Jacobpa chi ak'õre Isaac k'ûrada
27
1 Isaac chonaa bak'ãri, tau p'ãriudachi.Ewari aba chi warra naapema Esaú t'âji mãik'aapa mãgaji:
—Warra.
Esaupa p'anauji:
—¿K'ãare pajima? aji.
2 Isaacpa mãgaji:
—Pùa k'awa bù mù chonaa bairã, na ewari piuit'eeda aji. 3 Mapa mù piui naaweda, wãpáde aji, mêe pùchi ematrùma ome ne–animal peede mùmaa k'opiit'ee. 4 Ma nechiara chúuji warraa beemerã mùa awaa baparik'a mãik'aapa namaa anéeji mùa k'oit'ee. Maap'eda mùa pùmaa pedee pia jarait'ee Tachi Ak'õrepa jarapi bùk'a.
5 Mamîda Isaacpa Esaumaa jaramaa bùde, Rebecapa ûri baji.
—¡Ûríji! Mùa ûriji pù ak'õre pedeemaa bù pù âpema Esaú ome. Nãga jaramaa baji: 7 “Nejùrùnapáde aji, mãik'aapa chi ne–animal unuru mù–it'ee chuupáde aji, pùa warraa chuuparik'a. Mãgara mù piui naaweda, pùmaa jarayada aji, pedee pia Tachi Ak'õrepa jarapi bùk'a.” 8 Warra, pù ak'õrepa pù âpemamaa mãga jarada perã, pia ûríji mùa jararu. 9 Wåji chivo paraamaa mãik'aapa anéeji chivo chak'eerã omé, chi pipùara bùdepema. Mùa pù ak'õre–it'ee mãgà chuuit'ee warraa beemerã irua k'inia bùk'a. 10 Pùa ateeit'eeda aji, irua k'omerã. Mãgá piui naaweda, irua pùmaa pedee pia jarayada aji, Tachi Ak'õrepa jarapi bùk'a.
11 Mamîda Jacobpa chi nawemaa mãgaji:
—Mù âpema k'arara baparida aji. Mamîda mù mãga–e bù. 12 Mù ak'õrepa mù t'õbairu pùrã, k'awayada aji, mãik'aapa jarayada aji, mùa ichi oo iru bù. Mãpai irua mùmaa pedee k'achia jarayada aji, pedee pia jarai k'ãyaara.
13 Mamîda chi nawepa p'anauji:
—Warra, pùmaa pedee k'achia jararu pùrã, mãgara mù k'achiade baaii pù k'ãyaara. Jîp'a óoji mùa jara bùk'a. Ma chivo chak'eerã atanapáde aji.
14 Jacobpa mãga ooji.
Mãpai chi nawepa jooteeji warraa beemerã Isaac–it'ee. 15 Maap'eda Rebecapa chi warra naapema Esaú p'aru piara bù atanaji mãik'aapa jâpiji chi t'êepema Jacobmaa. 16 Mãpai chivo k'arapa Jacob jua mãik'aapa âbùsi, k'ara wêe badamãi bùk'ooji chi ak'õrepa k'awanaamerã. 17 Ma t'êepai ichia ma chik'o warraa jooda pan ome Jacobmaa teeji, irua chi ak'õremaa ateemerã.
18 Isaac k'îrapite k'ait'a panak'ãri, Jacobpa mãgaji:
—Tate aji.
Isaacpa p'anauji:
—Nama bùda aji. ¿Pù, k'aima? aji.
19 Jacobpa p'anauji:
—Mù Esauda aji, pù warra naapema. Pùa jaradak'a ooji. P'irabáiji mùa nejùrùnada k'omerã mãik'aapa mùmaa jarapáde aji, pedee pia Tachi Ak'õrepa jarapi bù.
20 Mãpai Isaacpa iidiji:
—Warra, ¿sãgá na chik'o taarã–ee unujima? aji.
Jacobpa p'anauji:
—Pù Ak'õre Waibùapa mù k'aripajida aji, nejùrùmaa bak'ãri.
21 Mãpai Isaacpa mãgaji:
—Namaa chepáde aji. Mùa pù t'õbaiit'ee. Mãgá k'awayada aji, wãara pù mù warra Esaú.
22 Jacob k'ait'aara wãk'ãri, Isaacpa t'õbaiji mãik'aapa mãgaji:
—Pedeek'ãri, Jacob pedee ûriji. Mamîda chi jua Esaú jua.
23 Mãgá Isaacpa Jacob k'awa–e paji, ichi jua k'arara bada perã chi âpema Esaú juak'a. Mamîda jarai naaweda Tachi Ak'õrepa jarapiru, 24 waya iidiji:
—Wãara made aji. ¿Pù mù warra Esaú?
Jacobpa p'anauji:
—Mù Esauda aji.
25 Mãpai chi ak'õrepa mãgaji:
—Mãgara, pùa nejùrùda mùmaa k'opipáde aji. Maap'eda mùa Tachi Ak'õrepa jarapi bù jarait'ee.
Jacobpa ma chik'o vino ome teeji chi ak'õremaa. K'oji mãik'aapa toji.
26 Maap'eda mãgaji:
—Chepáde aji, mù k'îra âde.
