Jerusalén p'uuru jõpidap'edaa
(Jeremías 39.1-7; 52.3-11)
25
1 Sedequías año nueve rey bùde, atane diez, ewari diezde rey Nabucodonosor ichi soldaorã jõmaweda ome Jerusalén p'uuru pidaarã ome chõo chejida. Ma soldaorã p'ananajida Jerusalén k'îrapite. Ne–inaa pak'urudee, yoorodee oojida aùdeepa ma p'uurudepema muralla ârù p'anapatap'edaarã ome chõodait'ee.2 Mãgá Jerusalén wap'ùra iru p'anajida Sedequías año once rey bùde paru misa.3 Ma añode atane k'îmari, ewari nuevede chik'o jõ baji Jerusalende. Wê–e paji nek'odait'ee.4 Mãga nùde taawapema muralla Jerusalén p'uuru t'ùak'au bada ãrit'aajida. Mãga k'awa atadak'ãri, p'ãrik'ua Judadepema soldaorã erreujida ãchi rey ome. Uchiajida ma muralla omé esajîak'a puerta badadeepa mãik'aapa jirabodojida ne–uude Jordán to ik'aawa eujã jewedaadee wãdait'ee.5 Mamîda Babiloniadepema soldaorãpa mãga k'awa atadak'ãri, t'êe wãjida. Rey Sedequías êp'ejida Jericó p'uuru k'ait'a bada eujã jewedaade. Mãga nùde ichi eere soldaorãpa ichi atabaibëijida mãik'aapa jîchoojida.6 Mãgá ma Babiloniadepema soldaorãpa rey Sedequías jita atajida mãik'aapa ateejida ãchi rey Nabucodonosor k'îrapite; Riblá p'uurude bada Jamat eujãde. Mama p'anùde Nabucodonosorpa jaraji sãga Sedequías miapidaipia bù.7 Sedequías warrarã ichi k'îrapite peepik'ooji. Mãpai jaraji Sedequías tau êet'aadamerã mãik'aapa cadenapa jâdap'eda, ateedamerã Babilonia eujãdee.
Tachi Ak'õre te jõpidap'edaa
(2 Crónicas 36.17-21; Jeremías 39.8-10; 52.12-30)
8 Babiloniadepema rey Nabucodonosor año diecinueve rey bùde, atane joisomaa, ewari sietede rey jâapataarã poro waibùa t'âjarapatap'edaa Nabuzaradán pacheji Jerusalende. 9 Mãgùpa paa jõpiji Tachi Ak'õre te, rey palacio, eperãarã te bee paara. Jõmaweda te waibùa bee paa jõpiji. 10 Mãga nùde Babiloniadepema soldaorãpa muralla Jerusalén p'uuru t'ùak'au bada ãrik'oojida. 11 Maap'eda ma Babiloniadepema rey jâapataarã poro waibùa Nabuzaradanpa Jerusalendepemaarã ateeji Babilonia eujãdee. Ateeji ma p'uurudepemaarã beeda, Babilonia pidaarã eere t'îudap'edaarã ome mãik'aapa ne–inaa oo k'awaa beerã bëidap'edaa ome. 12 Aba atabëijida audú chupùria beerã, mãùrãpa uva uudamerã ma p'uuru ik'aawa bada eujãde.
13 Ma Babiloniadepemaarãpa ãrik'oojida ne–inaa jõmaweda broncedee ooda Tachi Ak'õre tede bada: te bùùrùk'a bada columna; basa; pailak'a bù choma pania t'ùpatap'edaa. Ma bronce jõmaweda ateejida Babilonia eujãdee. 14 Ichiaba ateejida brasero, pala, pinza, k'usarra, awaraa ne–inaa broncedee ooda ome, p'aareerãpa iru p'anadap'edaa ãchi mimia–it'ee. 15 Ma rey jâapataarã poro waibùapa ichiaba jita ateeji ne–inaa jõmaweda nêedee ooda, p'arat'adee ooda; ne–inaa aùde t'ùpùtau paapata pania ùapata taza ome. 16 Bronce ateedap'edaa ma te bùùrùk'a bada columnadepema, pailak'a bùdepema mãik'aapa basadepema p'oyaa chaada–e paji, audú chùk'ùa pada perã. 17 Ma columna chaachaa ocho metro ùt'ùa paji mãik'aapa aù ârù te chak'ek'a bù paraaji, metro omé waa chi ùt'ùa. Mãgà t'ùak'au baji rejilla broncedee oodapa mãik'aapa granadajõ k'îrak'a bù iru baji nonoreek'a. Ma columna omeeweda auk'a baji.
