Jacob Betelde banada
35
1 Maap'eda Tachi Ak'õrepa Jacobmaa mãgaji:—Betelde banapáde aji. Mama mù–it'ee altar oopáde aji, mama mùa pùmaa unupida perã, Esaú waaweepa pù jirabodok'ãri.
2 Mãpai Jacobpa mãgaji ichideerãmaa mãik'aapa ichi ome nipapatap'edaarãmaa:
—Net'aa aù k'îrapite ùt'aa t'âpata iru p'anù pùrã, aneedapáde aji. Maap'eda parã k'uidapáde aji, mãik'aapa p'aru ewaa t'õda jâ p'aneedapáde aji, 3 tachi Beteldee wãdait'ee perã. Mama mùa Tachi Ak'õre unuji na eujãdeepa uchiak'ãri. Maperã mùa mama altar ooit'ee iru–it'ee. Irua mù wãru chaa k'aripapari mãik'aapa mù k'îsia nâbak'ãri, t'ãri o–îapipari.
4 Jacobpa jaradak'a net'aa aù k'îrapite ùt'aa t'âpata jõmaweda irumaa aneejida, ãchi k'ùùrùdeepema jâpatap'edaa paara. Jacobpa ma jõma jau nâbùji pak'uru ùt'ùa bù jua ek'ari Siquén p'uuru k'ait'a. 5 Jacob mamãik'aapa uchiak'ãri ichi ome nipapatap'edaarã ome, ãra k'ait'a p'anadap'edaa p'uuru pidaarãpa maarepida k'achia ooda–e paji mãik'aapa Jacob warrarã t'êe wãda–e paji, ãra audú waawee p'anadap'edaa perã.
6 Mãgá panajida Canaán eujãdepema Luz p'uurude. Mãgà p'uuru ichiaba t'âjarapachida Betel. 7 Mama Jacobpa altar ooji Tachi Ak'õre–it'ee mãik'aapa ma punto t'â bùji El Betel, mama Tachi Ak'õre unuda perã jirabodok'ãri chi âpema waaweepa.
8 Mama p'anùde Raquel ak'ùpari Débora jai–idaaji. Pak'uru ùt'ùa bù ek'ari ùajida Betel p'uuru k'ait'a. Jacobpa ma pak'uru bùmãi t'â bùji Elón Bacuta.
9 Jacob Padán Aram eujãdeepa chek'ãri, Tachi Ak'õrepa waya ichi unupiji mãik'aapa na pedee pia jaraji:
10 —Pù t'âjarapatada aji, Jacob. Mamîda waa mãga t'âjarada–e pait'ee. Ârawedadeepa pù t'âjarapataadait'eeda aji, Israel.
Maap'eda Tachi Ak'õrepa mãgaji:
11 —Mùta Jõmaarã Ak'õre Waibùada aji. Warra chok'ara oopáde aji, pùdeepa uchiadait'eerã chok'ara paraamerã. Pùdeepa uchiadait'ee p'uuru chok'ara, reyrã paara. 12 Na eujã mùa Abrahammaa mãik'aapa Isaacmaa teeda ichiaba tee bù pùmaa mãik'aapa pùdeepa uchiadait'eerãmaa.
13 Mãga jarap'eda, Tachi Ak'õre wãji.
14 Mãpai Jacobpa mãu choma mama bainâ bùji mãik'aapa aceite vino ome weeji ma mãu ârù awara bùit'ee Tachi Ak'õre–it'ee. Mãgá ooji k'irãpait'ee Tachi Ak'õre ichi ome pedeedamãi. 15 Jacobpa ma mãu badamãi t'â bùji Betel.
Raquel jai–idaada
16 T'êepai Beteldeepa chewã nipajida. Ma ode chewãdade Efrata p'uuru k'ait'a Raquel biak'oo bada, warra t'oji. Mamîda t'oit'ee audú taarãji.
17 Warra t'o wãk'ãri, chi parterapa Raquelmaa mãgaji:
—Waaweenaapáde aji, ùmùk'îra warra awaraa t'oda perã.
18 Mamîda Raquelpa choo–e paji. Juak'aya bak'ãri, chi warra t'â bùji Benoní.b Mamîda t'êepai Jacobpa t'â bùji Benjamín.c
19 Mãgá Raquel jai–idaaji. Efrata ot'a ùajida. Ma Efrata p'uuru ârá t'âjarapata Belén. 20 Raquel ùadap'edaamãi Jacobpa mãu bainâ bùji chi wêra ùadamãi k'irãpadamerã. Ma mãu at'ãri unupata irua bainâ bùdamãi.
21 Israel ichi ome nipapatap'edaarã ome waawí wãdap'eda, torre Éder k'ait'a p'aneejida. 22 Mama p'anùde chi warra naapema Rubén Jacob wêra k'ãipari Bilhá ome k'ãiji. Jacobpa mãga k'awa atak'ãri, k'îraudachi.
Jacobdeepa uchiadap'edaarã
Jacobpa warrarã doce iru baji.
23 Lea ome ooji chi naapema Rubén; maap'eda Simeón, Leví, Judá, Isacar mãik'aapa Zabulón.
24 Raquel ome ooji José mãik'aapa Benjamín.
25 Raquel esclava Bilhá ome ooji Dan mãik'aapa Neftalí.
26 Lea esclava Zilpá ome ooji Gad mãik'aapa Aser.
Mãùrã paji chi warrarã t'odap'edaa Padán Aram eujãde.
Isaac jai–idaada
27 Mãgá wãjida Mamredee, chi ak'õre Isaac badamaa. Mãgà p'uuru ichiaba t'âjarapachida Arbá maa–e pùrã Hebrón. Mama p'anapachida Abraham, maap'eda Isaac. 28-29 Mama p'anùde Isaac chonaa bada perã, jai–idaaji. Isaac jai–idaak'ãri, ciento ochenta años iru baji. Mama Esaupa Jacob ome ãchi ak'õre Isaac ùajida.