José chi âpemaarã ome Egiptode unuda
42
1 José ak'õre Jacob Canaán eujãde at'ãri bapachi chi warrarã ome. Irua k'awak'ãri Egipto eujãde chik'o paraa, chi warrarãmaa mãgaji:—¿Sãap'eda parã jãma k'îra ak'ù para nâbùma aji, chik'o jùrùnada–ee? 2 Egiptode trigo paraada a p'anù. Wãdapáde aji, Egiptodee trigo netode, maa–e pùrã tachi jarrapa piudaridayada aji.
3 Mãpai José âpemaarã diez Egiptodee wãjida trigo netode. 4 Mamîda ãchi ak'õrepa José âpema Benjamín wãpi–e paji, ode ne–inaa k'achia p'asai jîak'aapa. 5 Israel warrarã awaraa cananeorã ome auk'a wãjida ma eujã jõmaade jarrajara paraada perã.
6 Maapai José Egipto pidaarã poro waibùa paji. Iruata trigo neto pëipachi awara ãiipa chedap'edaarãmaa. Chi âpemaarã Egiptode panadak'ãri, José k'îrapite bedabaidachida ãchi tau bùùrù eujãde t'õbairutamaa. 7 Josepa ãra unuk'ãri, k'awaji chi âpemaarã. Mamîda irua k'awa–ee pùk'a beeji.
Trigo neto iididak'ãri, Josepa ijâatù pedeeji:
—¿Parã, sãmãik'aapa cherutama? aji.
Ãchia p'anaujida:
—Tai Canaandeepa cherutada ajida, chik'o netode.
8 Josepa ãra k'awaji mîda, ãrapa iru k'awada–e paji.
9 Mãpai Josepa k'irãpaji ichi k'ûtrãaweda k'ãimok'araada. Ijâatù pedeepa mãgaji:
—Parã seewata trigo netode che p'anùda aji. Pãchi k'inia nidada aji, tai eujã ak'ùde.
10 P'anaujida:
—Mãga–eda ajida. Tai pù mimiapataaråk'apù p'anù. Trigo netodeta che p'anùda ajida. 11 Tai jõmaweda ak'õre apaideepa uchiadap'edaarã. Tai nepùra jùrùdak'aa chîara ome. Ma awara chîara eujãde mãgá nipadak'aa.
12 Mãpai Josepa mãgaji:
—Seewada aji. Parã chejidada aji, na eujã ak'ùde, t'êepai chõo che k'inia p'anadairã.
13 Mamîda p'anaujida:
—Tai pù mimiapataarã. Canaán eujãde p'anapata. Tai âpemaarã doce, ak'õre apaideepa uchiadap'edaa. Chi t'êepema aba tai ak'õre ome beeji. Chi apema tai ome wê–e.
14 Mãpai Josepa mãgaji:
—Mùa jaradak'a parã na eujã ak'ù chejidada aji. 15-16 Nãga oodaipia bù mùa parã pedee ijãamerã. Aba wãpáde aji, pãchi âpema t'êepema atade. Chi apemaarã nama presoorãk'a p'aneedait'ee. Irua pãchi âpema anee–e pùrã, mùa k'awaait'ee wãara na eujã ak'ùde che p'anù. Faraón k'îrapite mùa juraa bù parã namãik'aapa uchiada–e pait'ee, pãchi âpema cheru misa.
17 Mãga jarap'eda, Josepa carcelde t'ùpik'ooji ãchi jõmaweda k'ãima õpee. 18 Mamîda k'ãima õpeemaa jaraji:
—Mùa Tachi Ak'õre waawee baparida aji. Nãga oodaipia bù chok'ai uchiadait'ee. 19 Parãpa wãarata jara p'anù pùrã, nama carcelde aba ata bïitù mãik'aapa chi apemaarã wåtù trigo teede pãchi ëreerãmaa. 20 T'êepai pãchi t'êepema aneedapáde aji. Maa–e pùrã mùa parã peepik'ooit'eeda aji.
—Nãgá p'anùda ajida, Tachi Ak'õrepa tachi k'achia oo bairã. Nãga oomaa bù tachi âpema chupùria k'awaada–e pada perã. Mia baji mîda, irua chupùria iidida ûrida–e paji.
