Jacob ichi wêraarã ome pedeeteeda
31
1 Maapai Jacobpa k'awaji Labán warrarãpa nãga jara nipapatap'edaa: “Jacobpa tai ak'õre net'aa jõmaweda jãri ata wãpa p'arat'ara baparida” apachida. 2 Ma awara Jacobpa unuji chi chãurepa ichi pia ak'ù–e bù naawedapemak'a.3 Mãpai Tachi Ak'õrepa Jacobmaa mãgaji:
—Wãpáde aji, pù ak'õreerã eujãdee. Mù pù ome wãit'eeda aji.
4 Ma t'êepai Jacobpa t'â pëiji Raquel, Lea ome chedamerã ichia ovejaarã ak'ù badamãi.
5 Pachedak'ãri, Jacobpa mãgaji:
—Mùa unu bùda aji, parã ak'õrepa mù pia–ee pùk'a ak'ùmaa bù. Mamîda mù–it'ee p'ua–e bù, mù ak'õre Isaac Ak'õre Waibùa mù ome bairã. 6 Parãpa pia k'awa p'anù mù audú mimiapachi parã ak'õre pari. 7 Mamîda irua mù at'apai k'ûraji mãik'aapa ne–inaa tee–e paji ichia jaradak'a mù mimiada pari. Irua mãga ooji mîda, Tachi Ak'õrepa mùmaa ne–inaa k'achia oopi–e paji irumaa. 8 Ma k'ãyaara Labanpa mùmaa jarak'ãri: “Pù mimiada pari teeit'ee ne–animalaarã t'ùt'ùdùa bee,” ichi ne–animalaarãpa warra t'ùt'ùdùa t'opachida. Jõdee jarak'ãri: “Teeit'ee chi e–erroo bee”, ma ne–animal chak'eerã e–erroo uchiapachida. 9 Mãgá Tachi Ak'õrepa parã ak'õre ne–animalaarã mùmaa teeji.
10 ’Ewari aba ne–animalaarã enlunaa p'anadak'ãri, mù k'ãimok'araaji. Unuji ne–animalaarã ùmùk'îraarã t'ùt'ùdùa beerãpa wêraarã nomaa jõnù. 11 Mãga nùde Tachi Ak'õre angelpa mù t'âji. Mãpai mùa p'anauji: “Mù nama bùda” aji. 12 Ma angelpa mãgaji: “Pia ak'ùpáde aji. Unuit'ee ma ne–animalaarã ùmùk'îraarãpa chi wêraarã nomaa jõnù jõmaweda t'ùt'ùdùa bee. Mùa k'awa bù Labanpa pùmaa jarada. Mapa pù k'aripait'ee. 13 Mù Jõmaarã Ak'õre Waibùa, pùa unuda Betelde mù–it'ee mãu ârù aceite weedamãi. Mama pùa jaraji mùde ijãapariit'ee mùa pù k'ariparu pùrã. Wãpáde aji, pùchi t'oda eujãdee.”
14 Raquel Lea ome mãga ûridak'ãri, mãgajida:
—Taipa maarepida jâada–e pait'ee tai ak'õre net'aadepema. 15 Ma k'ãyaara irua tai ichi k'aurãk'a unu–e bù. ¡Tai pùmaa netot'aaji mãik'aapa pù k'ûrat'aaji miak'ãik'ãri tai ome! ¡Ma awara ne–inaa ichia atada pù k'aurepa jõmaweda iru bù ichi–it'ee aupai! 16 Tai ak'õre net'aa iru bada Tachi Ak'õrepa pùmaa teeji taipa tai warrarã ome iru p'anadamerã. Maperã oopáde ajida, Tachi Ak'õrepa pùmaa jaradak'a.
Jacob Padán Aram eujãdeepa uchiada
17-20 Maap'eda Jacob acomoraaji Canaán eujãdee wãit'ee chi ak'õre Isaac baparimaa. Nãga wãjida. Ewari aba Labán awara ãi wãji chi oveja k'ara t'ùùde. Mãùmisa Jacobpa ichi ne–animalaarã awaraa net'aa ome atada Padán Aram eujãde bùde, ma jõma p'e ataji mãik'aapa ichi naa pëiji. Ichi warrarã, wêraarã ome camelloorãde bataupiji. Mãpai wãjida, Labán ome pedeeda–ee.
