Isaac Guerar p'uurude banada
26
1 Aù naaweda, ma warrarã t'odai naaweda, Isaac badamãi audupai jarra oojida. Ma jarra awara baji naawedapema Abrahampa unuda k'ãyaara. Jarrara paraak'ãri, Isaac wãji Guerar p'uurudee chi wêra ome. Mama bapachi filisteorã rey, t'âjarapatap'edaa Abimélec.2 Mama p'anùde Tachi Ak'õrepa ichi unupiji Isaacmaa mãik'aapa mãgaji:
—Wãnaapáde aji, Egipto eujãdee. Béeji mùa jararumãi. 3 Nãgaweda béeji na eujãde. Mù pù ome bait'ee mãik'aapa pù bendiciait'ee. Pùdeepa warrarã chok'ara uchiapiit'ee. Mùa pù ak'õre Abrahammaa jaradak'a, na eujã teeit'ee pùmaa mãik'aapa pùdeepa uchiadait'eerãmaa. 4 Mùa ãra chok'ara îwapiit'ee lucero pajãde nâbùk'a. Ãramaa na eujã jõmaweda teeit'ee. Ma awara pùdeepa uchiadait'eerã k'ap'ùa mùa na p'ek'au eujãdepemaarã jõmaweda bendiciait'ee. 5 Mùa mãga ooit'eeda aji, pù ak'õrepa mù pedee ijãada perã, mùa jaradak'a ooda perã mãik'aapa mùa irumaa jarateedak'a ooda perã.
6 Tachi Ak'õrepa mãga jarada t'êepai, Isaac Guerarde beeji. 7 Mama bùde mãpemaarãpa iidi p'aneejida Rebeca pari, iru k'îra wãree bada perã. Mãga ûrik'ãri, Isaacpa jaraji Rebeca ichi âpewêra. Ichi wêrada a k'inia–e paji, ãrapa ichi peedai jîak'aapa Rebeca k'ap'ùa.
8 Taarã pak'ãri, ewari aba rey Abimelecpa ichi tedepema ventanadeepa ak'ùk'ãri, unuji Isaacpa chi wêra wëre iru bù. Mãgá k'awa ataji Rebeca iru wêra.
9 Mãpai Abimelecpa Isaac atapip'eda, irumaa mãgaji:
—Rebeca pù wêrada aji. ¿Mãga–ek'ã? ¿Sãap'eda pùchi âpewêrada ajima? aji.
Isaacpa p'anauji:
—K'îsiajida aji, mù peedai iru k'ap'ùa.
10 Mamîda Abimelecpa mãgaji:
—¿Sãap'eda taimaa mãga oojima? aji. Tai p'uurudepemapa iru atak'aji ichi wêra papiit'ee. Mãga ooda paara, p'ek'au k'achia ook'ajida aji, Tachi Ak'õre k'îrapite.
11 Ma t'êepai Abimelecpa mãgaji jõmaweda ichi p'uuru pidaarãmaa:
—Apidaapa na ùmùk'îramaa wa chi wêramaa ne–inaa k'achia ooruta pùrã, mùa mãgà peepiit'eeda aji.
12 Mama bùde ma año Isaacpa ne–uuji mãik'aapa waibùa ewaji, Tachi Ak'õrepa iru bendicia bada perã. 13 P'arat'ara, net'aara paraaji. 14 Tachi Ak'õrepa iru ovejaarã, p'ak'aarã, esclavoorã paara îwapiji.
Ma k'aurepa filisteorãpa Isaac k'îra unuamaa iru p'aneejida. 15 Maperã Isaacpa iru bada pozo yooropa ipuru t'ap'ak'oojida. Abraham at'ãri chok'ai bùde ichi mimiapataarãpa ma pania t'ùpata pozo k'oro atajida.
16 Ma jõmaade k'îsiap'eda, rey Abimelecpa Isaacmaa mãgaji:
—Wãpáde aji, namãik'aapa, pùchi eere p'anùùrã ome, parã chok'araara p'anù perã tai eere p'anùùrã k'ãyaara.
17 Aramãgá Isaac wãji ichideerã ome Guerar eujã jewedaadee. Mama p'aneejida. 18 Mama p'anùde awaraa pania t'ùpata pozo chi ak'õrepa k'oropida mãik'aapa ichi piuda t'êepai filisteorãpa t'ap'ak'oodap'edaa, waya k'oropiji. Ma pozo chi ak'õrepa naaweda t'â bùdak'a t'â bùji.
