Benjamín Egiptodee ateedap'edaa
43
1 Ma t'êepai ãchi eujãde jarrajara audupùara paraaji. 2 Mapa ãchi trigo jõdaik'ãri, Jacobpa jaraji waya wãdamerã trigo netode.3 Mamîda Judapa mãgaji:
—Ma poro waibùapa jîp'a jarajida aji, tai âpema t'êepema ateedamerã. Maa–e pùrã tai unu k'inia–e bùda aji. 4 Maperã pùa tai ome pëiru pùrã, wãdayada aji, trigo netode. 5 Mamîda pëi–e pùrã, wãda–eda aji, ma eperãpa jarada perã: “Pãchi t'êepema nama aneeda–e pùrã, chenáatù.”
6 Mãpai Israelpa mãgaji:
—¿Sãap'eda mùmaa na ne–inaa k'achia oojidama? aji. ¿Sãap'eda jarajidama aji, parãpa awaraa âpema iru p'anù?
7 P'anaujida:
—Ma eperãpa iidida chok'ara iidijida ajida, tai ëreerã pari. Nãga iidiji: “¿Parã ak'õre at'ãri chok'ai bùk'ã?” “¿Awaraa âpema iru p'anùk'ã?” ¿Sãga p'anauk'ajidama? ajida. K'awada–e pajida ajida, irua jarait'ee tai âpema ateedamerã.
8 Mãpai Judapa chi ak'õre Israelmaa mãgaji:
—Na jarradeepa chok'ai uchiadait'ee, Benjamín pëipáde aji, idiweda wãdamerã. Mùa iru ak'ù bapariit'ee. Mãgá apida jarrapa piuda–e pait'ee. 9 Mùa pùmaa ãpùtee anee–e pùrã, ichita mù k'achiade bapariit'eeda aji, pù k'îrapite. 10 ¡Audú taarãda–e pada paara, wãda omé wã p'anak'ajidada! aji.
11 Mãpai Israelpa mãgaji:
—¿K'ãata waa oodayama? aji. Nãga oodapáde aji. Parã costalde regalo atéetù ma eperã–it'ee. Atéetù na eujãdepema ne–inaa pipùara bù: bálsamo, mirra, miéle, k'era, net'a teedait'ee chi netoparimaa chupùria k'awaamerã. 12 Ichiaba ma p'arat'a waya tee pëida atéetù awaraa p'arat'a ome trigo waya netodait'ee. ¿Ma p'arat'a parã ome pariatua pëit'aajida–ek'ã? 13 Âraweda pãchi âpema atéetù mãik'aapa wåtù waya ma eperã bùmaa. 14 Mùa k'inia bù Tachi Ak'õre Waibùapa chupùria k'awaapimerã ma trigo netoparimaa uchia pëimerã ãra omeeweda. Mamîda irua mãga oo–e pùrã mãik'aapa mù warra wêe beeru pùrã, wêe beeit'eeda aji.
15 Mãgá waya Egiptodee wãjida. Ateejida Benjamín, p'arat'a, net'aa Jacobpa tee pëida ome.
16 Ara panadak'ãri, Josepa unuji Benjamín ãra ome chewã mãik'aapa nãga jaraji ichi tedepema mimiapataarã poro waibùamaa:
—Jã eperãarã ateepáde aji, mù temaa. P'ak'a peep'eda, joopíji, imat'ùpa ãra mù ome nek'odait'ee perã.
17 Chi mimiapataarã poro waibùapa ooji Josepa jaradak'a. Wãji chi âpemaarã p'anadap'edaamaa ãra José temaa ateeit'ee. 18 Mamîda ãrapa k'awadak'ãri José temaa wãda, ãchobeedachida. Ãchi pitapai pedeejida:
—Seewata nãga oomaa bùda, ajida. ¿Nama ateeru–ek'ã ajida, ma p'arat'a k'aurepa? Tachi ome chõo chedayada ajida, mãik'aapa esclavoorã papidayada ajida, tachi ne–animalaarã ome.
