30
1 Raquel warra t'o–e pak'ãri, chi âpewêra k'îra unuamaa iru beeji mãik'aapa chi ùmùk'îramaa mãgaji:—Mù–it'ee warra teepáde aji, maa–e pùrã mù piu baibeeyada aji.
2 Mãga ûrik'ãri, Jacob k'îraudachi mãik'aapa p'anauji:
—¿Mù Tachi Ak'õrek'ã? aji. Iruata pùmaa warra t'opi–e bùda aji.
3 Mãpai Raquelpa mãgaji:
—Mãgara mù esclava Bilhá ome k'ãi beepáde aji. Ichia warra t'oru mùa t'odak'a bayada aji. Mãgá mùa warra iru bayada aji.
4 Mapa Raquelpa chi esclava Bilhá teeji Jacobmaa, chi wêra k'ãipari pamerã.
5 Jacob Bilhá ome k'ãik'ãri, biak'ooji mãik'aapa warra t'oji.
6 Mãpai Raquelpa mãgaji:
—Na warra chai t'â bùit'eeda aji, Dan,a Tachi Ak'õrepa mù chupùria k'awaap'eda, mùa ùt'aa t'âda ûrida perã.
7 T'êepai Bilhapa warra awaraa t'oji.
8 Mãpai Raquelpa mãgaji:
—Na warra chai t'â bùit'eeda aji, Neftalí,b mùa mù âpewêra p'oyaada perã.
9 Maapai Leapa warra t'o–e baji. Maperã ichiaba teeji chi esclava Zilpá Jacob wêra k'ãipari pamerã.
10 T'êepai Zilpapa warra t'oji.
11 Mãpai Leapa mãgaji:
—¡Mù poro pia! Mapa na warra chai t'â bùit'eeda aji, Gad.c
12 Aù t'êepai Zilpapa waya warra t'oji.
13 Mãpai Leapa mãgaji:
—¡Mù o–îa bù! Ârá wêraarãpa mù o–îa baparida adait'ee. Mapa na warra chai t'â bùit'eeda aji, Aser.d
14 Ewari aba trigo ewamaa p'anùde Rubenpa ununaji nejõ mandrágora apata. Mãgà chi nawe Leamaa ateeji. Raquelpa ma nejõ unuk'ãri, Leamaa iidi beeji ichimaa ûk'uru teemerã. (Ma eujãde ijãapata mãgee nejõ jõp'eda, k'ima ome k'ãik'ãri, biak'oo beeit'ee.)
15 Mamîda Leapa p'anauji:
—¿Pù mù k'imapa k'iniara iru bù–epaa? aji. Mãga bùta ¿sãgá mù warrapa unuda pùmaa teeima? ¡Tee–epù!
Mãpai Raquelpa mãgaji:
—Pù warrapa mandrágora unuda teeru pùrã, idi p'ãrik'ua Jacob pù ome k'ãiyada aji.
16 Mãgá p'ãrik'ua Jacob ovejaarã ak'ù badamãiipa chek'ãri, Lea k'îrachuunaji mãik'aapa mãgaji:
—Idi pù mù ome k'ãiipia bùda aji, ma–it'ee mù warrapa unuda mandrágora teeda perã.
Ma p'ãrik'ua Jacob Lea ome k'ãiji.
17 T'êepai Tachi Ak'õrepa Leapa ùt'aa iidida ûrip'eda, iru waya biak'oo beeji mãik'aapa chi warra k'îmari eerepema t'oji. 18 Mãpai Leapa mãgaji:
—Tachi Ak'õrepa mù pia ak'ùpari, mù esclava teeda perã mù k'imamaa. Mapa na warra chai t'â bùit'eeda aji, Isacar.e
—Ârá mù k'imapa mù pia ak'ùit'eeda aji, mùa warrarã seis t'oda perã. Mapa na warra chai t'â bùit'eeda aji, Zabulón.f
21 Maap'eda Leapa k'au aba t'oji. T'â bùji Dina.
22 Mamîda Tachi Ak'õrepa ichiaba ûriji Raquelpa ùt'aa iidida mãik'aapa irumaa warra t'opiji. 23 Raquelpa ichi warra naapema t'ok'ãri, mãgaji:
—Ârá Tachi Ak'õrepa wêpapiji mù k'îra nejasia bada, warrarã t'ok'aa pada perã. 24 Mùa k'inia bù awaraa warra t'opimerã. Mapa nãgà warra chai t'â bùit'eeda aji, José.g
Jacob chi chãure Labán ome
25 Raquel warra José t'op'eda, Jacobpa Labanmaa mãgaji:
—Mù wãpipáde aji, mùchi eujãdee. 26 Pëipáde aji, mù wêraarã, warrarã ome. Pùa k'awa bù mù mimiada ãra atait'ee. Taarã pù ome nama mimia bù.