Mãgá Jacobpa ma arameo Labán k'ûrat'aaji. Ma awara Raquelpa chùa ateeji chi ak'õre net'aa aù k'îrapite ùt'aa t'âpata. 21 Jõmaweda ãchi net'aa ome jirabodojida. Taarã–e nùde Éufrates to sîajida mãik'aapa jîp'a wãjida Galaad ee jêra bùmaa.
Labanpa Jacob êp'eda
22 K'ãima õpee parumaa Labanpa k'awa ataji Jacob wãdap'edaa. 23 Mãpai Labán ichi ëreerã ome t'êe chejida. K'ãima siete parumaa êp'e atanajida Galaad ee jêra bùmãi. 24 Mamîda ma ewate p'ãrik'ua k'ãimok'araade Tachi Ak'õrepa ma arameo Labanmaa jaraji k'îrau pedeenaamerã Jacob ome.
25 Maperã Galaad ee jêra bùde Labán Jacob ome unuk'ãri, chõo jùrù–e paji. Ma k'ãyaara Jacob k'ait'a ãchi k'ãipata oojida.
26 Mama p'anùde Labanpa iidiji:
—¿Sãap'eda pù jirabee wãjima aji, mù k'aurã ome, ãichak'eerã ome, mù wê–e misa? ¡Presoorãk'a iru bùda aji, jura chõodap'edaak'a! 27 ¿Sãap'eda mù k'ûrat'aajima aji, mãgá miru wãdak'ãri? Mùa k'awada paara, ¿fiesta waibùa parã–it'ee ook'aji–ek'ã aji, t'õdoopa mãik'aapa arpa ome? 28 ¡Pù k'îsia k'awa–ee pùk'a cheji. Mù k'aurã, ãichak'eerã ome mùmaa k'îra âpi–e paji! 29 Mùa parã jõmaarãmaa ne–inaa k'achia ook'aji. Mamîda p'ãrik'ua pù ak'õre Ak'õre Waibùapa jaraji k'îrau pedeenaamerã. 30 Wãara pù ak'õre temaa audú wã k'inia baji pùrã, ¿sãap'eda mù net'aa aù k'îrapite ùt'aa t'âpata chùa aneejima? aji.
31 Mãpai Jacobpa p'anauji:
—Audú p'era nâbada perã isapai uchiajidada aji, pùa mù wêraarã, warrarã jãri atai jîak'aapa. 32 Mamîda pù net'aa chùa–e pajida aji. Tai net'aade unuru pùrã, chi aneeru piu baibeeipia bùda aji. Tai ëreerã nama p'anùùrãpa ak'ù p'anù. ¡Mùa pù net'aa iru bù pùrã, atéeji!
Jacobpa k'awa–e baji Raquelpa chi ak'õre net'aa chùa atada.
33 Mãpai Labán t'îuji Jacob te ne–edee oodade ichi net'aa jùrùde. Maap'eda Lea tede mãik'aapa esclavoorã tede t'îuji. Mamîda unu–e paji ichi net'aa aù k'îrapite ùt'aa t'âpariida. Maap'eda Raquel tede ichiaba t'îuji. 34 Mamîda Raquelpa chi ak'õre net'aa camello ârù su–ak'ù beepata silla ek'ari t'ùt'aap'eda, aù ârù su–ak'ù baji. Mapa Labanpa ma te ne–edee ooda jõmaade jùrùk'ãri, unu–e paji.
35 Mãgá jùrùmaa bùde Raquelpa chi ak'õremaa mãgaji:
—Ak'õre, mù ome k'îraunaapáde aji. Mù pù k'îrapite p'oyaa p'irabai–eda aji, mù bi k'ayaa bairã.