22 Mãpai Rubenpa mãgaji:
—¿Mùa parãmaa jaraji–ek'ã aji, ma k'achia oonaadamerã? Mamîda parãpa ûri k'iniada–e paji. Ârá ma k'aurepa Tachi Ak'õrepa tachi k'achia oomaa bùda aji.
23 Ãra pedee p'anù misa, Josepa ûri baji. Mamîda ãrapa k'awada–e p'anajida. José Egipto pidaarã pedeede pedee baji. Mamîda k'õp'ãyo aba iru baji. Ma eperãpa hebreo pedee, pedee k'awaa baji. Mapa Josepa Egipto pedeede pedeek'ãri, ma eperãpa hebreo pedeede jarapachi José âpemaarãmaa. Mãgá chi âpemaarãpa k'awada–e p'anajida Josepa ãchi pedee ûri bù. 24 Ãra pedee ûrik'ãri, José awara ãi wãji jêede mãik'aapa chep'eda, ãra k'îrapite Simeón jâpiji carcelde t'ù nâbùpiit'ee. T'ù nâbùpip'eda, mama ata bùji chi t'êepema aneerutamaa.
25 Maap'eda jara pëiji ichi mimiapataarãmaa trigo neto pëidamerã ãramaa. Ma awara jaraji teedamerã chik'o ode k'o wãdamerã. Ichiaba jaraji ãra p'arat'a waya pëidamerã ma trigo ome costal chaachaa. Mamîda ãrapa k'awada–e paji. 26 Ma costal ãchi burro ârù bùdap'eda, wãjida.
27 Ot'a k'ãidait'ee pak'ãri, abaapa ichi costal ewaji trigo teeit'ee chi burromaa. Mãga bùde ma costalde ichi p'arat'a unuji. 28 Mãpai chi âpemaarãmaa mãgaji:
—¡Mù p'arat'a nama bùda aji, mùchi costalde!
Mãga ûridak'ãri, jõmaweda ãchobeedachida mãik'aapa ãchi pitapai mãgajida:
—¿K'ãata oojima ajida, Tachi Ak'õrepa?
29 Canaán eujãde panadak'ãri, ãchi ak'õre Jacobmaa ãchi p'asada nepùrùjida mãik'aapa mãgajida:
30 —Jã eujãdepemaarã poro waibùapa tai ùmùateejida ajida. Jaraji tai ãchi eujã ak'ù nipajida, t'êepai chõonadait'ee. 31 Mamîda jarajida tai k'îra jîp'a p'anapata mãik'aapa k'achiade nipadak'aa. 32 Jarajida tai âpemaarã doce, ak'õre apaideepa uchiada. Aba tai ome wê–eda ajida, mãik'aapa aba tai ak'õre ome beeji.
33 Mãpai ma poro waibùapa jaraji: “Nãgá mùa k'awaai parã wãara wa seewa jara p'anù. Parãdepema aba nama atabëidapáde aji, trigo ateeruta misa pãchideerã–it'ee. 34 T'êepai parã t'êepema aneedapáde aji. Mãgá mùa k'awai parã k'îra jîp'a nipapata mãik'aapa cheda–e paji tai eujã ak'ùde. Parã t'êepema aneedak'ãri, chi atabëida k'ena pëiit'eeda aji, mãik'aapa na eujãde nepùra wêe nipapataadait'ee.”
35 Ãchi costal ewa atadak'ãri, costal chaachaa ãchi p'arat'a unujida. Mapa ãchobeedachida, ãchi ak'õre paara.
36 Mãpai Jacobpa mãgaji:
—¿Pãchi k'aurepa mù warra wêe beeru–ek'ã? aji. José wê–eda aji, Simeón ichiaba. Ârá Benjamín paara atee k'inia p'anùda aji. ¡Apidaapa mù chupùria k'awaada–eda! aji.
37 Mãpai Rubenpa chi ak'õremaa mãgaji:
—Mùa Benjamín ak'ù bapariit'ee mãik'aapa waya aneeit'eeda aji. Anee–e pùrã, pùa mù warrarã omeeweda peepáde aji.
38 Mamîda Jacobpa ijãa–e paji. Mãgaji:
—Mù warra parã ome wã–eda aji. Parã âpema José piujida aji. Warra apai beeru Raquelpa t'oda. Ode wãdade ne–inaa k'achia p'asaru pùrã, parã k'aurepa mù t'ãri p'uapa piu baibeeyada aji.