Jacob ichi eujãdee chewãde Esaú ome unuda
32
1 Mãgá Jacob ichi tedepemaarã ome chejida. Chewãdade angeleerãpa ãchi unupijida Jacobmaa.2 Jacobpa ãchi unuk'ãri, mãgaji:
—Nãgùùrã ùt'aripema soldaorãda aji, chedap'edaa tachi k'aripadait'ee.
Mapa ma unudamãi t'â bùji Majanayin; jara k'inia bù “ejército omé”.
3 Canaán eujã k'ait'a pachedak'ãri, Jacobpa ichi mimiapataarã pëiji Seirdee, mãgà Edom eujãde bù, ichi cheru jaradamerã chi âpema Esaumaa. Mãgaji:
4 —Mùchi waibùa Esaumaa nãga jaradapáde aji: “Pù mimiapari Jacobpa pùmaa nãga jara pëi bù: ‘Mù Labán ome taarã baji. 5 Iru bù p'ak'aarã, burroorã, ovejaarã, esclavoorã. Mùa pùmaa nãga jara pëiru tachi omeeweda pia p'anadamerã.’ ”
6 Irua jaradak'a jaranajida.
Maap'eda pachedak'ãri, mãgajida:
—Wãjidada ajida, jarade pù âpema Esaumaa. Âraweda cheruda ajida, cuatrocientos ùmùk'îraarã ome.
7 Mãga ûrik'ãri, Jacob ãchobeedachi, Esaú chõode cheru jîak'aapa. K'îsia nâbap'eda, t'ook'ooji chi wêraarã ãchi warrarã ome, ne–animalaarã ome, awara–awaraa para bamerã. 8 K'îsiaji: “Esaú chõo cheru pùrã, t'ooda abaadepemaarã ome chõo bù misa, t'ooda awaraadepemaarã erreu wãdai.”
9 Maap'eda Tachi Ak'õremaa nãga ùt'aa t'âji:
—Aai, Tachi Ak'õre, pùta mù ak'õchona Abraham, mù ak'õre Isaac Ak'õre Waibùa. Pùata jaraji mùchi eujãdee mãik'aapa mùchi temaa wãmerã. Pùta mù ome bait'eeda aji, mãik'aapa mù pia ak'ùit'eeda aji. 10 ¿K'aima mù, pùa mù nãgá k'aripamerã? Mù pù mimiapari. Pùa oopi bùk'a oopariit'ee. Na to sîak'ãri Jarandee wãde, mù oveja ak'ùpari pak'uru aupai ateeji. Mamîda ârá pù k'aurepa mùa eperãarã chok'ara iru bù, net'aa, ne–animalaarã paara. 11 Mù chupùria k'awáaji. Mù âpema Esaú juadeepa k'aripáji waawee bairã mù ome chõo cheru pùrã, tai jõmaweda, mù, mùchi wêraarã warrarã ome peek'oodai. 12 Pùa jarajida aji, mù pia ak'ù bapariit'ee mãik'aapa mùdeepa uchiadait'eerã cho–k'ara îwapiit'ee. P'oyaa juasiada–e pait'eeda aji, ipu tau nãusaak'a p'anadait'ee perã.
13 Ma p'ãrik'ua Jacob mama k'ãiji mãik'aapa ichi ne–animalaarãdepema nãgùùrã jùrùt'eraji chi âpemamaa tee pëiit'ee: 14 cabra doscientos, chivo veinte, oveja wêra doscientos, oveja ùmùk'îra veinte, 15 camello wêra treinta chi chak'eerã ome, p'ak'a wêra cuarenta, p'ak'a ùmùk'îra diez, burro wêra veinte, burro ùmùk'îra diez. 16 Ma t'êepai ma ne–animalaarã teeji chi mimiapataarãmaa, awara–awaraa ichi naa ateedamerã. Mãgaji:
—Mù naa wãdapáde aji, mãik'aapa ne–animalaarã awara–awaraa ateedapáde aji.
17 Jacobpa mãgaji chi mimiapari naapùara pëidamaa:
—Mù âpema Esaú ome unuk'ãri, irua pù chipari t'â iidiit'eeda aji. Ichiaba iidiit'ee k'aide na ne–animalaarã mãik'aapa sãmaa wãru nãgà ome. 18 Mãga iidik'ãri, nãga p'anauipia bù: “Mùchi poro waibùa Esaú, pùchi mimiapari Jacobpa na ne–animalaarã pùmaa tee pëiji. Iru tai t'êe cheru.”
19 Apema mimiapataarã t'êe wãdait'eerãmaa mãgaji:
—Esaú ome unudak'ãri, auk'a jaradapáde aji, 20 mùa naapùara pëidamaa jaradak'a: “Pùchi mimiapari Jacob tai t'êe cheru.”
Mãga ook'ãri, Jacobpa k'îsiaji: “Mùa pëida ak'ùk'ãri, iru audú k'îrau–e pait'ee. Mãpai mù ome unuk'ãri, ¿mù auteebai–epaa?” 21 Mãga ooji. Ma ne–animalaarã iru naa pëiji. Jõdee iru mama beeji k'ãiit'ee.
Jacob chõoda Tachi Ak'õrepa ángel pëida ome
22-23 Ma p'ãrik'ua Jacobpa pëiji chi wêraarã ãchi warrarã ome mãik'aapa ichi net'aa iru bada paara Jaboc to k'îraik'a eere. 24 Ichi ituaba t'êe beeji. Mãga nùde eperã aba chep'eda, Jacob ome chõomaa beeji tap'eda parumaa. 25 Mamîda Jacobpa p'oyaa wãk'ãri, ma eperãpa Jacob mak'ara golpe sît'aaji. Mãgá Jacob bùùrù nùk'anùk'aadachi.
26 Mãpai ma eperãpa mãgaji:
—Mù k'ena pëipáde aji, tap'eda paru perã.
Mamîda Jacobpa p'anauji:
—Mùa pù k'ena pëi–eda aji, pùa mùmaa pedee pia jara–emãi.
27 Mãpai ma eperãpa iidiji:
—Pù ¿k'asaa t'âjarapatama? aji.
Jacobpa p'anauji:
—Mù t'âjarapatada aji, Jacob.
28 Mãpai ma eperãpa mãgaji:
—Idideepa waa pù t'âjarada–e pait'eeda aji, Jacob. T'âjarapataadait'eeda aji, Israela nama Tachi Ak'õre ome chõoda perã mãik'aapa eperãarã p'oyaada perã.
29 Mãpai Jacobpa iidiji:
—¿Pàrama? ¿K'asaa t'âjarapatama? aji.
Mamîda ma eperãpa p'anauji:
—¿Sãap'eda mù t'â iidi bùma? aji.
Mãpai ma eperãpa Jacobmaa pedee pia jaraji. 30 Mãgá Jacobpa k'awaji Tachi Ak'õre ome chõoda mãik'aapa ma chõo p'anadap'edaamãi t'â bùji Penuelb mama ichia jarada perã: “Mùa Tachi Ak'õre unuji mù k'îrapite. Mamîda piu–e paji.”
31 Ak'õrejîru ewaa uchiak'ãri, Jacob wãji. Mamîda piak'ãa nipaji, ichi mak'ara p'ua bada perã.
32 Maperã Israeldeepa uchiadap'edaarãpa ne–animalaarã mak'aradepema k'îu k'odak'aa, Tachi Ak'õrepa mama Jacob k'ap'ùa p'ua ooda perã.