—¿Mùa k'ãata oojima aji, pùa nãgá mù jùrù chemerã? 37 Pùa mù net'aa jõmaweda ak'ùji. ¿Unujik'ã aji, pùchi tedepema net'aa apida? ¡Unuji pùrã, bàji nama jõmaarã k'îrapite jaradamerã pùa wãarata jara bù! 38 Veinte años mù mimiaru pù pari. Mãga nùde pù ovejaarã, chivoorã ome chi chak'eerã maarepida ùratùada–e paji, mùa pia ak'ù bada perã. Ma awara mùa pù ne–animal apida k'o–e paji. 39 Ne–animal k'achia beerãpa pù ne–animalaarã peedak'ãri, mùa chi k'ap'ùa piuda apida atee–e paji pùmaa ak'ùpide ma pari p'aapinaamerã. Ma k'ãyaara mùchi p'arat'apa mùa p'aaji ma ne–animalaarã atuada pari. Mamîda ãstaawa maa–e pùrã p'ãrik'ua ne–animalaarã chùa chedak'ãri, ma pari pùa mùmaa p'aapipachi. 40 Pù ne–animalaarã ak'ùmaa bùde mù miaji ãstaawa ak'õrejîrupa maa–e pùrã p'ãrik'ua jîsuapa. Ma k'aurepa p'oyaa k'ãik'aa paji. 41 Veinte años wãyaarude mù pù tede bapachi. Mamîda waide pùa mù pedee ijãa–e bù. Pù k'aurã–it'ee catorce años mimiapachi pù esclavok'a. Ma awara ne–animalaarã–it'ee seis años mimiapachi. At'apai pùa mùmaa p'aa–e paji pùa p'aait'eeda adak'a. 42 Abraham Ak'õre Waibùa, mù ak'õre Isaac Ak'õre Waibùapa mù k'aripa–e pada paara, pùa mù net'aa maarepida wêe pëik'aji. Mamîda Ak'õre Waibùapa mù chupùria k'awaaji, audú pù ome miada perã. Mapa p'ãrik'ua pù ùtrùaji.
Jacob Labán ome pacto oodap'edaa
43 Mãpai Labanpa Jacobmaa mãgaji:
—Pù wêraarã mù k'aurã; pù warrarã mù ãichak'eerã. Pù ovejaarã mëreerã. Ne–inaa jõma pùa nama unu bù mëré. Mamîda ¿mùa k'ãata ook'aji mù k'aurãmaa wa ãchi warrarãmaa? 44 Mùa ne–inaa k'achia oo che–e pada perã, t'ãri pia pacto oodáma k'îrau–ee p'aneedait'ee. Ne–inaa oodáma Tachi Ak'õre k'îrapite na pedee k'irãpadait'ee.
—Mãu abaamaa p'e atadapáde aji.
Aramãgá mãu p'e atajida bùdait'ee Jacobpa mãu bainâ bùda ârù. Mãpai mama nek'ojida. 47 Labanpa ichi pedeede mãgà mãu p'e badamãi t'â bùji “Yegar Saduta”. Jõdee Jacobpa ichi pedeede t'â bùji “Galaad”.a
48 Mãpai Labanpa mãgaji:
—Na mãu p'e bùmãi tachi omeeweda t'ãri pia pacto oojidada aji.
Mapa ma mãu p'e bùmãi t'âjarapachida Galaad. 49 Ichiaba t'âjarapachida Mizpa; jara k'inia bù “Tachi Ak'õrepa tachi ak'ùpari”, mama Labanpa jarada perã:
—Tachi Ak'õrepa tachi omeeweda ak'ùpariit'ee oodamerã tachia nama jaradap'edaak'a. 50 Pùa mù k'aurã pia ak'ù–e pùrã maa–e pùrã awaraa wêraarã ome miak'ãiru pùrã, Tachi Ak'õrepa k'await'ee, awaraarãpa k'awada–e p'anù mîda.
51 Mãpai Labanpa mãgaji:
—Na mãu bainâ bù mãik'aapa mãu p'e nâbùmãi jara k'inia bù tai omé nama auk'a jaradap'edaa. 52 Mù na mãu p'e bùmãi wãyaa–e pait'eeda aji, chõoit'ee pù ome. Ichiaba pù na mãu p'e bùmãi wãyaa–e pait'eeda aji, chõoit'ee mù ome. 53 Mùa oo–e pùrã mùa jara bùk'a, pù ak'õchona Abraham mù ak'õchona Najor ome, ãra Ak'õre Waibùapa mù miapiipia bù.
Mãpai Jacobpa auk'a juraaji chi ak'õre Isaacpa ijãada Ak'õre Waibùa k'îrapite.
54 Maap'eda Jacob wãji ee nok'odee ne–animalaarã peep'eda, paade Tachi Ak'õre–it'ee. Mãpai ichi ëreerãmaa nek'opiji. Jõmaweda nek'odap'eda, ma ee nok'ode k'ãi p'aneejida.
55 Aù norema tap'edaweda Labanpa chi k'aurã, chi ãichak'eerã k'îra âp'eda, ãchimaa pedee pia jaraji. Mãpai despediip'eda, ichi temaa wãji.