Jacobpa ichi jai–idaai naaweda jarada
49
1 Ma t'êepai Jacobpa chi warrarã jõmaweda t'â pëiji Tachi Ak'õrepa jarapi bùk'a ãramaa jarait'ee. Mãgaji:—K'ait'a chedapáde aji, mùa jarait'ee perã ne–inaa t'êepai p'asait'ee. 2 Mù warrarã, k'ait'a chedapáde aji. Ûridapáde aji, parã ak'õre Israel pedee bù misa.
3 ’Pù Rubén, mù warra naapemada aji. T'oji mù k'ap'ùa pia, juataura bak'ãri. Pù awaraarã k'ãyaara waibùara pak'aji. 4 Mamîda ârá chi naapemak'a bee–eda aji. K'ida chaaree p'oyaa t'ùdùk'adak'aak'a, mãga pùk'a pùa k'achia p'oyaa t'ùdùk'a–e paji mù wêra k'ãipari ome k'ãik'ãri.
5 ’Ichiaba pia nipada–eda aji, Simeón mãik'aapa Leví, k'îsia iru p'anadap'edaa perã awaraarãmaa ne–inaa k'achia oodait'ee. 6 Parã chip'epatamãi mù baamaa bù k'îrau p'anadak'ãri, pãchi k'inia eperãarã peedap'edaa perã mãik'aapa p'ak'a bùùrù pariatua k'õrak'oodap'edaa perã. 7 ¡Mãgá k'îraudaipata perã, Tachi Ak'õrepa parã k'achia ooipia bù! Parãpa mãgá k'îrau p'oyaada–e p'anadap'edaa perã, parãdeepa uchiadait'eerã awara–awaraa p'anadait'ee, p'uuru chok'ara–ee.
8 ’Judá, pùdeepa uchiadait'eerã pù âpemaarãdeepa uchiadait'eerã k'ãyaara waibùara padait'eeda aji. Ãchi k'îra unuamaa iru p'anapataarã p'oyaadait'ee. Pù âpemaarãdeepa uchiadait'eerã ãra k'îrapite bedabaidait'ee. 9 Mù warra Judá, pùdeepa uchiadait'eerã juataura p'anadait'ee awaraarã k'ãyaara. León k'ûtrãaweda baparik'a p'anadait'ee, awaraa ne–animal jita atak'ãri k'oit'ee. Êp'ep'eda, eujãde bat'at'aapari león chonaapa bat'aparik'a. Mãpai k'op'eda, ãpùtee wãpari ichi temaa. ¿K'airãpa pùdeepa uchiadait'eerã ome p'oyaadaima? 10 Pùdeepa reyrã cetro juade iru p'anapataarã uchiadait'eeda aji. Eperãarã ãra jua ek'ari p'anapataadait'ee, jõmaarã reyrã k'ãyaara waibùara bù cheru misa. Eperãarãpa iru pedeeta ûridait'ee mãik'aapa iru jua ek'ari ichita p'anapataadait'ee. 11 Pùdeepa uchiadait'eerãpa ãchi burro jâdait'ee uva k'arrade, uva uuda waibùa iru p'anadait'ee perã. Madeepa vino waibùa oodait'ee. Aùde p'aru t'õk'ajida, waibùa iru p'anadait'ee perã. 12 Pùdeepa uchiadait'eerã tau jã vino k'ãyaara tau p'ãimaara p'anadait'ee mãik'aapa ãchi k'ida p'ak'a juba k'ãyaara t'orroora p'anadait'ee.’
13 ’Zabulondeepa uchiadait'eerã p'usa ide p'anapataadait'eeda aji. Barco choma bee wiibaidait'ee ãramãi. Ãra eujã Sidón p'uurumaa pait'ee.
