Josepa k'awapida Faraonpa k'ãimok'araada
41
1 Año omeemaa ewari aba rey Faraonpa nãga k'ãimok'araaji. Nilo to ide baji. 2 Mãga nùde unuji p'ak'a wêra poree, pi–ia siete toiduupa uchiaruta, maap'eda p'ûajara k'oruta. 3 T'êepai p'ak'a wêra siete k'aitek'ee bee auk'a uchiajida. Mãgùùrã apemaarã p'ak'a wêraarã k'ait'a wãdap'eda, 4 k'o atapëijida ma p'ak'a wêraarã poree, pi–ia p'anadap'edaa.Mãgá k'ãimok'araap'eda, Faraón ârùmaji. 5 Mamîda taarã–e nùde waya k'ãidachi mãik'aapa awaraa k'ãimok'araaji. Unuji trigo k'arra aba chi k'â chak'e siete iru bù. Ma chaachaa pia chau nâbaji. 6 T'êepai unuji awaraa k'â chak'e siete uratù nâbù, chau–ee. 7 Mãgà k'â uratù beedapa chi pia chau p'anadap'edaa k'o atapëijida.
Mãpai Faraón ârùmak'ãri, k'awaaji ichia k'ãimok'araata bada. 8 Mamîda aù norema audú k'îsia nâbeeji ichia k'ãimok'araadade, k'awa–e bada perã k'ãata jara k'inia bù. Mapa jara pëiji jõma Egiptodepema k'îsia k'awaa beerã chedamerã. Chedak'ãri, Faraonpa nepùrùji ichia k'ãimok'araada. Mamîda apidaapa p'oyaa jarada–e paji k'ãata jara k'inia bù.
9 Mãga nùde chi vino teepataarã poro waibùapa José k'irãpaji mãik'aapa Faraonmaa mãgaji:
—Ârata mùa k'irãparuda aji, mùa ne–inaa k'achia ooda mù k'aripadamaa. 10 Mùchi Rey Waibùa, pù k'îrau bak'ãri mù ome mãik'aapa pan âpùpataarã poro waibùa ome, tai omé pëiji pù jâapataarã poro waibùamaa, irua tai carcelde t'ù nâbùmerã. 11 Mama p'anùde ewari aba p'ãrik'ua tai awara–awaraa k'ãimok'araajida. 12 Tai ome baji hebreo k'ûtrãa, pù jâapataarã poro waibùa esclavo. Irumaa nepùrùdak'ãri taipa k'ãimok'araadap'edaa, irua jaraji k'ãata jara k'inia bù ma chaachaa. 13 ¡Irua jaradak'a, auk'a uchiajida! aji. Mù nama waya mimiamaa beeji; jõdee chi apema otau jâ nâbùjida.
14 Mãga ûrik'ãri, aramata Faraonpa José carceldeepa atapiji. Josepa ichi idak'ara wêp'eda, p'aru ewaa t'õda jâ beeji. Maap'eda wãji Faraón k'îrapite.
15 Mãpai Faraonpa mãgaji:
—Mù k'ãimok'araajida aji. Mamîda apidaapa mùmaa p'oyaa jarada–e p'anù k'ãata jara k'inia bù. Ûrijida aji, pùa jarai, ma k'ãimok'araada k'awaak'ãri.
16 Mãpai Josepa mãgaji:
—Mùchi Rey Waibùa, mùchi k'îsiadoopa mùa p'oyaa jara–eda aji. Mamîda Tachi Ak'õrépata mù pari jarai.
17 Mãpai Faraonpa chi k'ãimok'araada Josemaa nepùrùji:
—K'ãimok'araade mù Nilo to ide ak'ùnâ bajida aji. 18 Toiduupa uchiajida p'ak'a wêraarã poree pi–ia siete. To idepema p'ûajara k'omaa p'aneejida. 19 Ma t'êepai awaraa p'ak'a wêraarã siete auk'a toiduupa uchiajida. Mamîda mãgùùrã k'aitek'ee p'anajida. Mùa Egipto eujãde waide unuk'aa p'ak'a mãgá audú k'aitek'ee. 20 Mãpai mãgà p'ak'a wêra k'aitek'ee beerãpa chi poree beeda k'o atapëijida. 21 Mamîda ma poree beerã k'odap'eda, auk'a k'aitek'ee p'aneejida.
’Mãpai mù ârùmaji. 22 Mamîda aù t'êepai waya k'ãidachi mãik'aapa nãga k'ãimok'araaji: Trigo k'arra abaade chi k'â siete pi–ia chau baji. 23 T'êepai awaraa k'â siete t'onojida. Mamîda mãgà uratù jêra baji oriente eerepema nãu wãsia p'ua badapa. 24 Mãpai ma uratù jêra bada k'âùrãpa k'o atapëijida chi pi–ia chau jêra bada. Ma jõmaweda mùa nepùrùji Egiptodepema k'îsia k'awaa beerãmaa. Mamîda apidaapa k'awada–e paji k'ãata jara k'inia bù.
25 Mãpai Josepa p'anauji:
—Mùchi Rey Waibùa, pùa k'ãimok'araada omeeweda auk'a jara k'inia bùda aji. Tachi Ak'õrepa mãga k'ãimok'araapiji k'awapiit'ee ichia ooit'ee bù. 26 Ma p'ak'a wêraarã poree pi–ia siete jara k'inia bù siete año. Auk'a jara k'inia bù chi trigo k'arra k'â siete pia chau jêra bada. K'ãimok'araada omeeweda auk'a jara k'inia bù. 27 Ma p'ak'a wêraarã k'aitek'ee siete jara k'inia bù awaraa siete año. Mamîda maapai audupai jarrajara paraait'ee. Auk'a jara k'inia bù chi trigo k'arra k'â siete uratù jêra bada oriente eerepema nãu wãsia p'uadapa.
