47
1 Maap'eda José wãji Faraonmaa nepùrùde chi ak'õre Canaán eujãdeepa pacheda chi âpemaarã ome. Jaraji Gosén eujãde p'anù ãchi ovejaarã, p'ak'aarã, net'aa ome. 2 Josepa âpemaarã joisomaa aneeji Faraonmaa irua ãchi k'awamerã.3 Iru k'îrapite pachedak'ãri, Faraonpa iidiji:
—¿Parãpa k'ãare mimiata oopatama? aji.
P'anaujida:
—Tachi Rey Waibùa, tai pù mimiapataarãpa oveja ak'ùpatada ajida, tai chonaarãpa oopatap'edaak'a. 4 Tai chejida na eujãdee p'anapataade, jarrajara Canaán eujãde paraa perã. P'ûajara wêedaru tai ovejaarã–it'ee. Tachi Rey Waibùa, tai chupùria k'awaapáde ajida, mãik'aapa Gosén eujãde p'anapipáde ajida.
5 Mãpai Faraonpa Josemaa mãgaji:
—Pù ak'õre pù âpemaarã ome chejidada aji, pù ome p'anapataade. 6 Nama Egiptode p'anadaipia bù, Gosén eujãde. Jã eujã piara bù ãchi–it'ee. Ãchidepema ùmùk'îraarã paraa pùrã p'ak'a ak'ù k'awaa beerã, mù p'ak'aarã bùpáde aji, mãùrã jua ek'ari ak'ùdamerã.
7 Josepa chi ak'õre ichiaba ateeji Faraonpa k'awamerã. Jacob Faraón k'îrapite pak'ãri, pia saludaaji.
8 Mãpai Faraonpa Jacobmaa iidiji:
—¿Pù año jõmasaa iru bùma? aji.
9 Jacobpa p'anauji:
—Ciento treinta años iru bùda aji, na p'ek'au eujãde ni. Mùchi chonaarã mù k'ãyaara año chok'araara iru p'anajida mîda, mù taarã–e pùk'a mia bapari na p'ek'au eujãde.
10 Jacobpa Faraón despediip'eda, iru palaciodeepa uchiaji.
11 Faraonpa jaradak'a Josepa teeji Egiptodepema eujã pipùara bù aùde p'anapataadamerã. Mãgá chi ak'õrepa chi âpemaarã ome eujã atajida Ramsés apata eujãde. 12 Ma awara Josepa chik'o teepachi chi ëreerãmaa, te chaachaa falta beedamãi.
Josepa ooda jarrapa piunaadamerã
13 Ma jarrajara k'aurepa Egipto eujãde, Canaán eujãde paara trigo wê–e paji. Maperã ma eujãdepemaarã jarra oopachida mãik'aapa jarrapa piu wãpachida. 14 Maapai Josemaa p'arat'a p'aadap'edaa Egipto pidaarãpa mãik'aapa Canaán pidaarãpa trigo neto chedak'ãri, ma p'arat'a ùa bùji Faraón palaciode.
15 Egipto pidaarã cananeorã ome p'arat'a jõdaik'ãri, Egipto pidaarãpa Josemaa chupùria iidi chejida:
—Taimaa nek'opipáde ajida. Chupùria k'awáaji mãik'aapa chik'o téeji, tai p'arat'a wêe chitoonù mîda. Maa–e pùrã tai jarrapa piudait'eeda ajida.
16 Josepa p'anauji:
—Parã p'arat'a wêe p'anù pùrã, pãchi ne–animalaarã aneedapáde aji, trigo pari t'erabaidait'ee.
17 Mãga oojida. Egipto pidaarãpa ãchi caballoorã, ovejaarã, p'ak'aarã, burroorã Josemaa aneejida. Mãpai Josepa ãchimaa trigo teeji. Mãga ooji año aba wãyaarude.