19 Tedepema puerta k'ait'a panadak'ãri, jarajida ma tedepema mimiapataarã poro waibùamaa:
20 —Aai, eperãarã poro waibùa, naaweda chedak'ãri, wãara trigo netodeta chejidada ajida. 21 Mamîda ãpùtee wãdak'ãri mãik'aapa ot'a k'ãidait'ee pak'ãri, tai costal ewajida mãik'aapa ma trigo netodap'edaa p'arat'a unujida costal chaachaa. Nama iru p'anù waya teedait'ee pù chiparimaa. 22 Ma awara p'arat'a aneejida waya trigo netodait'ee. K'awada–e p'anùda ajida, tai uchiadai naaweda k'áipata ma naawedapema p'arat'a tai costalde t'ù nâbùda.
23 Ma mimiapataarã poro waibùapa p'anauji:
—Waaweenaadapáde aji. ¿Parã mãik'aapa parã ak'õre Ak'õre Waibàapata ma p'arat'a parãmaa waya teeji–ek'ã? Mùa k'awa bùda aji, parãpa ma naawedapema trigo p'aadap'edaa, mùa ma p'arat'a jitada perã.
24 Mãpai Simeón carceldeepa aneeji mãik'aapa ãra jõmaweda ateeji José temaa. Mama panadak'ãri, teeji pania ãchi bùùrù sùùdamerã. Ma awara nek'opiji ãchi burroorãmaa. 25 José pacheru misa, ãchia regalo aneedap'edaa êt'ajida irumaa teedait'ee, k'awadap'edaa perã ma tede nek'odait'ee.
26 Iru pachek'ãri, mãgà teejida mãik'aapa iru k'îrapite bedabaidachida tau bùùrù te jãde t'õbairutamaa.
27 Mãpai Josepa iidiji:
—¿Sãga p'anùma? aji. ¿Sãga bùma parã ak'õre, chi chonaa chù? ¿At'ãri chok'ai bùk'ã? aji.
28 Âjaabai p'anadap'eda, p'anaujida:
—Tai ak'õre pù mimiaparík'apù bùda ajida. Chok'ai bùda ajida, mãik'aapa k'ap'ùa pia bù.
29 Josepa ãchi jõmaweda ak'ùji. Chi âpema nawe eereepa Benjamín unu atak'ãri, mãgaji:
—¿Nãgùk'ã aji, parã t'êepema, mùmaa nepùrùdap'edaa? Warra, ¡mùa k'inia bùda aji, Tachi Ak'õrepa pù pia ak'ù bamerã!
30 Mãga jarak'ãri, tauba cheji mãik'aapa jêe k'inia nâbeeji. Mapa isapai t'îuji ichi k'ãipari cuartode mãik'aapa jêedachi. 31 Jêe aupak'ãri, ichi k'îra sùùji mãik'aapa uchiaji ãchi p'anùmaa. Mãpai chi mimiapataarãmaa mãgaji:
—Chik'o aneedapáde aji.
32 José su–ak'ù beeji mesa abaade; Egipto pidaarã mesa awaraade. Jõdee Jacob warrarã mesa awaraade su–ak'ù p'aneejida, Egipto pidaarã leyde jara bada perã araa nek'odaik'araa bù awaraa eujãdepemaarã ome. 33 Josepa ichi âpemaarã su–ak'ù beepiji naapemadeepa ãchi t'êepemamaa. Mãga unudak'ãri, p'era pùk'a p'anajida mãik'aapa ak'ùtrua para beeji. 34 Ichi mesade chik'o bùdap'edaadepema teepiji chi âpemaarãmaa. Mamîda audupùara teepiji Benjaminmaa. Mãpai José chi âpemaarã ome to para beeji mãik'aapa o–îa p'aneejida.