14 ’Isacardeepa uchiadait'eerã chaaree p'anadait'eeda aji, burro chaaree baparik'a. Ma burro mãgá chaaree bù mîda, p'oyaa p'irabaik'aa ichi ek'arrade ne–inaa chùk'ùa bùdak'ãri. 15 Eujã pia unudak'ãri, aùde âi k'inia p'anadait'ee. Mamîda esclavoorã p'anadait'ee, burropa ichi ek'arra eburuk'uk'uaparik'a aùde ne–inaa chùk'ùa bùdamerã.
16 ’Dandeepa uchiadait'eerã p'anadait'ee ichi jua ek'ari apema Israeldeepa uchiadait'eerã p'anapataadait'eek'a ãchi chonaarã jua ek'ari. 17 Ãra p'anadait'ee taama o bide bùk'a. Caballo wãyaa wãde chi bùùrùde k'aat'aak'ãri, eperã aù ârù wã tudú padaipari.
18 Mãpai Jacobpa mãgaji:
—Aai Ak'õre Waibùa, ¡mù k'aripáji!
19 Maap'eda chi warrarãmaa waya pedeemaa beeji:
—Gaddeepa uchiadait'eerãpa soldaorã p'oyaadait'eeda aji, ãchi eujã jãri chedak'ãri.
20 ’Aserdeepa uchiadait'eerãpa chik'o pia iru p'anadait'eeda aji, reyrãpa iru p'anapatak'a.
21 ’Neftalideepa uchiadait'eerã p'anadait'ee bigi chi wã k'iniamaa wãparik'a. Mãgee bigi warrarã pi–ia beepari.
22 ’Josedeepa uchiadait'eerã p'anadait'ee ne–inaa k'arra to ide uudak'a. Nejõ chok'ara chaupari mãik'aapa chi jua chok'ara uchiapata muralla t'ap'arumaa. 23 Ãra k'îra unuamaa iru p'anapataarã ematrùma panau chedait'ee ãra ome chõode. 24 Mamîda awaraarãmaa p'oyaapida–e pait'ee. Choodait'ee, Jacobpa ijãada Ak'õre Waibùapa k'aripait'ee perã; mãgà ichiaba t'âjarapata Israelitaarã Ak'ùpari. ¡Irumaa gracias jarátù! 25 ¡Gracias jaráji pùchi ak'õre Ak'õre Waibùamaa, irua pùdeepa uchiadait'eerã k'aripait'ee perã! Iruata ãra ùt'ariipa pia ak'ù bapariit'ee. Iruata ãramaa pania eujã ek'ariipa teeit'ee. Iruata ãramaa warrarã pia t'opiit'ee; ãra ne–animalaarã paara. 26 Mù chonaarãpa mùmaa pedee pia jaradap'edaa piara bù ee ichita ùt'ùa jêra bee k'ãyaara. Ma pedee pia auk'a pùmaa jara bù, mùa pù jùrùt'erada perã.
27 ’Benjamindeepa uchiadait'eerã lobok'a chõoyaa p'anadait'eeda aji. Ãstaawa, k'ewaraa paara lobopa peepari mãik'aapa ichia peeda k'opari.
28 Mãga paji Israelpa chi warrarã docemaa jarada. Ma chaachaa pedee jaraji Tachi Ak'õrepa jarapidak'a.
Jacob jai–idaada
29-30 T'êepai Jacobpa chi warrarãmaa mãgaji:
—Mù jai–idaait'eeda aji. Mù ùadapáde aji, Canaande mù chonaarã ùadap'edaamãi Macpela mãu te uriade. Ma eujã Mamré k'ait'a Abrahampa netoji hitita pida Efrón juak'aawa, aùde iru ëreerã ùadamerã. 31 Mama ùajida Abraham mãik'aapa chi wêra Sara; Isaac mãik'aapa chi wêra Rebeca mãik'aapa mama mùa Lea ùaji. 32 Ma eujã ma mãu te uria paara tachi ëreerãdeda aji, netoda hititaarã juak'aawa.
33 Mãga jarada t'êepai, Jacob jêra beeji mãik'aapa jai–idaaji.