Esaudeepa uchiadap'edaarã
36
1 Nãgà eperãarã Esaudeepa uchiajida; iru ichiaba t'âjarapachida Edom.2 Esaú Canaán eujãdepema wêraarã ome miak'ãiji: hitita Elón k'au Ada ome; heveo Zibeón warra Aná k'au Aholibama ome 3 mãik'aapa Ismael k'au Basemat ome. Mãgà wêra Nebayot âpewêra paji.
4 Chi wêra Ada ome Esaupa Elifaz ooji. Chi wêra Basemat ome Reuel ooji. 5 Jõdee chi wêra Aholibama ome ooji Jeús, Jalán mãik'aapa Coré.
Mãùrã Esaudeepa uchiadap'edaarã paji. Mãùrã t'ojida Esaú Canaán eujãde bak'ãri.
6 T'êepai Esaú ichi wêraarã ãchi warrarã ome, k'aurã ome, ãchi ome p'anapatap'edaarã paara awaraa eujãdee wãjida Jacob bapariidamãiipa t'ùmà. Ichi ome ateeji chi ne–animalaarã mãik'aapa net'aa jõmaweda irua atada Canaán eujãde bak'ãri. 7 Esaupa ne–animalaarã cho–k'ara p'e iru baji; Jacobpa auk'a. Maperã abaamãi p'oyaa p'anadak'aa paji, ma ne–animalaarã cho–k'ara–it'ee p'ûajara waibùa wê–e pada perã. 8 Maperã Esaú, ichiaba t'âjarapatap'edaa Edom, wãji Seír ee jêra bùmaa. Mama p'aneejida.
9 Edom eujãdepemaarã Esaudeepa uchiajida. Ma eperãarã p'anapachida Seirde, ee jêra bùmãi. 10 Esaupa Elifaz ooji chi wêra Ada ome mãik'aapa Reuel ooji chi wêra Basemat ome.
11 Chi warra Elifazdeepa uchiajida Temán, Omar, Zefo, Gatán mãik'aapa Quenaz.
12 Mãùrã Esaú wêra Adadeepa uchiadap'edaarã paji.
Elifazpa wêra k'ãipari iru baji. T'âjarapachida Timná. Ma wêra ome Amalec ooji.
13 Chi warra Reueldeepa uchiajida Najat, Zera, Sama, Mizá. Mãùrã Esaú wêra Basematdeepa uchiadap'edaarã paji.
14 Chi wêra Aholibama ome Esaupa ooji Jeús, Jalán mãik'aapa Coré. Ma Aholibama Aná k'au mãik'aapa Zibeón ãichak'e paji.
15 Esaudeepa eperãarã poro waibùarã uchiajida.
Chi warra naapema Elifazdeepa nãgà poro waibùarã uchiajida: Temán, Omar, Zefo, Quenaz, 16 Coré, Gatán mãik'aapa Amalec.
Mãùrã jõmaweda Esaú wêra Adadeepa uchiadap'edaarã paji. Ãra Edom eujãde p'anapachida.
17 Esaú warra Reueldeepa uchiajida nãgà poro waibùarã: Najat, Zera, Sama, mãik'aapa Mizá. Ma Reueldeepa uchiadap'edaa poro waibùarã jõmaweda Esaú wêra Basematdeepa uchiadap'edaarã paji.
18 Aná k'au Aholibamadeepa nãgà poro waibùarã uchiajida: Jeús, Jalán mãik'aapa Coré.
19 Ma poro waibùarã jõmaweda Esaú, ichiaba t'âjarapatap'edaa Edomdeepa uchiadap'edaa ëreerã poro waibùarã paji.
20 Horeo, Seír apatap'edaa ma eujãde bapachi, Esaú mamaa wãk'ãri. Ma Seirdeepa uchiajida Lotán, Sobal, Zibeón, Aná, 21 Disón, Ezer mãik'aapa Disán. Mãùrã horeorã poro waibùarã paji, Seirdeepa uchiadap'edaa Edom eujãde.
22 Seír warra Lotandeepa uchiajida Horí mãik'aapa Homán. Lotanpa âpewêra iru baji. T'âjarapachida Timná.
23 Seír warra Sobaldeepa uchiajida Alván, Manajat, Ebal, Sefó mãik'aapa Onam.
24 Chi warra Zibeondeepa uchiajida Ayá mãik'aapa Aná. Eujã pania wêe bùde Anapa chi ak'õre Zibeón burroorã ak'ù bù misa, pania poátrù uchia bù unu ataji.
25 Anadeepa uchiajida chi warra Disón mãik'aapa k'au aba, t'âjarapatap'edaa Aholibama.
26 Chi warra Disondeepa uchiajida Hemdán, Esbán, Itrán mãik'aapa Querán.
27 Chi warra Ezerdeepa uchiajida Bilán, Zaván mãik'aapa Acán.
28 Chi warra Disandeepa uchiajida Uz mãik'aapa Arán.
29 Mãùrã horeorã poro waibùarã paji. Ma Lotán, Sobal, Zibeón, Aná, 30 Disón, Ezer mãik'aapa Disán ëreerã awara–awaraa poro waibùarã paji Seír eujãde.
Edom eujãdepema reyrã
(1 Crónicas 1. 43-54)
31 Israelitaarãpa rey iru p'anadai naaweda, nãgà reyrã paraaji Edom eujãde.
32 Beor warra Bela rey pak'ãri Edomde, chi p'uuru waibùa Dinaba apachida.
33 Ma rey Bela piuk'ãri, ichi pari Bosra p'uurudepema Zera warra Jobab rey beeji.
34 Ma rey Jobab piuk'ãri, Temán eujãdepema Jusán rey beeji.
35 Ma rey Jusán piuk'ãri, Bedad warra Hadad rey beeji. Mãgùpa Madián pidaarã p'oyaaji Moab eujãde. Rey Hadad p'uuru waibùa Avit apachida.
36 Ma rey Hadad piuk'ãri, Masreca p'uurudepema Samla rey beeji.
37 Ma rey Samla piuk'ãri, Rejobot p'uuru to ide badadepema Saúl rey beeji.
38 Ma rey Saúl piuk'ãri, Acbor warra Baal Janán rey beeji.
39 Ma rey Baal Janán piuk'ãri, Pau p'uurudepema Hadad rey beeji. Hadad wêra Mezab warra Matred k'au paji. T'âjarapachida Mehitabel.
40 Nãgà ëreerã Esaudeepa uchiajida: Timná, Alvá, Jetet, 41 Aholibama, Elá, Pinón, 42 Quenaz, Temán, Mibzar, 43 Magdiel mãik'aapa Iram; mãgà ëreerã.
Esaú ichiaba t'âjarapachida Edom. Chi ëreerã Edom eujãde awara–awaraa p'anapachida mãik'aapa mãgùùrã ãchi poro waibùarã paji.