Jacob chi warrarã ome Egiptodee wãdap'edaa
46
1 Mãgá Israel, chi ëreerã, chi net'aa, ne–animalaarã ome chejida Egiptodee. Canaán eujãdeepa uchia wãdade Bersebadee, ichia ne–animal peep'eda, paaji chi ak'õre Isaac Ak'õre Waibùa–it'ee. 2 Mama p'ãrik'ua k'ãimok'araade Tachi Ak'õrepa Israel naaweda t'âjarapatap'edaak'a t'â jaraji:—Jacob, Jacob, aji.
P'anauji:
—Nama bùda aji.
3 Mãpai Tachi Ak'õrepa mãgaji:
—Mù Jõmaarã Ak'õre Waibùa; pù ak'õrepa ijãada Ak'õre Waibùa. Waaweenaapáde aji, Egiptodee wãit'ee, 4 mù pù ome nipait'ee perã. Egiptode pùdeepa warrarã chok'ara îwapiit'ee, mãik'aapa taarã pak'ãri, waya Canaandee chepiit'ee. Pù jai–idaak'ãri, pù warra José pù ik'aawa bait'eeda aji.
5 Mãpai Jacob Bersebadeepa uchiaji. Chi warrarãpa iru mãik'aapa ãchi wêraarã warrarã ome wãpijida Faraonpa carreta pëidade. 6 Jõmaweda wãjida Egiptodee ãchi ne–animalaarã ome mãik'aapa Canaán eujãde p'anadak'ãri net'aa atadap'edaa paara. 7 Jõmaweda ãchi warrarã, ãichak'eerã paara ateejida.
8 Nãga t'âjarapachida Jacobdeepa uchiadap'edaarã, chi iru ome Egipto eujãdee wãdap'edaarã:
9 Jacob warra naapema Rubén ichi warrarã Janoc, Falú, Jezrón mãik'aapa Carmí ome;
10 Jacob warra Simeón ichi warrarã Jemuel, Jamín, Oad, Jaquín, Zojar mãik'aapa Saúl, chi warra ooda Canaán eujãdepema wêra ome;
11 Jacob warra Leví ichi warrarã Guersón, Coat mãik'aapa Merari ome;
12 Jacob warra Judá ichi warrarã Selá, Fares mãik'aapa Zera ome. (Chi warrarã Er mãik'aapa Onán Canaán eujãde piujida.) Auk'a wãjida Fares warrarã, Jezrón mãik'aapa Jamul.
13 Ichiaba wãjida Jacob warra Isacar ichi warrarã Tola, Fuvá, Job mãik'aapa Simrón ome;
14 Jacob warra Zabulón ichi warrarã Séred, Elón mãik'aapa Yalel ome.
15 Mãùrã paji Jacobpa ooda Lea ome Padán Aram eujãde p'anadak'ãri. Leapa ichiaba k'au aba t'oji. T'âjarapachida Dina. Leadeepa uchiadap'edaarã treinta y tres paji; ùmùk'îraarã wêraarã ome.
16 Ichiaba wãjida Jacob warra Gad ichi warrarã Zefón, Jaguí, Esbón, Suni, Erí, Arodí mãik'aapa Arelí ome;
17 Jacob warra Aser ichi warrarã Imná, Isvá, Isví, Beriá mãik'aapa ichi k'au Sera ome. Beriá warrarã Héber, Malquiel ome auk'a wãjida.
18 Mãùrã paji Jacobpa ooda Lea esclava Zilpá ome; ma esclava Labanpa teeda chi k'au Leamaa. Mãgà Zilpadeepa uchiadap'edaarã dieciséis paji.
19 Ichiaba wãji Benjamín, Jacobpa ooda chi wêra Raquel ome.
20 Egiptode bùde Josepa warrarã omé ooji Asenat ome. T'âjarapachida Manasés mãik'aapa Efraín. Asenat On p'uurudepema p'aare Potifera k'au paji.
21 Jacob ome wãjida chi warra Benjamín ichi warrarã Bela, Béquer, Asbel, Guerá, Naamán, Ehí, Ros, Mupín, Jupín mãik'aapa Ard ome.
22 Mãùrã paji Jacobpa ooda Raquel ome. Raqueldeepa uchiadap'edaarã catorce paji.
23 Ichiaba wãjida Jacob warra Dan ichi warra Jusín ome;
24 Jacob warra Neftalí ichi warrarã Yazel, Guní, Jéser mãik'aapa Silén ome.
25 Mãùrã paji Jacobpa ooda Raquel esclava Bilhá ome; ma esclava Labanpa teeda chi k'au Raquelmaa. Mãgà Bilhadeepa uchiadap'edaarã siete paji.
26 Jacobdeepa uchiadap'edaarã sesenta y seis paji iru ome wãdak'ãri Egiptodee, chi ãiguurã juasiada–ee. 27 Egiptode Josepa warra omé ooji. Mãgá Jacob ëreerã setentaa p'aneejida Egiptode.
28 Panai naaweda, Jacobpa Judá pëiji Josemaa ãchi cheruta jaramerã.
29 Josepa chi ak'õre Gosén eujãde pacheda ûrik'ãri, ichi carreta caballopa jidiupata atapiji mãik'aapa wãji chi ak'õre k'îrachuude. Unudak'ãri, José chi ak'õre ik'iade jêe nâbeeji.
30 Mãpai Israelpa Josemaa mãgaji:
—Ârara sí, mù k'ãiwee jai–idaait'eeda aji, pù nãgá chok'ai unuda perã.
31 Mãpai Josepa chi ëreerãmaa mãgaji:
—Mùa parã pachedap'edaa Faraonmaa jaranait'eeda aji. Jarait'ee mù âpemaarã ãchideerã ome, mù ak'õre ome p'ana chejida ãchi Canaán eujãde p'anapatap'edaamãiipa. 32 Nepùrùit'ee parãpa pãchi net'aa aneedap'edaa p'ak'aarã ovejaarã ome, ne–animalaarã ak'ùpataarã perã. 33 Irua parã t'â pëik'ãri jaradamerã parãpa mimia oopata, 34 jarátù oveja ak'ùpata parã chonaarãpa oopatap'edaak'a. Mãga jararuta pùrã, irua ichiak'au bëiit'ee nama Gosén eujãde p'anapataadamerã. Mãga ooit'ee Egipto pidaarã leyde jara bairã ãchi oveja ak'ùpataarã ome araa p'anapataadaik'araa bù.