Judadepemaarã ãyaa ateedap'edaa
18 Ma rey jâapataarã poro waibùapa ichiaba ateeji Babiloniadee p'aareerã poro waibùa Seraías, iru ek'ariara bada p'aare Sofonías ome mãik'aapa Tachi Ak'õre tedepema puerta jâapataarã õpee. 19 P'uurude at'ãri p'anadap'edaa Judadepema soldaorã poro waibùa, rey ûraapatap'edaarã joisomaa ome ichiaba jita atapiji. Ichiaba jita atajida soldaorã jùrùpari pada rey–it'ee mãik'aapa awaraa p'uurudepemaarã t'o p'anadap'edaa setenta. 20 Nabuzaradanpa ma jõmaarã ateeji Riblá p'uurudee, Jamat eujãde bù mama Babiloniadepema rey bada perã. 21 Panadak'ãri rey k'îrapite, ichia jaraji ma jõmaarã peek'oodamerã.
Mãgá Judadepemaarã jõpi wãjida ma eujãde.
Judadepemaarã atabëidap'edaa Judá eujãde
(Jeremías 40.7-10; 41.1-3, 16-18)
22 Babiloniadepema rey Nabucodonosorpa Safán ãichak'e mãik'aapa Ajicán warra Gedalías bùji Judá eujã mãik'aapa ma eujãde p'aneedap'edaa eperãarã ak'ùpariimerã. 23 Judadepema soldaorã mirudap'edaarãpa mãga k'awa atadak'ãri, wãjida Mizpa p'uurudee Guedalías ome pedeede. Mãgà soldaorã paji: Netanías warra Ismael; Carea warra Johanán; Netofa p'uurudepema Tanjumet warra Seraías; Macá p'uurudepema eperã warra Jazanías. Ma soldaorã poro waibùarã wãjida Gedaliamaa ãchi soldaorã ome. 24 Mama p'anùde Tachi Ak'õre k'îrapite Gedaliapa jaraji ãchia ma Babiloniadepema poro waibùarã waaweenaadamerã Jaraji Judá eujãde p'aneedamerã mãik'aapa Babiloniadepema rey jua ek'ari mimiapataadamerã. Mãgá pia uchiadait'eeda aji.
25 Mamîda ma t'êepai atane sietede Judadeepa uchiadap'edaarã Elisama ãichak'e mãik'aapa Netanías warra, Ismael pacheji Gedaliamaa soldaorã diez ome. Mama p'anùde Gedalías peejida ichi ome Mizpa p'uurude p'anadap'edaa Judadepemaarã, Babiloniadepemaarã ome. 26 Mãga k'awa atadak'ãri, Judá eujãdepemaarã p'aneedap'edaa jõmaweda p'erajida Babiloniadepemaarã ãchi jõmaweda k'iniipi chedai jîak'aapa. Mapa chupùria beerãdeepa waibùa beerã parumaa jirabodojida Egipto eujãdee ma soldaorã poro waibùarã ome.
Babiloniadepemaarãpa Judadepema rey Joaquín uchiapidap'edaa
(Jeremías 52.31-34)
27 Judadepema rey Joaquín ateedap'edaa treinta y siete año wãyaadap'eda, atane doce, ewari veintisietede Evil Merodac rey paji Babilonia eujãde. Ma reypa Joaquín chupùria k'awaaji mãik'aapa carceldeepa uchiapiji. 28 Joaquín pia ak'ù bapachi. Piara ak'ù bapachi apema reyrã jita atadap'edaa k'ãyaara ateedait'ee Babiloniadee. 29 Mãgá rey Joaquín carceldepema p'aru jâ bada waa jâ–e paji. Ma awara ichi piurumaa nek'oji Babiloniadepema rey mesade. 30 Ichi chok'ai bùde ewari chaa Babiloniadepema reypa irumaa p'arat'a teeji.