Jacob Esaú ome t'ãri auk'a bùdap'edaa
33
1 Aù norema Jacobpa chi âpema unuk'ãri cuatrocientos eperãarã ome cheruta, ãchobeedachi. Chi warrarã ãchi naweerã ome t'ooji, mãgá awara–awaraa wãdamerã. 2 Naapùara pëiji chi esclavoorã ãchi warrarã ome. Maap'eda Lea pëiji ichi warrarã ome mãik'aapa t'êe pëiji Raquel, José ome. 3 Mãpai ichi ãra naa wãji chi âpema k'îrachuude. Esaú k'ait'a pak'ãri, Jacob bedabaidachi tau bùùrù eujãde t'õbairumaa. Bedabaida siete mãgá bedabaidachi.4 Mamîda Esaú p'iraji chi âpemamaa mãik'aapa o–îadachida. Wëre atadap'eda, o–îapa jêedachida. 5 Maap'eda Esaupa unuk'ãri Jacob wêraarã ãchi warrarã ome, iidiji:
—¿Jãgùùrã, k'áirãma? aji.
Jacobpa p'anauji:
—Mù pù mimiapari. Jãgùùrã mù warrarãda aji, Tachi Ak'õrepa teeda.
6 Mãpai ma esclavaarã ãchi warrarã ome k'ait'a chedap'eda, bedabaidachida tau bùùrù eujãde t'õbairutamaa. 7 T'êepai Leapa ichi warrarã ome auk'a oojida. Maap'eda Raquelpa José ome auk'a oojida.
8 Mãpai Esaupa iidiji:
—¿K'ãata k'îsia iru bùma aji, ooit'ee ma ne–animalaarã chok'ara mùmaa pëida ome?
Jacobpa p'anauji:
—Pùmaa teeit'eeda aji, k'awamerã tai pù ome k'ãiwee p'anapataadait'ee.
9 Mãpai Esaupa mãgaji:
—Mãga–eda aji, âpema. Mùa iru bùda aji, mùchideerã–it'ee. Beepáde aji, përeerã ome.
10 Mamîda Jacobpa p'anauji:
—Mù chupùria k'awaapáde aji. Pùa mù pia ak'ù bù pùrã, atáji mùa tee k'inia bù. Pù nãgá t'ãri o–îa unuk'ãri, mù–it'ee Tachi Ak'õre ome unu pùk'a baji. 11 Mapa k'inia bù pùa jã ne–animalaarã pùchi–it'ee atamerã. Mùa maarepida falta–e bù, Tachi Ak'õrepa mù p'arat'ara papida perã.
—Wãdáma aji. Mù parã naa wãit'eeda aji.
13 Jacobpa p'anauji:
—Âpema k'inia, pùa k'awa bùda aji, warrarã p'oyaa isapai nipadak'aa. Ma awara mùa pia ak'ùipia bù na p'ak'aarãpa ovejaarã ome ãchi warrarã jutopi wãruta perã. Audú isapai wãruta pùrã, ewari abaade ovejaarã piuk'oodayada aji. 14 Mù naa wãpáde aji. Mù pù mimiapari. Piak'ãa chedait'ee warrarã k'aurepa mãik'aapa ne–animalaarã k'aurepa. Seirde unudayada aji.
15 Esaupa p'anauji:
—Pia bùda aji. Mù ome nipapataarã ûk'uru atabëiyada aji, parã k'aripadamerã.
Mamîda Jacobpa mãgaji:
—Mãga–eda aji. K'îsianaapáde aji.
16 Ma ewateweda Esaú ãpùtee wãji ichi temaa Seirde. 17 Jõdee Jacob banaji Sucot p'uuru k'ait'a. Mama te pak'uru juadee ooji ichi–it'ee, chi ne–animalaarã–it'ee paara. Maperã ma p'uuru t'â bùjida Sucot.a
18 Mamãik'aapa banaji Canaán eujãdepema Siquén p'uuru k'îrapite. Mãgá Tachi Ak'õrepa iru Padán Aram eujãdeepa k'ap'ùa pia aneeji. 19 Mama Canaande eujã neto ataji cien p'arat'a tau pari eperã Siquén ak'õre t'âjarapatap'edaa Jamor juak'aawa. Mama p'aneejida. 20 T'êepai mama altar ooji Tachi Ak'õre–it'ee. T'â bùji “Tachi Ak'õre Waibùa Israel Ak'õre Waibùa”.