Judá chi ãigu Tamar ome
38
1 Maapai Judá chi âpemaarã ik'aawaapa ãyaa wãji. Banaji Adulán p'uurude, eperã t'âjarapatap'edaa Hirá tede. 2 Mama bùde wêra ataji; Canaán eujãdepema Súa k'au. 3 Ma wêra ome araa pak'ãri, biak'oo beeji mãik'aapa warra t'oji. Judapa t'â bùji Er. 4 Maap'eda waya biak'oo beeji mãik'aapa warra awaraa t'oji. T'â bùji Onán. 5 Maap'eda warra awaraa t'oji. T'â bùji Selá. Mãgà t'oji Judá Quezibde bak'ãri.6 Taarã pak'ãri, Judapa wêra jùrùteeji chi warra naapema Er–it'ee. Mãgà wêra t'âjarapachida Tamar. 7 Mamîda Tachi Ak'õrepa Er pia ak'ùk'aa paji, ichia k'inia bùk'a ooamaa bada perã. Mapa iru piupiji.
8 Maap'eda Judapa chi warra Onanmaa mãgaji:
—Araa papáde aji, pù âpema p'êtrãa ome, tachi auk'aarãpa oopatak'a. Mãgá pù âpemadeepa warrarã uchiadayada aji.
9 Mamîda Onanpa k'awaji ichia Tamar ome warrarã ooda paara ãchi auk'aarãpa oopatap'edaak'a, ma warrarã chi âpemadé pak'aji. Mapa ma p'êtrãa ome k'ãik'ãri, chi k'ayoo taawa bat'at'aapachi, biak'oonaamerã. 10 Tachi Ak'õrepa mãga unuk'ãri, k'îraudachi Onán ome mãik'aapa iru ichiaba piupiji.
11 Maap'eda Judapa chi ãigu Tamarmaa mãgaji:
—Pù ak'õre tede p'êtrãa beepáde aji, mù warra Selá k'ûtrãa paru misa. Mãpai irua pù atayada aji, chi wêra papiit'ee.
Mamîda ichi t'ãridepai Judapa k'îsiaji ma p'êtrãa k'aurepa chi warra auk'a piudariit'ee chi âpemaarãk'a. Mapa Tamar pëiji chi ak'õre temaa.
12 Taarã pak'ãri, Judá wêra, Súa k'au pada, piuji. Judá chi–ùa bap'eda, ewari aba wãji Timnat p'uurudee chi k'õp'ãyo Hirá ome. Mãgà Adulán p'uurudepema paji. Wãjida ãchi ovejaarã k'ara t'ùùpide. 13 Ma p'êtrãa Tamarpa k'awa atak'ãri chi chãure Timnatdee wã bù ovejaarã k'ara t'ùùpide, 14 chi p'aru p'êtrãarãpa jâpata êrat'aaji mãik'aapa prostituta p'aru jâ beeji. Mãpai k'îra wãk'apari jâp'eda, wãji Timnat ode Enayin p'uuru k'ait'a. Ma p'uuru t'îupata k'ait'a su–ak'ù banaji Judá nùmaa. K'awaji Judapa chi warra Selá ichimaa teeamaa baji, ma warra taarã k'ûtrãa baji mîda, ichi waide ata–e pada perã chi wêra papiit'ee.
15 Judá ma p'uuru k'ait'a panak'ãri, ma wêra unuji. Prostitutak'a unuda perã mãik'aapa k'awa–e pada perã mãgà chi ãigu, 16 Judá iru k'ait'a wãji mãik'aapa mãgaji:
—Mù pù ome k'ãipipáde aji.
Tamarpa p'anauji:
—¿K'ãata teeyama aji, pù ome k'ãiru pùrã?
17 Judapa p'anauji:
—T'êepai mùa chivo chak'e tee pëiit'eeda aji.
Ma wêrapa mãgaji:
—Pia bùda aji. Mamîda mùa k'inia bù pù net'aa mù ome atabëimerã. Mãgá mùa pù pedee wãara ijãai. Ma chivo chak'e tee pëik'ãri, pù net'aa auk'a tee pëiit'eeda aji.
18 Mãpai Judapa iidiji:
—¿K'ãata k'inia bùma? aji.
Wêrapa p'anauji:
—Teepáde aji, pùchi sello otaude jâ bù mãik'aapa jã pak'uru pùa anipapari.
Judapa mãga ooji. Ma wêra ome k'ãip'eda, biak'oo beeji. 19 T'êepai Tamar wãji ichi temaa mãik'aapa waya jâ beeji p'êtrãarãpa p'aru jâpata.
20 Maap'eda Judapa ma prostitutamaa chivo chak'e tee pëiji chi Adulán p'uurudepema k'õp'ãyo Hirá ome. Jaraji ichi net'aa atabëida ma wêra ome aneemerã.
—¿Sãma bùma aji, ma prostituta, o bide su–ak'ù bada Enayin p'uuru t'îupata k'ait'a?
Ãrapa p'anaujida:
—Nama mãgee wêra wê–eda ajida.
22 Judá k'õp'ãyo ãpùtee chek'ãri, mãgaji:
—Ma wêra unu–e pajida aji. Ma awara mãpema ùmùk'îraarãpa jarajida ma ode mãgee wêra wê–e.
23 Judapa p'anauji:
—Mãgara iru beeyada aji, mùchi net'aa ome, maa–e pùrã jõmaarãpa mù oo iru p'anadai, mùchi net'aa mãgee wêramaa teeda perã. Pùa k'awa bù ma chivo chak'e pëida ma wêramaa. Iru wê–e paji pùrã, tachi k'aurepa–eda aji.
24 Atane õpee parumaa nãga nepùrù chejida Judamaa:
—Pù ãigu Tamar biak'oo bùda ajida. ¿Ùmùk'îraarã ome k'ãi baji–ek'ã? ajida.
Judapa p'anauji:
—Mãgara atanadapáde aji, mãik'aapa paa peet'aadapáde aji.
25 Mamîda atanadak'ãri, Tamarpa chi chãuremaa nãga jara pëiji: “Nãgà net'aa chiparipa mù biak'oopit'aajida aji. Pia ak'ùpáde aji, na sello otaude jâ nipapari na ovejaarã ak'ùpari pak'uru ome k'awaait'ee k'ai paji.”
26 Judapa ma net'aa unuk'ãri mãik'aapa ichidé k'awaak'ãri, mãgaji:
—Irua k'achia oo–e pajida aji. Mùata k'achia ooji, mù warra Selá irumaa tee–e pada perã.
Maap'eda Judá waa k'ãi–e paji chi ãigu ome.
27 Tamarpa warra t'ok'ãri, ùmùk'îra warra omé t'oji. 28 T'ok'ãri, naapùara jua aba uchiaji. Mãga bùde arii bada parterapa jâk'ara p'oree ma juade jâ bùji k'awadait'ee k'aita chi naapema. 29 Mamîda t'êepai ma jua waya t'îudachi mãik'aapa chi apema warra naapùara uchiaji. Mapa ma parterapa jaraji:
—Irua o ewajida aji, naapùara uchiait'ee.