Josepa ichi k'awapida chi âpemaarãmaa
45
1 Josepa mãga ûrik'ãri, waa p'oyaa choo–e paji. Ichia Egipto pidaarã ak'ùpataarã taawaa uchiapiji ununaadamerã ichi k'awapik'ãri chi âpemaarãmaa.2 Mãpai jêedachi. Egipto pidaarãpa ichi biapi ûridap'edaa perã, jaranajida Faraonmaa.
3 Mãga nùde Josepa chi âpemaarãmaa mãgaji:
—Mù Joseda aji. ¿Mù ak'õre at'ãri chok'ai bùk'ã? aji.
Mãga ûridak'ãri, chi âpemaarã p'eradachida José k'îrapite p'anadap'edaa perã. P'oyaa pedeeda–e paji p'era jõnùpa.
4 Mamîda Josepa mãgaji:
—K'ait'a chedapáde aji. Mù parã âpema José, parãpa netot'aadap'edaa Egiptodee chedap'edaarãmaa. 5 Mamîda ma k'aurepa pãchi pitapai k'îraunaadapáde aji, mãik'aapa waaweenaadapáde aji. Parã naa Tachi Ak'õrepa mù nama pëiji parã jarrapa piupiamaapa. 6 Año omé paru jarrajara na eujãde paraa. Mamîda at'ãri año joisomaa jarra paraait'ee. Eperãarãpa ne–uuruta pùjida, maarepida ewada–e pait'ee. 7 Tachi Ak'õrepa ne–inaa pi–ia ooji tachi k'aripait'ee. Mù nama pëiji parã, pãchi warrarã ome chok'ai uchiadamerã. 8 Parãpa mù pëida–e paji. Tachi Ak'õrépata mù nama pëiji Faraón ûraamerã mãik'aapa iru jua ek'ari mimiamerã. Mãgá Egipto pidaarã jõmaweda mù jua ek'ari p'aneejida. 9 Wåtù mù ak'õremaa mãik'aapa jarátù: “Pù warra Josepa nãga jara pëiru: ‘Tachi Ak'õrepa mù bùji Egipto pidaarã poro waibùa pamerã. Isapai chéji mù ak'ùde. 10 Gosén eujãde pù bapariit'ee pùchi ëreerã jõmaarã ome, pùchi net'aa, ne–animalaarã paara. Mãgá mù k'ait'a bapariit'ee. 11 Mùa teeit'ee chik'o parã–it'ee k'odamerã, na jarrajara año joisomaa at'ãri taarãit'ee perã. Mùmaa cheda–e pùrã, jarrapa piudayada’ ” aji. 12 Mù âpema Benjaminpa parã jõmaarã ome mùa et'ewa jarada ûriji. 13 Mù ak'õremaa nepùrùnátù mù Egipto pidaarã poro waibùa mãik'aapa parãpa idi unudap'edaa. Mù ak'õre isapai atanadapáde aji.
14 Mãpai José ichi âpema Benjamín ome wëredachida mãik'aapa o–îapa jêedachida. 15 Maap'eda Josepa chi apema âpemaarã k'îra âji mãik'aapa wëre ataji jêe nâbùde. Ma t'êepai chi âpemaarã ichi ome pedee p'aneejida.
16 Faraón palaciode Egipto pidaarãpa nepùrùjida José âpemaarã p'anù. Mãga ûrik'ãri, Faraón o–îa beeji, ichi ak'ùpataarã paara.
17 Faraonpa Josemaa mãgaji:
—Pù âpemaarãmaa jarapáde aji, ãchi burro ârù trigo bùdap'eda, wãdamerã Canaán eujãdee 18 ãchi ëreerã pù ak'õre ome atade. Nama chedak'ãri, mùa teeit'ee ne–inaa pipùara Egiptode nâbù. Ichiaba chik'o pipùara teeit'ee k'odamerã. 19 Mùa tee pëiit'ee carreta ãchi wêraarã, warrarã, pù ak'õre ome aùde chedamerã. 20 Jarapáde aji, ãchi net'aade k'îsianaadamerã, mùa Egiptodepema ne–inaa pipùara bù ãchimaa teeit'ee perã.
21 Mãpai José âpemaarã Canaandee wãjida. Ateejida chik'o ode k'o wãdait'ee mãik'aapa carreta Faraonpa tee pëida. 22 Ichiaba Josepa p'aru chiwidi teeji ãchi jõmaarãmaa jâdamerã ãchi p'aru jaik'oodaidak'ãri. Mamîda Benjaminmaa p'aru joisomaa teeji p'arat'a tau trescientos ome. 23 Chi ak'õremaa Josepa pëiji burro diez Egiptodepema net'aa pipùara ome. Ma awara burro diez pëiji trigo ome, chik'o awaraa ome, pan ome k'odamerã ode chewãdade.
24 Josepa despediik'ãri, chi âpemaarãmaa ûraaji:
—Ode wãdade pãchi pitapai nepùra jùrùnaadapáde aji.
25 Mãpai wãjida. Canaande ãchi ak'õre Jacobmãi panadak'ãri, irumaa mãgajida:
26 —¡José chok'ai bùpù! ¡Iruta Egipto pidaarã poro waibùada! ajida.
Mãga ûrik'ãri, Jacobpa k'awa–e paji k'ãata k'îsiai; ijãai wa ijãa–e pai. 27 Mamîda jõma ãchi p'asada nepùrùdak'ãri mãik'aapa ak'ùpidak'ãri ma carreta Faraonpa pëida ãchi ome, Jacob o–îadachi. 28 Mãpai mãgaji:
—O–îa bùda aji, mù warra José chok'ai bairã. Mù jai–idaai naaweda, iru ak'ùde wãit'eeda aji.