28 ’Mùa jaradak'a ma k'ãimok'araada k'ap'ùa Tachi Ak'õrepa jaramaa bù ichia ooit'ee bù. 29 Siete años paru misa, Egipto eujãde chik'ora paraait'ee. 30 Maap'eda awaraa siete años wãyaaru misa, jarrajara paraait'ee. Mãga nùde apidaapa k'irãpada–e pait'ee sãga baji Egiptode chik'ora paraak'ãri, na eujã audú ãridariit'ee perã. 31 Audú jarra paraait'ee chik'o paraada k'îra atuadarutamaa. 32 Mùchi Rey Waibùa, pùa k'ãimok'araada omé k'ãimok'araajida aji, Tachi Ak'õrepa k'awapi k'inia bairã taarã–e wãara irua mãga p'asapiit'ee.
33 Ma awara Josepa mãgaji:
—Jùrùipia bùda aji, eperã poro wêsaa, k'îsia k'awaa bù irua Egipto eujã iru bapariimerã ichi jua ek'ari. Mãgá irua eperãarã mimiapiit'ee ne–inaa k'odait'ee iru p'anadamerã jarrajara pak'ãri. 34 Nãga ooipia bù. Eperãarã jùrùt'eraipia bù Egipto eujã jõmaade, trigo tau ùa p'e wãdamerã ma chik'o paraa misa. 35 Ma año chaachaa mãùrãpa p'edaipia bù ne–uu ewada ûk'uru ùa bùdait'ee p'uuru chaachaa. Mãgà trigo përé pait'ee. 36 Mãpai jarrajara paraak'ãri, ùa bùdap'edaadepema eperãarãpa k'odayada aji. Mãgá jarrapa piuda–e payada aji.
José Egipto eujãdepemaarã poro waibùa padaida
—¿Sãma unudayama aji, na eperãk'a, Tachi Ak'õre Jaurepa k'aripapari?
39 Mãpai Josemaa mãgaji:
—Pù k'ãyaara wê–eda aji, eperã k'îsia k'awaara bù na mimia oomerã, Tachi Ak'õrepa pù k'îsia k'awaapipari perã. 40 Maperã mùa pù na mimia poro waibùa bùit'ee. Jõmaarãta pù jua ek'ari p'anadait'ee, mùchi te pidaarã paara. Aba mùta pù k'ãyaara waibùara bait'ee Egiptodepema rey perã. 41 Idideepa mùa jara bùda aji, pù Egipto pidaarã poro waibùa.
42 Faraonpa mãga jara bùde ichi reydepema sortija êt'a ataji mãik'aapa José juade jâ bùji. Mãpai jaraji chi mimiapataarãpa Josemaa p'aru pi–ia jâpidamerã mãik'aapa cadena nêedee ooda jâpidamerã. 43 T'êepai José bataupiji ichi carreta t'êe wãpari carreta caballopa jidiupatade mãik'aapa jaraji Egipto pidaarã k'îrapite p'ùrrùamerã. Ichiaba jaraji Egipto pidaarã iru naa wãdamerã mãik'aapa biadamerã: “¡José carretade chewã wãyaapítù!”
Mãgá José poro waibùa paji Egipto eujãde.
44 Maap'eda Faraonpa Josemaa mãgaji:
—Mù Egiptodepema rey mîda, jõmaweda pù jua ek'ari p'anapataadait'eeda aji.
45 Faraonpa José Egiptodepema t'â bùji Zafenat Panea. Ma awara On p'uurudepema p'aare t'âjarapatap'edaa Potifera k'au Asenat jùrùteeji aù ome José miak'ãimerã. Mãgá José Egipto pidaarã ome pia beeji. 46 José treinta años iru baji Egipto pidaarã poro waibùa pak'ãri.
Maap'eda, Josepa Faraonmaa despediip'eda, Egipto eujã jõmaade p'ùrrùaji. 47 Ma naaweda siete años wãyaarude, ne–uu pia chaujida. 48 Mãga nùde Josepa trigo ewadap'edaa ùa wãpachi ma trigo eujã k'ait'a p'uuru beede. 49 Waibùa p'e wãji pi–ia chauda perã. Ma jõma p'oyaa chaada–e paji, p'usa idepema ipu nãusaak'a waibùa bada perã.
50 Ma jarrajara paraai naaweda, Josepa warra omé ooji chi wêra Asenat ome. 51 Chi naapema t'â bùji Manasésa ichia jarada perã: “Ârá Tachi Ak'õrepa mù miada mãik'aapa mùchideerã miadap'edaa k'îra atuapiji.” 52 Chi warra t'êepema t'â bùji Efraínb ichia jarada perã: “Tachi Ak'õrepa warra awaraa oopiji mùmaa mù miada eujãde.”
53-54 Ma chik'ora wãyaap'eda, jarrajara paraaji Josepa jaradak'a. Egipto k'ait'a bee eujãde jarra oopachida. Mamîda Egiptode nek'odait'ee paraaji. 55 Egipto pidaarãpa trigo ùadap'edaa jõ wãk'ãri, iidinajida Faraonmaa neto pëimerã iru–it'ee ùa bùdap'edaadepema.
Mãga nùde Faraonpa mãgaji Egipto pidaarãmaa:
—Wãdapáde aji, Josemaa mãik'aapa oodapáde aji, irua jara bùk'a.