27 Jacobpa chi ak'õre k'îra ârude, Isaacpa iru p'aru âk'ãri, na pedee pia jaraji Tachi Ak'õrepa jarapidak'a:
—Wãara, mù warra k'ara âsiada aji. Mêe, Tachi Ak'õrepa pia oodak'a warraa jo bù. 28 K'inia bù Tachi Ak'õrepa pùmaa eujã pia teemerã. K'inia bù k'oi chepimerã aùde ne–uu pia t'onomerã mãik'aapa chaumerã. Mãgá trigo waibùa iru bait'ee vino ome. 29 K'inia bù pùa eperãarã chok'ara iru bamerã pùchi jua ek'ari. Ma awara k'inia bù p'uuru pidaarã chok'araara bedabaidamerã pù k'îrapite, pù âpemaarã paara. Pùmaa ne–inaa k'achia oopataarã Tachi Ak'õrepa auk'a k'achia ooit'eeda aji. Jõdee pùmaa pia oopataarã auk'a pia ooit'eeda aji.
30 Isaacpa ma pedee pia jarap'eda, Jacob irumãiipa uchiaji.
Mãga nùde Esaú mêepa pacheji ne–animal ome. 31 Ichiaba jooji chik'o warraa mãik'aapa chi ak'õremaa ateep'eda, mãgaji:
—Tate, p'irabaipáde aji. Acha bùda aji, mùa peeda pùa k'omerã. K'opáde aji, mãik'aapa mùmaa pedee pia Tachi Ak'õrepa jarapiru jarapáde aji.
32 Mãpai Isaacpa iidiji:
—¿Pù, k'aima? aji.
Esaupa p'anauji:
—Mùpù, pù warra naapema Esaú.
33 Mãga ûrik'ãri, Isaac p'era pùk'adachi mãik'aapa pedee wërewëree mãgaji:
—Mãgara, ¿k'ai pajima aji, nejùrùnap'eda, mùmaa k'opida? Nek'op'eda, mùa mãgùmaa jarajida aji, Tachi Ak'õrepa pedee pia jarapidak'a, irua ne–inaa pia ooit'ee.
34 Esaupa mãga ûrik'ãri, t'ãri p'uapa jêedachi mãik'aapa biaji:
—¡Tate, auk'a mùmaa pedee pia jarapáde! aji.
35 Mamîda Isaacpa mãgaji:
—Pù âpema pù naa chejida aji, mù k'ûrat'aade mãik'aapa Tachi Ak'õrepa mùmaa pedee pia jarapida ichi–it'ee jãri ataji.
Mãpai Esaupa mãgaji:
36 —Maperã iru Jacoba t'â bùjidada aji. K'ûrada omé mù k'ûraru. Naa jaraji mùa teemerã mùa jâait'ee pada pù jai–idaak'ãri. Ârá Tachi Ak'õrepa mùmaa jarapiit'ee pada paara jãri atajida aji. ¿Mùmaa ichiaba p'oyaa jara–ek'ã aji, Tachi Ak'õrepa jarapi bù?
37 Mãpai Isaacpa p'anauji:
—Mùa pù bùjida aji, Jacob jua ek'ari, iru ëreerã awaraarã ome. Irumaa jarajida aji, trigo, vino waibùa iru bapariit'ee. Warra, ¿k'ãata waa pùmaa jarayama? aji.
38 Mamîda Esaupa waya chupùria iidiji:
—Ak'õre, ¿pedee pia apida wê–ek'ã aji, mùmaa jarait'ee? ¡Ichiaba mùmaa pedee pia jarapáde! aji.
Mãpai waya jêedachi.
39 Mãpai Tachi Ak'õrepa jarapi bùk'a Isaacpa mãgaji:
—T'ùmà banait'eeda aji, eujã piadeepa mãik'aapa k'oi cheparimãiipa. 40 Chõoyaa bapariit'eeda aji. Pùchi âpema jua ek'ari bapariit'ee. Mamîda juataura beek'ãri, iru jua ek'ariipa uchiait'eeda aji.
Jacob ãyaa wãda Esaú waaweepa
41 Isaacpa mãga jaradadeepa Esaupa Jacob k'îra unuamaa iru beeji, chi ak'õrepa pedee pia jarada jãri atada k'aurepa. K'îsiaji: “Na ewari mù ak'õre piuda t'êe, mù âpema Jacob pee atapëiit'ee.”
42 Rebecapa k'awaa atak'ãri Esaupa k'îsia iru bada, Jacob t'â pëiji mãik'aapa mãgaji:
—Warra, pù âpema Esaupa pù pee k'inia bùda aji. Pù ome k'îra jõ–e bù ichi k'ûrada k'aurepa. 43 Mapa warra, mùa jararuk'a óoji. Âraweda wåji Jarandee mù âpema Labán temaa. 44 Mama béeji pù âpema k'îrau wêparu misa 45 mãik'aapa pùa ooda k'îra atuadaru misa. Mãga pak'ãri, mùa jara pëiit'ee ãpùtee chemerã. ¡Ewari abaade mù warrarã omeeweda atua k'inia–e bùda! aji.
46 Ma t'êepai Rebecapa Isaacmaa mãgaji:
—¡Mùa waa choo–e jã hitita wêraarã ome! K'inia–e bùda aji, Jacobpa hitita wêraarã atamerã Esaupa oodak'a. Jacobpa jãgee Canaán eujãdepema hitita wêraarã ataru pùrã, mù piu baibeeyada aji.