Jacob warrarã k'îrau p'anadap'edaa
34
1 Leapa Jacob ome k'au ooda t'âjarapachida Dina. Jamor eujãde p'anùde Dina wãji te k'ait'a beemaa awêraarãmaa p'asiade. 2 Mamîda ma wãde ma eujãdepema poro waibùa, heveo Jamor warra Siquén ome unudak'ãri, Dinapa k'iniaamaa bùta k'ãiji aù ome. Maperã Dina k'îra nejasia beeji. 3 Mãga ooji mîda, ma Siquenpa Dina k'inia iru baji mãik'aapa pedeetee k'inia baji miak'ãidait'ee.4 Mãga nùde ma k'ûtrãa wãji chi ak'õre Jamormaa mãik'aapa mãgaji:
—Wãpáde aji, ma awêra ak'õremaa iru iidide mù–it'ee. Iru ome miak'ãi k'inia bùda aji.
5 Jacobpa k'awa ataji chi k'au ome p'asada. Mamîda chi warrarãmaa maarepida jara–e paji, mêe nipadap'edaa perã ãchi ne–animalaarã ome. 6 Mãga nùde Siquén ak'õre Jamor wãji Jacobmaa iru ome pedeede ma awêra k'ap'ùa pari.
7 Mamîda Jacob warrarã teedaa chedak'ãri mãik'aapa k'awa atadak'ãri ãchi âpewêra ome p'asada, k'îraudachida. Ma eperãpa ooda audú k'achia baji israelitaarã–it'ee, ãrapa mãga oodak'aa pada perã.a
8 Mamîda Jamorpa ãchimaa mãgaji:
—Mù warra Siquenpa parã âpewêra k'inia iru bùda aji. Iru ome miak'ãipidapáde aji. 9 Mãgá parã tai ome ëreerã p'aneedai mãik'aapa tai parã k'aurã ome miak'ãidai. Jõdee parã tai k'aurã ome miak'ãidai. 10 Na eujãde tai ome p'aneedapáde aji. Eujã neto atadapáde aji, mãik'aapa nama pãchia oo k'iniata oodapáde aji.
11 Ichiaba Siquén ichi k'ap'ùak'ù pedeeji.
—Mù chupùria k'awaadapáde aji. Parãpa iidirutata mùa teeit'ee. 12 Wêra–it'ee p'aapata ârù iidiruta pùrã, pia bùda aji. Net'aa k'inia p'anù pùrã, teeyada aji. Aba mùa k'inia bùda aji, mù miak'ãipidamerã parã âpewêra ome.
13 Mãga jaraji mîda, Siquenpa ma k'achia ooda perã ãchi âpewêra ome, Jacob warrarãpa iru unuamaa iru p'anajida.
Mapa irumaa mãik'aapa chi ak'õre Jamormaa seewa jarajida:
14 —Tai âpewêra p'oyaa teeda–eda ajida, ùmùk'îra tauchaa wêe bùmaa. Mãgee ùmùk'îra ome miak'ãipiruta pùrã, Tachi Ak'õre k'îrapite k'îra nejasia p'aneedai. 15 Aba teedayada ajida, parã taik'a p'aneeruta pùrã; tauchaa bùpiruta pùrã parã ùmùk'îraarã jõmaarã k'ap'ùade. 16 Mãga ooruta pùrã, parãpa tai k'aurã atadai. Jõdee taipa parã k'aurã ichiaba atadai. Mãgá parã t'ãide p'uuru apai p'anapataadai. 17 Mamîda pãchi ùmùk'îraarã k'ap'ùade tauchaa bùdaamaa p'anù pùrã, mãgara tai namãik'aapa wãdait'eeda ajida, tai âpewêra ome.
18 Jamorpa chi warra ome ijãajida. 19 Aramata chi k'ûtrãapa tauchaa bùpiji ichi k'ap'ùade, Jacob k'au audú k'inia bada perã.
Ma p'uurudepemaarãpa Siquén pipùara ak'ùdap'edaa perã Jamor warrarã apemaarã k'ãyaara, 20 iru wãji chi ak'õre ome ãra ome pedeede ma p'uuru t'îupatap'edaamãi. Mama ichita pedeepachida jõmaarãmaa ne–inaa jara k'inia p'anadak'ãri.
Jõmaarã taide mãgajida:
21 —Jãgà ùmùk'îraarã tachi k'õp'ãyoorãda ajida. Na eujãde p'anapataadait'ee mãik'aapa negocio oodait'ee nama tachi ome. Na eujã waibùa bairã, tachi jõmaweda araadai. Ãra p'aneeruta pùrã, tachia ãra k'aurã atadai mãik'aapa ãrapa tachi k'aurã atadai. 22 Mamîda ãra ome p'uuru a–pai p'anadait'ee, ãrapa k'inia p'anù tachi ùmùk'îraarãpa tauchaa bùpidamerã tachi k'ap'ùade, ãrapa oopatak'a. 23 Mãga ooruta pùrã, ãra net'aa ne–animalaarã ome tachidé p'aneedai. Aba oodaipia bù ãrapa jara p'anùk'a. Mãpai ãra tachi ome na eujãde p'aneedait'eeda ajida.
24 Ma p'uurudepemaarã jõmaarãpa Siquén pedee ijãajida. Mãpema ùmùk'îraarã jõmaarãpa tauchaa bùpijida ãchi k'ap'ùade. 25 Mãga oojida mîda, Jacob warrarã Simeón Leví ome at'ãri ma eujãdepemaarã k'îra unuamaa iru p'anajida, Siquenpa ãchi âpewêra ome k'achia ooda perã. Mapa k'ãima õpee parumaa ma tauchaa bùpidap'edaarã p'uapa at'ãri k'ap'ùa t'ûmaa jõnùde, Simeón Leví ome mãùrã jõmaweda peek'oo wãjida espadapa. 26 Ichiaba peejida Jamor chi warra Siquén ome. Mãpai ãchi âpewêra Dina Siquén tedeepa atadap'eda, jirabodojida. 27 Mãga nùde Jacob warrarã apemaarã ma p'uurude pachejida. Ma eperãarã k'ap'ùa piuda unudak'ãri, ãchi net'aa p'e ata wãjida, k'îra jõda–ee p'anadap'edaa perã ãchi âpewêra ome p'asada k'aurepa. 28 Atadachida ovejaarã, p'ak'aarã, burroorã, mãik'aapa net'aa jõmaweda unudap'edaa ma p'uurude mãik'aapa ma p'uuru k'ait'a beeda paara. 29 Ma p'uurudepemaarã net'aa jõmaweda chùa atadachida mãik'aapa mãpema wêraarã warrarã ome ateejida.
30 Jacobpa mãga k'awa atak'ãri, mãgaji Simeonmaa mãik'aapa Levimaa:
—Parã k'aurépata mù k'achiade baaiit'eeda aji. Ma oodap'edaa k'aurepa cananeorãpa ferezeorã ome mù k'îra unuamaa iru p'anapataadait'ee. Pedeeteedait'ee mù ome chõodait'ee mãik'aapa ma–it'ee chedak'ãri, tachi jõmaweda peek'oodait'eeda aji, tachi chok'ara–ee p'anadairã.
31 Mamîda Jacob warrarãpa p'anaujida:
—¿Pia bajik'ã ajida, jãgùpa tai âpewêra atamerã prostituta atapatak'a?