27 Mamîda Labanpa mãgaji:
—Mù chupùria k'awaapáde aji. Nama mù ome beepáde aji. Petau tau k'awaa beerãpa oopatak'a mùa k'awa ataji pù k'ap'ùa Tachi Ak'õrepa mù bendiciamaa bù. 28 Jaráji jõmasaa k'inia bù mùa p'aamerã. P'aait'eeda aji, pù mimiaru pari.
29 Mãpai Jacobpa mãgaji:
—Pùa pia k'awa bùda aji, mù mimiada pù ne–animalaarã ak'ùk'ãri. 30 Chok'ara–ee iru baji mù chek'ãri. Mamîda maadamãiipa audú îwajida, Tachi Ak'õrepa k'aripada perã. Ârá mù mimia k'inia bùda aji, mùchideerã–it'ee aupai.
31 Mãpai Labanpa waya iidiji:
—¿Jõmasaa k'inia bùma aji, pù mimia pari?
Jacobpa p'anauji:
—Maarepida p'aanaapáde aji. Waya mùa pù oveja ak'ùyada aji, mùa jararu ijãaru pùrã. 32 Idi mù wãpipáde aji, pù ne–animalaarã p'e iru bùmaa. Oveja ùmùk'îra chak'eerã p'ãimaa bee mãik'aapa ovejaarã pagapagaa bee mãik'aapa t'ùt'ùdùa bee, ma awara cabra chak'eerã pagapagaa bee mãik'aapa t'ùt'ùdùa bee; mãgee mëré pait'eeda aji. 33 Mãgá t'êepai pùa mù ne–animalaarã ak'ùnak'ãri, mãgee aupai unu–e pùrã, k'awa atayada aji, mùa chùada.
34 Labanpa mãgaji:
—Pùa jarada pia bùda aji.
35 Mamîda ma ewateweda Labanpa chi warrarãmaa ichi–it'ee awara p'e atapiji jõmaweda chivo e–erroo bee mãik'aapa cabra pagapagaa bee mãik'aapa t'ùt'ùdùa bee, ma awara oveja chak'e p'ãimaa bee. 36 Mãpai chi warrarãmaa t'ùmà ateepiji, k'ãima õpee wãpata ode.
Mãgá Jacobpa ak'ùmaa beeji Labán ne–animalaarã p'aneedap'edaa. 37 Mãga bùde Jacobpa álamo, almendro, castaño pak'uru jua t'ùap'e ataji mãik'aapa jodak'ooji e–erroo p'aneedamerã. 38 Mãpai Jacobpa ma pak'uru jua jodada bùji ne–animalaarã k'îrapite chi pania topatamãi. Mama ovejaarã enlunaa p'aneedak'ãri, 39 ma pak'uru jua jodada k'îrapite chi ùmùk'îraarã araa padaipachida chi wêraarã ome. Mãgá chi chak'eerã t'odak'ãri, e–erroo, t'ùt'ùdùa mãik'aapa pagapagaa uchiapachida. 40 Maap'eda Jacobpa ovejaarã enlunaa p'anùùrã awara ataji mãik'aapa bùji Labán ne–animalaarã e–erroo bee mãik'aapa p'ãimaa bee k'îrapite, ùmùk'îraarã ome araa padaidak'ãri, ãchideepa uchiarutaarã auk'a e–erroo mãik'aapa t'ùt'ùdùa uchiadamerã. Mãgá Jacobpa ãyaa p'e ata wãpachi ichia ne–animalaarã jùrùt'erada aupai. 41 Ma awara ne–animalaarã poreera bee enlunaa p'anùùrã pania tode chedak'ãri, Jacobpa ma pak'uru jua jodada ãchi k'îrapite bùji. Mãgá araa padaidak'ãri, ma pak'uru jua unujida. 42 Mamîda ne–animalaarã k'aitek'eek'oodaidak'ãri, ma pak'uru jua bù–e paji. Chi k'aitek'eera bee atabëiji Laban–it'ee. Mãgá Jacobpa ne–animalaarã poreera bee aupai p'e ata wãpachi. 43 Jacobpa mãgá oo bùpa ovejaarã chok'ara p'e iru beeji. Ma awara camelloorã, burroorã mãik'aapa esclavoorã paara iru beeji. Mãgá p'arat'ara beeji, Tachi Ak'õrepa k'aripa bada perã.