Jacobpa José warrarãmaa pedee pia jarada
48
1 Ma t'êepai Josemaa jara pëijida: “Pù ak'õre k'ayaa bù.” Mapa José wãji chi ak'õre ak'ùde ichi warrarã Manasés, Efraín ome. 2 José cheda jaradak'ãri, Jacob k'ap'ùa t'ûmaa baji mîda, su–ak'ù beeji ichi camade. 3 Mãpai Josemaa mãgaji:—Mù Canaán eujãde bak'ãri, Tachi Ak'õre Waibùapa ichi mùmaa unupijida aji, Luz p'uurude. 4 Na pedee pia mùmaa jaraji: “Ûripáde aji. Mùa pùdeepa warrarã chok'ara uchiapiit'ee. Pùdeepa uchiadait'eerãpa p'uuru chok'ara oodait'ee. Na Canaán eujã teeit'ee ãchimaa, ichita aùde p'anapataadamerã.” 5 Mùa jara k'inia bù pùchi warrarã Efraín, Manasés ome, mù chei naaweda t'odap'edaa nama Egipto eujãde ichiaba mëré. Mùchi warrarãk'a p'anadait'ee; Rubenk'a mãik'aapa Simeonk'a. 6 Awaraa warrarã t'oruta pùrã, përé pait'ee. Âpemaarã perã, ichiaba jâadait'ee Efrainpa jâait'eek'a mãik'aapa Manasés jâait'eek'a. 7 Mù Padán Aram eujãdeepa chek'ãri Canaán eujãdee, Efrata p'uuru k'ait'a pù nawe Raquel jai–idaaji. Mama ùajida Efrata o k'ait'a; ma p'uuru ârá t'âjarapata Belén.
8 Mãga nepùrùmaa bùde Jacobpa José warrarã unuji mãik'aapa iidiji:
—¿K'áirãma aji, nãgùùrã?
9 Josepa p'anauji:
—Mù warrarãda aji, Tachi Ak'õrepa nama Egiptode teeda.
Mãpai Jacobpa mãgaji:
—K'ait'aara chedapáde aji. Parãmaa mùa pedee pia jara k'inia bù Tachi Ak'õrepa jarapi bùk'a.
10 Israel chonaa chaji. Maperã pia unuk'aa paji. Mapa Josepa chi warrarã k'ait'aara wãpip'eda, Jacobpa ãchi k'îra ât'aaji mãik'aapa wëre ataji. 11 Mãpai Josemaa mãgaji:
—K'îsiaji pù waa unu–e pait'ee. Mamîda Tachi Ak'õrepa pù warrarã paara mùmaa unupiji.
12 Josepa chi warrarã Jacob mak'aradeepa atap'eda, bedabaidachi tau bùùrù te jãde t'õbairumaa. 13 Mãpai chi warrarã bùji chi ak'õre k'îrapite. Chi naapema Manasés bùji Israel juaraare; jõdee Efraín bùji juabi eere. 14 Mamîda Israelpa bùji ichi jua juaraare José warra t'êepema Efraín ârù; jõdee ichi juabi eere bùji José warra naapema Manasés ârù. 15 Mãpai na pedee pia jaraji Tachi Ak'õrepa jarapidak'a:
—Mù ak'õchona Abraham, mù ak'õre Isaac ijãadap'edaa Ak'õre Waibùapa mù t'oruweda pia ak'ù bapari. 16 Mù ne–inaa k'achiadeepa uchiapipari. Mùa k'inia bù mãgà Ak'õre Waibùapa na warrarã auk'a pia ak'ù bapariimerã. Ãra k'aurepa na eujãde mù t'â, mù ak'õchona Abraham t'â mãik'aapa mù ak'õre Isaac t'â k'irãpadait'ee. K'inia bù ãradeepa warrarã chok'ara uchiadamerã mãik'aapa p'uuru chok'ara uchiadamerã.
17 Josepa k'inia–e paji chi ak'õrepa ichi jua juaraare bùmerã ma warra t'êepema poro ârù. Mapa chi ak'õre jua juaraare atait'ee paji mãik'aapa bùit'ee paji chi naapema poro ârù 18 nãga jara bù misa:
—Ak'õre, mãga–eda aji. Nãgà chi naapema. Pù jua juaraare bùpáde aji, nãgà poro ârù.
19 Mamîda Jacobpa k'inia–e paji. P'anauji:
—Warra, mùa k'awa bùda aji. Jãgùdeepa p'uuru chok'ara ichiaba uchiadait'ee. Mamîda chi t'êepema waibùara pait'ee iru k'ãyaara, ichideepa p'uuru chok'araara uchiadait'ee perã.
20 Ma ewateweda Jacobpa na pedee pia jaraji José warrarãmaa:
—Israeldeepa uchiadait'eerãpa pedee pia jaradak'ãri, parã t'â jaradait'ee nãgá: “Tachi Ak'õrepa pùmaa ooipia bùda adait'ee, irua Efrainmaa mãik'aapa Manasemaa oodak'a.”
Israelpa mãga jarak'ãri, Efraín t'â naapùara jaraji Manasés t'â k'ãyaara.
21 Maap'eda Israelpa Josemaa mãgaji:
—Mù jai–idaait'eeda aji. Mamîda Tachi Ak'õre bait'ee parã ome mãik'aapa parã wãpiit'ee tachi chonaarã eujãdee. 22 Pùmaa net'aa audupùara atabëiit'ee pù âpemaarãmaa k'ãyaara. Teeit'ee eujã pia, ee jêra bù bide bù Siquén k'ait'a; ma eujã mùa amorreorã juak'aawa jãri atada, espadapa mãik'aapa ematrùmapa chõo p'anùde.