Jacob Jarande banada
29
1 Jacob wãji ichi ode mãik'aapa banaji oriente eere.2 Jarán p'uuru k'ait'a panak'ãri, pania t'ùpata pozo unuji. Mama oveja ak'ùpataarã õpee p'anajida ãchi ovejaarãmaa pania topidait'ee. Ma pania t'ùpata pozo t'ap'a baji mãu choma bùpa. 3 Mãgá ovejaarã jõmaweda aneedak'ãri pania topidait'ee, ma mãu ãyaa atajida mãik'aapa ãchi ovejaarãmaa topidap'eda, waya bùjida ma pania t'ùpata pozo ârù.
4 Mama pak'ãri, Jacobpa iidiji ma oveja ak'ùpataarãmaa:
—K'õp'ãyoorã, ¿sãmapemaarãma? aji.
P'anaujida:
—Jarán p'uurudepemaarãda ajida.
5 Mãpai Jacobpa iidiji:
—¿Parãpa Najor ãichak'e Labán k'awa p'anùk'ã? aji.
P'anaujida:
—K'awa p'anùda ajida.
6 Mãpai Jacobpa iidiji:
—¿Labán k'ap'ùa pia bùk'ã? aji.
P'anaujida:
—K'ap'ùa pia bùda ajida. Pùchá ak'àji. Iru k'au Raquel cheruda ajida, chi ovejaarã ome.
7 Mãpai Jacobpa mãgaji:
—At'ãri k'eu–e bù ovejaarã k'ãipidait'ee. ¿Sãap'eda pania topida–ema aji, waya ateedait'ee p'ûajara k'odamerã?
8 Mamîda ãchia p'anaujida:
—P'oyaada–eda ajida. Ichita nùpata ovejaarã jõmaweda pacherutamaa, awaraa oveja ak'ùpataarãpa k'aripadamerã jã mãu choma bù ãyaa atadait'ee. Mãgá ovejaarãmaa pania topidayada ajida.
9 Jacob at'ãri ãchi ome pedeemaa bùde, Raquel pacheji chi ak'õre ovejaarã ome, ichi chi ak'õre ovejaarã ak'ùpari pada perã. 10 Jacobpa Raquel unuk'ãri chi chîapa chonaa ovejaarã ome, wãji ma mãu choma bù ãyaa atade pania t'ùpata pozo t'ap'a badamãiipa mãik'aapa pania topiji ma ovejaarãmaa. 11 Maap'eda Raquelmaa saludaaji mãik'aapa o–îapa jêedachi. 12 Jacobpa nepùrùk'ãri ichi Rebeca warra, Labán sobrino, Raquel teedaa p'iraji chi ak'õremaa jarade.
13 Labanpa ûrik'ãri chi âpewêra warra Jacob mama bù, isapai wãji auteebaide. Wëre atap'eda mãik'aapa k'îra âp'eda, teedaa ateeji.
Ma t'êepai Jacobpa ichi p'asada jõmaweda Labanmaa nepùrùji.
14 Mãga ûrik'ãri, Labanpa mãgaji:
—Wãara, pù mù ëreerãda aji.
Jacob, Raquel ome mãik'aapa Lea ome miak'ãida
Atane aba Jacob beeji Labán ome.
15 Maap'eda Labanpa mãgaji:
—Pari mimia–e pait'ee mù ome, mùchi ëreerã perã. Jarapáde aji, jõmasaa p'aamerã pùchi mimia pari.
16 Labanpa k'au omé iru baji. Chi naapema t'âjarapachida Lea, chi t'êepema Raquel. 17 Lea tau tap'ok'ee pùk'a baji. Mamîda Raquel k'îra wãree baji; k'ap'ùa jida pi–ia baji.
18 Jacobpa Raquel k'inia bada perã, Labanmaa mãgaji:
—Mùa pù k'au t'êepema, Raquel k'inia bùda aji. Siete años Raquel pari mimiayada aji.
19 Mãpai Labanpa p'anauji:
—Piara bùda aji, pùa iru atamerã, awaraapa atai k'ãyaara. Mù ome mimiamaa beepáde aji.
20 Jacob–it'ee ma siete años mimiada taarã–e pùk'a paji, Raquel audú k'inia bada perã.
21 Ma siete años mimiap'eda, Jacobpa mãgaji Labanmaa:
—Raquel teepáde aji. Tai miak'ãidait'ee. Aupajida aji, ma siete años mùa iru pari mimiait'eeda ada.
22 Mãpai Labanpa jara pëiji ichi te k'ait'a p'anapatap'edaarã chedamerã miak'ãipata fiesta oodait'ee. 23 Mamîda Labanpa Jacob k'ûrat'aaji. Teeji chi naapema, chi t'êepema k'ãyaara. Jacobpa k'awa–e paji p'ãrik'ua pada perã. Mapa Lea ome k'ãi beeji. 24 Ma awara Labanpa teeji esclava t'âjarapatap'edaa Zilpá Leamaa iru k'aripamerã.
25 Aù norema p'irabaik'ãri, Jacobpa k'awa ataji ichi k'ûrat'aada. Mapa Labanmaa mãgaji:
—¿Sãap'eda mù ome nãga oojima? aji. ¿Mù Raquel párita mimia baji–ek'ã? ¿Sãap'eda pùa mù k'ûrat'aajima? aji.
26 Labanpa p'anauji:
—Nama chi t'êepema miak'ãipidak'aada aji, chi naapema k'ãyaara. 27 Tomiamaa Lea miak'ãida fiesta aupak'ãri, Raquel teedait'eeda aji. Mamîda pù mù ome siete años waya mimiait'eeda aji, maa–e pùrã teeda–e.
28 Mãga beeji. Tomiamaa Lea miak'ãida fiesta aupak'ãri, Labanpa Raquel teeji. 29 Ichiaba Labanpa esclava t'âjarapatap'edaa Bilhá teeji Raquelmaa iru k'aripamerã.
30 Jacob ichiaba araa paji Raquel ome mãik'aapa Raquel k'iniara iru bapachi Lea k'ãyaara, awaraa siete años mimiaji mîda iru pari.
Jacobdeepa uchiadap'edaarã
31 Tachi Ak'õrepa unuk'ãri Jacobpa Lea mãgá k'inia–e bù, irumaa warrarã t'opiji. Jõdee Raquelmaa warra t'opik'aa paji.
32 Mãgá Lea biak'oo beeji mãik'aapa warra t'oji. T'â bùji Rubén.a T'ok'ãri, Leapa mãgaji:
—Tachi Ak'õrepa mù t'ãri p'ua bada unuji. Ârata mù k'imapa mù k'iniara iru bait'eeda aji.
33 Maap'eda Leapa awaraa warra t'oji. Mãgà t'â bùji Simeón.b Simeón t'ok'ãri, Leapa mãgaji:
—Tachi Ak'õrepa k'awaji mù yiaraa iru bada. Mapa waya mùmaa warra t'opijida aji.
34 Waya Leapa warra t'oji. Mãgà t'â bùji Leví.c Leví t'ok'ãri, Leapa mãgaji:
—Ârá mù k'ima mù ome waapùara araa pait'eeda aji, mùa warrarã õpee t'oda perã.
35 Waya Leapa warra t'oji. Mãgà t'â bùji Judá.d Judá t'ok'ãri, Leapa mãgaji:
—Mù Tachi Ak'õremaa o–îa ùt'aa t'âit'eeda aji, irua na warra teeda perã.
Ma warra t'op'eda, Leapa waa t'o–e paji.