chupùria iididait'ee ãrapa p'ek'au k'achia oopatap'edaa k'aurepa, 30 pù baparimãiipa ùt'ari ûríji mãik'aapa ãrapa ne–inaa k'achia oopatap'edaa ãyaa bàji. Chupùria k'awáaji chi wãara k'achia oodaamaa p'anùùrã, pùata k'awapari perã eperãpa t'ãride k'îsiapari. 31 Pùa pùchi eperãarã mãgá chupùria k'awaaru pùrã, ãrapa pù waaweedait'ee mãik'aapa pù ode nipapataadait'ee na eujãde p'anù misa; pùa eujã teedade tai chonaarãmaa.
32 ”Awaraa eujãdepemaarã, pù p'uuru, Israel pidaarãdepema p'anù–e mîda, t'ùmùùpa cheruta pùrã ùt'aa t'âdait'ee nama pù te bùmãi ûripata perã pù jõmaarã k'ãyaara waibùara bù mãik'aapa jõmaarãpa pù t'o iru p'anù, 33 pù baparimãiipa ùt'ari ãrapa ùt'aa iidi p'anù ûríji mãik'aapa ãchi k'aripáji. Mãgá na p'ek'au eujãdepema p'uuru pidaarã jõmaarãpa pù t'â k'awaadait'ee mãik'aapa pù waaweedait'ee, pù eperãarãpa pù waaweepatak'a. Ma awara k'awadait'ee na tede, mùa pù–it'ee te oopidade pùmaa ùt'aa t'âpataadaipia bù.
34 ’Pù p'uuru pidaarã chõonadak'ãri ãchi k'îra unuamaa iru p'anapataarã ome, ãchi chõo p'anùmãiipa ùt'aa iidiruta pùrã ak'ù p'anùde pùa jùrùt'erada p'uurumaa mãik'aapa pù te mùa oopidamaa, 35 ùt'ariipa ûríji ãrapa chupùria iidi p'anù mãik'aapa ãra k'aripáji.
36 ”Israelitaarãpa p'ek'au k'achia oodak'ãri, tai eperãarã jõmaarãpa oopatak'a, pù k'îraupidai. Ma k'aurepa pùa ãchi k'îra unuamaa iru p'anapataarã pëi ãra jita atadamerã mãik'aapa ateedamerã ãchi eujã k'ait'a wa t'ùmà bùdee. 37 Mama, ãra p'oyaadap'edaarã eujãde p'anùde, ãra waya pùde ijãa p'aneeruta pùrã mãik'aapa ãrapa p'ek'au k'achia oodaamaa p'aneeruta pùrã, nãga pùmaa ùt'aa t'âdai: ‘Wãara taipa p'ek'au k'achia oopata. Ne–inaa k'achia oopata. Ma k'aurepa pùa tai miapiipia bù.’ 38 Mãgá awaraarã eujãde p'anù misa, t'ãripa ãrapa pùde waya ijãa k'inia p'anù pùrã mãik'aapa ùt'aa iidiruta pùrã ak'ù p'anù misa na eujã bùmaa, pùa teeda ãchi chonaarãmaa, pùa jùrùt'erada p'uurumaa mãik'aapa na te mùa oopida bùmaa, 39 pù baparimãiipa ùt'ari ûríji ãrapa pùmaa chupùria iidi jõnù mãik'aapa ãra k'aripáji. ¡Pù p'uuru pidaarãpa p'ek'au k'achia oopata ãyaa bàji!
40 ’Ârá, mù Ak'õre Waibùa, mùa iidi bù pùa ichita tai ak'ù bapariimerã mãik'aapa taipa nama ùt'aa t'âpata ûripariimerã.
41 ’Tachi Waibùa, Jõmaarã Ak'õre Waibùa, nama âi chéji pù baaltek'a bùmãi. Tachi Waibùa, Jõmaarã Ak'õre Waibùa, ¡mùa k'inia bù pùa p'aareerã pù–it'ee mimiapataarã k'achia wêe ak'ùpariimerã mãik'aapa pùde ijãapataarã o–îa ùt'aa t'âpataadamerã! 42 Tachi Waibùa, Jõmaarã Ak'õre Waibùa, mù k'irãpaparíiji, pùa mù jùrùt'erada perã pù eperãarã rey pamerã. ¡K'irãpaparíiji pùa pù mimiapari, David k'inia iru bada!”