Jacob ùadap'edaa
50
1 José baji chi ak'õre jai–idaak'ãri. Chi ak'õre k'ap'ùa piuda wëre atap'eda, k'îra ât'aaji mãik'aapa jêedachi. 2 T'êepai jaraji ichi jua ek'ari p'anadap'edaa Egiptodepema medicoorãmaa chi ak'õre Israel k'ap'ùa piuda ome oodamerã Egipto pidaarãpa ùadai naaweda oopatap'edaak'a. 3 Ãrapa oopatap'edaak'a k'ãima cuarenta taarãjida mãga oomaa p'anù. K'ãima setenta wãyaarude Egipto pidaarã chi–ùajida Israel–it'ee.4 Maap'eda Josepa mãgaji Faraón palaciodepemaarãmaa:
—Parãpa mù pia ak'ù p'anù pùrã, mù pari Faraonmaa nãga jaranadapáde aji: 5 “Mù ak'õre jai–idaai naaweda, mùmaa chupùria iidiji mùa ichi ùamerã Canaán eujãde chi chonaarã ùadap'edaamãi. Tachi Ak'õre Waibùa k'îrapite mùa mãga ooit'eeda aji. Mapa enenee nâbù pùa mù wãpimerã mù ak'õre ùade. Mãga oop'eda, waya cheit'eeda” aji.
6 Mãga nepùrùnadak'ãri, Faraonpa mãgaji:
—Wãpáde aji, pù ak'õre ùade pùa jaradak'a.
7-8 Mãgá José ichideerã ome, chi âpemaarã ãchideerã ome mãik'aapa Faraón palaciodepema poro waibùarã ûk'uru wãjida Canaandee iru ak'õre ùade. Ãchi warrarã, ne–animalaarã aupai Gosén eujãde atabëijida. 9 Awaraa eperãarã carretade mãik'aapa caballode auk'a wãjida José ome. Ãra chok'ara paji.
10 Jordán to oriente eere panadak'ãri trigo ãyaa atapatap'edaa chi edeepa Hatad apatap'edaamãi, jarajêejida Jacob–it'ee. Mama k'ãima siete wãyaarude José chi–ùaji.
11 Cananeorãpa mãga unudak'ãri, jarajida:
—Jã Egipto pidaarã t'ãri p'ua p'anùda ajida, eperã piuda chi–ùa p'anù perã.
Mapa ãra p'anadap'edaamãi t'â bùjida Abel Misrayin; jara k'inia bù “Egipto pidaarã chi–ùadap'edaamãi”.
12 Jacob warrarãpa oojida jõma irua jaradak'a oodamerã. 13 Iru k'ap'ùa piuda ateejida Canaán eujãdee mãik'aapa ùanajida Macpela mãu te uriade; Abrahampa netodamãi hitita pida Efrón juak'aawa, aùde ichi ëreerã ùadamerã. Ma eujã mãu te ome Mamré eujã oriente eere bù. 14 Chi ak'õre ùap'eda, José chi âpemaarã, chi k'õp'ãyoorã nipadap'edaarã ome waya Egiptodee chejida.
Josepa chi âpemaarãmaa jarada
15 Jacob ùadap'edaadeepa Egiptode pachedak'ãri, José âpemaarãpa k'îsia p'aneejida: “¿Josepa tachi k'îra unuamaa iru bai–epaa mãik'aapa tachi ome k'îra jõ–e bai–epaa, tachia iru k'achia oodap'edaa perã?” 16 Maperã Josemaa nãga jara pëijida: “Pù ak'õre jai–idaai naaweda, nãga jaraji 17 pùmaa jaradamerã: ‘Pù âpemaarã chupùria k'awaapáde aji, mãik'aapa ãrapa pùmaa k'achia ooda perdonaapáde’ aji. Mapa taipa pùmaa chupùria iidi k'inia p'anù pùa ma k'achia oodap'edaa perdonaamerã, ârá tai pù ak'õre Ak'õre Waibùa mimiapataarã perã.”
Ma jara chedap'edaarãpa pedee p'anù misa, José jêedachi.
18 Ma t'êepai chi âpemaarã ãchi k'ap'ùak'ù pachejida. Bedabaidap'eda tau bùùrù te jãde t'õbairutamaa, mãgajida:
—Nama p'anùda ajida. Tai pù esclavoorãda ajida.
19 Mamîda Josepa p'anauji:
—Waaweenaadapáde aji. Mù Tachi Ak'õre–e parãpa oopatap'edaa ak'ùmerã. 20 Parãpa mùmaa ne–inaa k'achia oo k'inia p'anajidada aji. Mamîda Tachi Ak'õrépata ma k'achia t'erabaiji pia uchiamerã. Irua oo k'inia baji tachia idi unu p'anù. Ma k'aurepa eperãarã chok'ara k'aripa k'inia baji chok'ai uchiadamerã. 21 Maperã waaweenaadapáde aji. Mùa at'ãri parãmaa mãik'aapa pãchideerãmaa chik'o teeit'ee.
Mãgá t'ãri pia pedeeda perã, chi âpemaarãpa k'awajida irua ãchimaa ne–inaa k'achia oo–e pait'ee.
José jai–idaada
22 José chi ëreerã ome Egipto eujãde p'aneejida. José ciento diez años baji na p'ek'au eujãde. 23 Ichi warra Efraín ãichak'eerã warrarã unuji.
Ma awara chi warra Manasés warra Maquir warrarã t'odak'ãri, mãgaji:
—Nãgà warrarã ichiaba mùchideerãda aji.
24 José chonaa pak'ãri, chi âpemaarãmaa mãgaji:
—Taarã–e nùde mù jai–idaait'eeda aji. Mamîda Tachi Ak'õrepa parã k'aripait'ee mãik'aapa na eujãdeepa waya ateeit'ee Canaán eujãdee; ma eujã irua jaradak'a teeit'ee Abrahammaa, Isaacmaa mãik'aapa Jacobmaa.
25 Mãpai jaraji ãrapa Tachi Ak'õre k'îrapite juraadamerã ichi ùadait'ee Canaán eujãde. Mãga juraajida.
Mãpai Josepa mãgaji:
—Wãara Tachi Ak'õrepa parã k'aripa cheit'eeda aji. Maapai mù bùùrù ateedapáde aji, parã ome auk'a, Canaandee wãdak'ãri.
26 José Egiptode jai–idaaji, ciento diez años iru bak'ãri. Egiptodepema medicoorãpa oojida ãchia oopatap'edaak'a chi k'ap'ùa piuda ome. Maap'eda ataudde ùa bùjida.