28
1 Maperã Isaacpa Jacob t'â pëiji mãik'aapa irumaa pedee pia jarap'eda, mãgaji:—Miak'ãinaapáde aji, na Canaán eujãdepema wêra ome. 2 Wåji Padán Aram eujãdee pù ak'õchona Betuelmaa mãik'aapa pù chîapa Labán k'au atapáde aji. 3 Mùa k'inia bù Tachi Ak'õre Waibùa pù ome wãmerã mãik'aapa pù pia ak'ù bamerã. K'inia bù irua p'uuru chok'ara pùdeepa uchiapimerã. 4 K'inia bù pù ome mãik'aapa pùdeepa uchiadait'eerã ome pia oomerã irua Abrahammaa jaradak'a. Irua jaraji tachideepa uchiadait'eerã na eujã chipariirã padait'ee, ârá at'ãri awaraa eujãdepemaarãk'a p'anù mîda.
5 Mãpai Isaacpa Jacob pëiji Padán Aram eujãdee arameo Betuel warra Labanmaa. Mãgà eperã Jacob, Esaú nawe Rebeca âpema paji.
Esaupa wêra awaraa atada
6 Esaupa k'awa ataji Isaacpa Jacobmaa pedee pia jarada iru pëik'ãri Padán Aram eujãdee mãpema wêra atamerã. Ichiaba k'awa ataji Isaacpa jarada Canaán eujãdepema wêra atanaamerã. 7 Esaupa k'awak'ãri Jacob chi ak'õreerãpa jaradap'edaak'a Padán Aram eujãdee wã bù, 8 k'awaaji chi ak'õrepa Canaán eujãdepema wêraarã k'inia–e bada. 9 Mapa ichi wãji Abraham warra Ismael bapariidamaa mãik'aapa iru k'au t'âjarapatap'edaa Majalat ataji ichi wêra papiit'ee. Mãgà wêra âpema t'âjarapachida Nebayot. Mãgá Esaú Majalat iru baji awaraa Canaán eujãdepema wêraarã ome.
Tachi Ak'õrepa Jacobmaa ichi unupida
10 Mãgá Jacob Bersebadeepa uchiaji Jarandee wãit'ee. 11 Ma ode wãde k'eudaik'ãri, mãu jùrùp'eda chi porok'au–it'ee, mama k'ãi beeji. 12 Mãgá k'ãi bùde k'ãimok'araaji tome eujãdeepa pajãdee sîu bù. Mãgùde angeleerã ùt'aa, edaa wãpachida. 13 Ma awara unuji Tachi Ak'õre bainâ bù ichi ik'aawa.
Tachi Ak'õrepa mãgaji:
—Mù pù ak'õchona Abraham, pù ak'õre Isaac Ak'õre Waibùada aji. Na eujã pù jêra bùmãi mùa teeit'eeda aji, pùmaa mãik'aapa pùdeepa uchiadait'eerãmaa. 14 Ãra chok'ara p'anadait'ee ipu nãusaa p'usa ide paraaparik'a. P'anadait'ee norte eere, sur eere, oriente eere mãik'aapa occidente eere. Pù k'ap'ùa mãik'aapa ãra k'ap'ùa mùa ne–inaa pia ooit'ee jõmaweda na p'ek'au eujãdepemaarãmaa. 15 Mù pù ome bapariit'ee. Pù ak'ù bapariit'ee pù wãrumaa. Waya na eujãdee aneeit'ee. Mùa pù atabëi–e pait'ee. Mùa jaradak'a ooit'eeda aji.
16 Jacob ârùmak'ãri, k'îsiaji: “Wãara Tachi Ak'õre nama bù, mùa k'awa–e baji mîda.” 17 P'era nâbùde k'îsiaji: “Nama Tachi Ak'õre bapari. Nama bù Tachi Ak'õre eujãdee wãpari o.”
18 Aù norema tap'edaweda Jacob p'irabaiji. Mãpai ma mãu chi porok'au bada atap'eda, olivodee ooda aceitepa weet'aaji ma mãu ârù ak'ùpiit'ee Tachi Ak'õre waawee bù. 19 Naaweda ma eujãde baji p'uuru, t'âjarapatap'edaa Luz. Mamîda Jacobpa ma eujã t'â bùji Betel.a 20 Mãpai Jacobpa Tachi Ak'õremaa mãgaji:
—Wãara pù mù ome wãru pùrã mãik'aapa mù k'ariparu pùrã chik'o ome mãik'aapa p'aru ome, 21 ma awara mù ak'õremaa waya k'ap'ùa pia aneeru pùrã, pù mùchi Ak'õre Waibùa pait'ee mãik'aapa mùa pùde ijãapariit'eeda aji. 22 Nãgà mãu mùa nama bùit'ee pù tek'a mãik'aapa mù net'aa chaa diezdepema aba pùmaa teepariit'eeda aji.