José vaso p'arat'adee ooda
44
1 Nek'odap'eda, k'ùùrù ik'aawa Josepa jaraji ichi tedepema mimiapataarã poro waibùamaa:—Ãchi costal trigopa ipurupáde aji, mãik'aapa costal chaachaa ãchi p'arat'a waya t'ù bùpáde aji. 2 Ichiaba mù vaso p'arat'adee ooda t'ù bàji chi t'êepema costalde ichi p'arat'a ome.
Ma mimiapataarã poro waibùapa mãga ooji.
3 Tap'eda Josepa ãra wãpiji ãchi burroorã ome. 4 Ma t'êepai, p'uurudeepa mak'ùara t'ùmùa–ee wãdade Josepa mãgaji ichi mimiapataarã poro waibùamaa:
—Ma eperãarã t'êe wãdapáde aji. Êp'edak'ãri, iidíji: “¿Sãap'eda parãpa ne–inaa k'achia oojidama tai chiparipa pia ooda pari? 5 ¿Sãap'eda ichi vaso p'arat'adee ooda atee wãjidama? Irua ne–inaa p'asait'ee k'awa k'inia bak'ãri, ma vasode topari. ¡Parãpa ne–inaa k'achia oojidada!” ait'ee.
6 Êp'e atadak'ãri, ma mimiapataarã poro waibùapa auk'a iidiji Josepa jaradak'a.
7 Ãrapa p'anaujida:
—¿Sãap'eda pùa tai ùmùatee k'inia bùma? ajida. ¡Taipa mãgee ne–inaa oodak'aapù! 8 ¿Canaán eujãdeepa taipa ma naawedapema p'arat'a unudap'edaa costalde tee chejida–ek'ã? ajida. ¿Sãgá pù chipari nêe wa p'arat'a chùa atadayama? ajida. 9 Tai net'aade ma vaso unuruta pùrã, chi ateeru piu baibeeipia bùda ajida, mãik'aapa tai pù chipari esclavoorã p'aneedaipia bùda ajida.
10 Mãpai ma mimiapataarã poro waibùapa p'anauji:
—Mãga–eda aji. Jîp'a ma vaso ateeru aupaita esclavo pait'ee. Apemaarã wãdayada aji, pãchi eujãdee.
11 Chi âpemaarã jõmaarãpa ãchi burrodeepa ãchi costal isapai ùrabai atajida mãik'aapa ewajida. 12 Ma mimiapataarã poro waibùapa jùrùji naapemadeepa t'êepema parumaa. Mãpai Benjamín costalde ma vaso unu ataji. 13 Mãga unudak'ãri, chi âpemaarã ãchi p'aru jêt'aajida t'ãri p'uapa. Mãpai ãchi costal burro ârù bùdap'eda, ãpùtee wãjida p'uurudee.
14 Judá chi âpemaarã ome José temãi panadak'ãri, iru at'ãri mama baji. Iru k'îrapite bedabaidak'ãri tau bùùrù te jãde t'õbairumaa, 15 Josepa mãgaji:
—¿Parãpa k'ãata oojidama? aji. ¿K'awada–e p'anùk'ã aji, mùa k'awa bù ne–inaa awaraarãpa k'awada–e p'anù?
16 Judapa p'anauji:
—¿K'ãata jaradayama? aji. ¿K'ãata jaradaima pùa tai pedee ijãamerã? Tachi Ak'õrépata tai na k'achiade baaipiji. Nama p'anùda aji, pù esclavoorã chi vaso chùa atada ome.
17 Mamîda Josepa mãgaji:
—Mãga–eda aji. Chi vaso iru bada aupai mù esclavo pait'ee. Apemaarã pãchi ak'õre temaa k'ãiwee wåtù. Apidaapa parãmaa ne–inaa k'achia ooda–eda aji.
Judapa Benjamín pari chupùria iidida
18 Mãpai Judá Josemaa k'ait'aara wãp'eda, mãgaji:
—Eperãarã poro waibùa, chupùria k'awaapáde aji, mùa jararu ûriit'ee. Mù ome k'îraunáaji. Mùa k'awa bù na eujãde pù Faraonk'a bù. 19 Tai naapùara chedap'edaade pùa iidiji tai ak'õre pari mãik'aapa âpema pari. 20 Taipa jarajida ak'õre chonaa bùta iru p'anù warra aba, chi t'êepema t'oda ome. Nepùrùjida tai ak'õrepa ma warra audú k'inia iru bù iru aupai nawe apaide beeda perã, chi apema ma nawedé piuda perã. 21 Mãpai pùa jaraji ma t'êepema aneedamerã, iru k'awa k'inia bada perã. 22 Jarajida ma warra chi ak'õre ik'aawaapa wãik'araa bùda ajida, ma k'aurepa chi ak'õre piudarii perã. 23 Mamîda pùa jaraji ma âpema aneeda–e pùrã, pùa tai waa k'aripa–e payada aji.
24 ’Mãgá pedeedap'eda, tai temaa wãdak'ãri, ma jõma nepùrùjida tai ak'õremaa. 25 Maap'eda tai ak'õrepa jaraji waya chedamerã nama trigo netode. 26 Mamîda p'anaujida: “Tai âpema t'êepema wêe, ma eperã p'oyaa ak'ùnada–eda” ajida. 27 Mãpai mù ak'õrepa mãgaji: “Parãpa k'awa p'anùda aji, mù wêrapa warra omeepai t'oji. 28 Aba mù ik'aawaapa uchiajida aji. Maadamãiipa iru waa unu–e paji. Iru piujida aji, ne–animal k'achiapa k'ot'aada perã. 29 Chi apema ateeruta pùrã mãik'aapa waya wãdade irumaa ne–inaa k'achia p'asaru pùrã, mù piu baibeeit'eeda aji, t'ãri p'uapa.”
30 ’Mãgá mù ak'õrepa tai t'êepema audú k'inia iru bairã, iru auk'a wã–e pùrã tai ome, 31 tai k'aurepa mù ak'õre t'ãri p'uapa jai–idaayada aji. 32 Mùa jaraji mùa mù âpema t'êepema ak'ù bapariit'ee mãik'aapa waya temaa ateeit'ee. Mãgaji: “Anee–e pùrã, ma k'aurepa mù ichita k'achiade bayada aji, pù k'îrapite.” 33 Maperã mùta beeyada aji, Benjamín pari mimiamaa. Chupùria k'awáaji mãik'aapa iru pïiji mù âpemaarã ome. 34 Mãga–e pùrã, ¿sãgá mù ak'õremaa wãyama aji, iru warra wêe? Mùa unu k'inia–e bùda aji, mù ak'õre mãgá audú chupùria nâbamerã.