19 Ewari aba Isaac mimiapataarãpa ma Guerar eujã jewedaade pozo chiwidi k'oromaa p'anùde, pania poátrù uchia bù unujida.
20 Mamîda ma eujãdepema oveja ak'ùpataarãpa mãga unudak'ãri, chõo jùrù chejida Isaac oveja ak'ùpataarã ome. Jarajida ma pania poátrù bùmãi ãchidé paji. Ma chõodap'edaa k'aurepa Isaacpa ma pozo t'â bùji Pleito, pia jarait'eera “chõopata”. 21 Ma t'êepai Isaac mimiapataarãpa awaraa pozo k'orojida mãik'aapa ma eujãdepemaarã waya chõo chejida ma k'ap'ùa. Mapa Isaacpa ma pozo t'â bùji “k'îra unuamaa p'anapata”.
22 Maap'eda Isaac mamãik'aapa t'ùmà wãji mãik'aapa awaraa pozo k'oropiji. Ma eujãdepemaarã ma k'ap'ùa chõo cheda–e paji.
Isaacpa ma pozo t'â bùji Rejobota mãik'aapa jaraji:
—Ârara na eujã ewaraa k'obùde pia p'anapataadait'ee mãik'aapa îwadait'eeda aji.
23 Mamãik'aapa Bersebade banaji.
24 Ma panadap'edaa p'ãrik'ua Tachi Ak'õrepa Isaacmaa ichi unupiji mãik'aapa mãgaji:
—Mù pù ak'õre Abraham Ak'õre Waibùa. Waaweenaapáde aji, mù pù ome bairã. Mù mimiapari Abraham k'aurepa pù bendiciait'ee mãik'aapa pùdeepa uchiadait'eerã îwapiit'eeda aji.
25 Mãpai Isaacpa mama altar ooji Tachi Ak'õremaa ùt'aa t'âpariit'ee. Mama p'aneejida mãik'aapa mama Isaacpa pozo pania t'ùpataadait'ee k'oropiji chi mimiapataarãmaa.
Isaac Abimélec ome pedeeteeda
26 Mama p'anùde rey Abimélec Guerar eujã jewedaadeepa cheji Isaac ome pedeede. Ichi ûraapari Ajuzat mãik'aapa chi soldaorã poro waibùa Ficol auk'a nipajida. 27 Pachedak'ãri, Isaacpa mãgaji:
—¿Parãpa mù k'iniada–e p'anù–ek'ã? aji. Mapa mù pãchi eujãdeepa jëret'aajida. Mãga bùta, ¿sãap'eda mù ome pedee chejidama? aji.
28 P'anaujida:
—K'awa p'anùda ajida, Tachi Ak'õre pù ome bapari. Mapa k'îsia iru p'anù pù ome pacto oodait'ee chõoda–ee p'anapataadait'ee. Nãga k'îsia iru p'anù. 29 Jarapáde ajida, pùa maarepida ne–inaa k'achia oo–e pait'ee tai p'uuru ome, taipa parã ichiak'au iru p'anapatap'edaa perã. Pùmaa ne–inaa k'achia oodai k'ãyaara, pù pia ak'ùpachida mãik'aapa pù tai eujãdeepa pëik'ãri, t'ãri pia pëijida. Unu p'anùda ajida, Tachi Ak'õrepa pù bendiciamaa bù.
30 Maap'eda Isaacpa ãchi–it'ee fiesta pia ooji. Nek'ojida mãik'aapa ne–inaa tojida. 31 Aù norema tap'eda p'irabaidak'ãri, Tachi Ak'õre k'îrapite juraajida chõoda–ee p'anapataadait'ee. Mãpai k'õp'ãyoorãk'a despediidap'eda, k'ãiwee wãjida.
32 Ma ewateweda Isaac mimiapataarãpa jara chejida pania unudap'edaa ãchia pozo k'oro wãdap'edaade. 33 Isaacpa ma pozo t'â bùji Seba.b Maadamãiipa p'uuru mama bù t'âjarapachida Berseba.
34 Taarã pak'ãri, Esaú cuarenta años iru bak'ãri, hitita pida Beerí k'au t'âjarapatap'edaa Judit ataji chi wêra papiit'ee. Ichiaba ataji hitita pida Elón k'au, t'âjarapatap'edaa Basemat.c
35 Ma wêraarã k'aurepa Isaac mãik'aapa Rebeca o–îa p'anadak'aa paji.