Josepa k'awapida Egipto pidaarãpa k'ãimok'araadap'edaa
40
1 Ma t'êepai, taarã pak'ãri, Faraón jua ek'ari p'anadap'edaa vino teepataarã poro waibùapa mãik'aapa pan âpùpataarã poro waibùapa ãchi mimia pia ooda–e paji iru k'îrapite. 2 Maperã Faraón k'îraudachi ma vino teepataarã poro waibùa ome mãik'aapa ma pan âpùpataarã poro waibùa ome. 3 Mapa omeeweda pëiji rey jâapataarã poro waibùamaa carcelde t'ù nâbùnamerã José badamãi. 4 Ma jâapataarã poro waibùapa ma omeeweda José jua ek'ari bùji.5 Taarã pak'ãri, ewari aba p'ãrik'ua ãchi omeeweda k'ãimok'araajida. Mamîda k'awada–e paji ãchia k'ãimok'araada k'ãata jara k'inia bù. 6 Mapa tap'eda Josepa ãchi ak'ù chek'ãri, k'îsia paraa unu cheji.
7 Josepa iidiji:
—¿Sãap'eda parã k'îra pia–ee p'anùma? aji.
8 P'anaujida:
—Tai chaachaa k'ãimok'araajidada ajida. Mamîda k'awada–eda ajida, k'ãata jara k'inia bù taipa k'ãimok'araadap'edaa.
Josepa mãgaji:
—Tachi Ak'õrépata k'awapari eperãarãpa k'ãimok'araapata. Parãpa k'ãimok'araadap'edaa jaradapáde aji.
9 Mãpai ma vino teepataarã poro waibùapa nãga nepùrùji:
—Mùchi k'ãimok'araade mùa uva jâk'ara unujida aji. 10 Jua t'ai õpee iru baji. Ma jua wari wãde k'iru nep'ono ome t'onojida. Mãpai ma nep'onode uva waraajida. 11 Mùa Faraón copa mùchi juade iru baji. Mapa ma uva aùde juji. Maap'eda ma copa Faraonmaa teeji.
12 Mãpai Josepa mãgaji:
—Pùa k'ãimok'araada nãga jara k'inia bùda aji. Ma jua t'ai õpee jara k'inia bù k'ãima õpee. 13 K'ãima õpee parumaa Faraonpa pù k'irãpait'ee mãik'aapa waya bùit'ee pùchi mimiade. Waya pùa rey copa Faraonmaa teeit'ee naawedapemak'a. 14 Mãga pak'ãri, mù chupùria k'awáaji mãik'aapa pedéeji mù pari Faraonmaa, irua mù na carceldeepa uchiapimerã. 15 Hebreorã eujãdeepa k'achia beerãpa mù preso aneejidada aji. Mùa maarepida ne–inaa k'achia oo–e pajida aji, nama t'ù nâbùdamerã.
16 Pan âpùpataarã poro waibùapa ûri baji Josepa ma pedee pia jarak'ãri vino teepataarã poro waibùamaa. Mapa ichi k'ãimok'araada auk'a nepùrùji:
—Mùa nãga k'ãimok'araajida aji. K'oraa joot'ùda õpee pan t'orroo ome anipaji mùchi porode. 17 Chi ùt'ùpùara bada k'oraade paraaji pan k'û–ûa k'îra t'ãdoo Faraonmaa teeit'ee. Mamîda irumaa atee wãde ipanaarãpa ma pan ûk'uru k'ok'oo chejida.
18 Mãpai Josepa p'anauji:
—Pùa k'ãimok'araada nãga jara k'inia bùda aji. Ma k'oraa õpee jara k'inia bù k'ãima õpee. 19 K'ãima õpee parumaa Faraonpa pù k'irãpait'ee mãik'aapa pak'urude pù otau jâ nâbùpiit'eeda aji, âyapa jâadaimerã mãik'aapa ipanaarãpa pù chiara k'odamerã.
20 K'ãima õpee parumaa Faraón t'oda fiesta oojida ichi ek'ari beerã–it'ee. Mãga nùde Faraonpa ma vino teepataarã poro waibùa carceldeepa atapiji chi pan âpùpataarã poro waibùa ome. 21 Ma vino teepataarã poro waibùa waya bùji ichi mimiade. Mãgá ichia Faraonmaa waya vino teepachi naawedapemak'a. 22 Mamîda Faraonpa jaraji chi pan âpùpataarã poro waibùa pak'urude otau jâ nâbùdamerã. Mãgá Josepa jaradak'a uchiaji. 23 Mãgá chi vino teepari pia uchiaji mîda, irua k'îra atuadachi Josepa jarada, Faraonmaa chupùria iidimerã ichi pari.