18 Mamîda ma año wãyaap'eda, waya Josemaa chupùria iidide chejida:
—Pùa k'awa bùda ajida, tai p'arat'a wêe p'anù mãik'aapa ne–animalaarã paara wêe p'anù, jõmaweda t'erabaidap'edaa perã trigo pari. Waa wêe p'anùda ajida, t'erabaidait'ee trigo pari. Aba tai eujã mãik'aapa tai k'ap'ùa iru p'anù. 19 Maperã neto atapáde ajida, tai eujã mãik'aapa tai k'ap'ùa. Tai Faraón esclavoorã p'aneedait'ee. Iru–it'ee tai eujãde mimiadait'ee. Aba iidi p'anù pùa net'a tau teemerã. Mãgá tai eujãde uudayada ajida, atuanaamerã. ¿Sãgá pùa tai chupùria k'awa–e payama? ajida.
20 Mãpai Josepa Egipto pidaarã eujã Faraon–it'ee neto ataji. Neto k'iniada–e p'anajida mîda, neto pëijida jarrapa piuda–e pait'ee. Mãgá ãchi eujã Faraón jua ek'ari beeji. 21 Mãgá Egipto eujã jõmaade Egipto pidaarã Faraón esclavoorã padachida. 22 Aba Josepa neto ata–e paji Egiptodepema p'aareerã eujã, Faraonpa ãramaa ichita trigo teeda perã ãra mimia pari. Mãgá trigo iru p'anadap'edaa perã k'odait'ee, ãchi eujã netoda–e paji.
23 Maap'eda Josepa Egipto pidaarãmaa mãgaji:
—Ârá parã, pãchi eujã ome Faraondé, mùa parã neto atada perã iru–it'ee. Nama bùda aji, net'a tau iru eujãde uudamerã. 24 Ma ne–uudap'edaa ewadak'ãri, k'oraa joisomaa chaadepema aba awara bùdapáde aji, Faraonmaa teedait'ee. Apema k'îmari parã–it'ee: ûk'uru waya uudamerã; ûk'uru k'odamerã parãpa, pãchi warrarãpa, awaraarã parã ome p'anapataarãpa paara.
25 Ãrapa p'anaujida:
—Pù tai ome t'ãri pia bùda ajida. Pù k'aurepa tai jarrapa piuda–e paji. ¡Tai Faraón esclavoorãpù!
26 Mãgá Josepa Egipto pidaarã k'aripaji mãik'aapa ley ooji ãchi net'a tau ewadap'edaa k'oraa joisomaadepema aba Faraonmaa teedamerã. Ma leyde jara bùk'a at'ãri oopata Egipto eujãde. Mamîda Egiptodepema p'aareerãpa mãga oodak'aa, ãchi eujã Faraonmaa netoda–e padap'edaa perã.
Jacobpa chi warra Josemaa iidida
27 Egipto eujãdepema Gosén eujãde Jacob ëreerãpa eujã atadap'eda, mama p'aneejida mãik'aapa chok'ara îwajida. 28 Jacob diecisiete años bapachi Egipto eujãde. Ciento cuarenta y siete años baji na p'ek'au eujãde.
29 Jacob, ichiaba t'âjarapatap'edaa Israel chonaa pak'ãri, jara pëiji Josemaa chemerã. Mãgaji:
—Pùa mù pia ak'ùru pùrã, pù jua mù mak'arade bùpáde aji, mãik'aapa jarapáde aji, mùa jarapi bùk'a. Mù ùanaapáde aji, nama Egiptode. 30 Mù jai–idaak'ãri, mù Egipto eujãdeepa ateepáde aji. Mù ùanapáde aji, mù ak'õre, mù ak'õchona ùadap'edaamãi.
Josepa p'anauji:
—Mãga ooit'eeda aji.
31 Mãpai Jacobpa mãgaji:
—Tachi Ak'õre k'îrapite mãga juraapáde aji.
Josepa mãga ooji. Mãpai Israel ichi camade k'ãiwee jêra beeji.