Abrahampa warrarã ooda Cetura ome
(1 Crónicas 1.32-33)
25
1 Maap'eda Abrahampa ataji wêra awaraa, t'âjarapatap'edaa Cetura. 2 Cetura ome warra seis ooji. T'âjarapachida Zimrán, Jocsán, Medán, Madián, Isbac, Súaj.3 Jocsandeepa uchiajida Sabá mãik'aapa Dedán.
Dedandeepa uchiajida asureorã, letuseorã, mãik'aapa leumeorã.
4 Madiandeepa uchiajida Efá, Éfer, Janoc, Abidá mãik'aapa Eldá. Ma jõmaweda Abraham wêra Ceturadeepa uchiajida.
5 Isaacpa Abraham net'aa jõmaweda jâaji.
6 Mamîda Abraham jai–idaai naaweda, Agar warramaa mãik'aapa Cetura warrarãmaa net'aa teeji. Maap'eda ãra Isaac ik'aawaapa ãyaa wãpiji. P'ananajida Canaán eujãde, oriente eere.
Abraham jai–idaada
7 Abraham ciento setenta y cinco años iru bak'ãri, 8 jai–idaaji. Chonaa baji. 9 Chi warrarã Isaacpa Ismael ome iru ùajida Macpela mãu te uriade, Mamré eujã oriente eere, hitita pida Zojar warra Efrón eujãde. 10 Ma eujã Abrahampa netoda paji hititaarã juak'aawa. Mama iru ùajida chi wêra Sara ùadap'edaamãi.
11 Abraham jai–idaada t'êepai, Tachi Ak'õrepa Isaac pia ak'ù bapachi. Isaac bapachi pania t'ùpatamãi, t'âjarapatap'edaa Lajay Roí.a
Abraham warra Ismaeldeepa uchiadap'edaarã
12 Abrahampa chi warra Ismael ooji Sara esclava Egiptodepema Agar ome. 13 Ismaeldeepa nãgùùrã uchiajida, chi naapemadeepa t'êepema parumaa: Nebayot, Cedar, Adbel, Mibsán, 14 Mismá, Dumá, Masá, 15 Hadar, Temá, Jetur, Nafis mãik'aapa Cedema. 16 Ma doce warrarã t'âjarapatap'edaak'a ãchi eujã t'â bùjida. Ma eujã chaachaa ãchi eperãarã poro waibùarã paji.
17 Ismael jai–idaak'ãri, ciento treinta y siete años iru baji.
18 Irudeepa uchiadap'edaarã p'ananajida Canaande sur eere Egipto k'ait'a, Asiria eujãdee wãpari ode; Javilá, Sur eujã esajîak'a. Mama p'anapachida mãik'aapa apema Abrahamdeepa uchiadap'edaarã k'îra unuamaa iru p'anapachida.
Isaac warrarã Jacob mãik'aapa Esaú
19 Abraham warra Isaac nãga bapachi. 20 Isaac cuarenta años iru bak'ãri, Rebeca ome miak'ãiji. Mãgà wêra Betuel k'au; Labán âpewêra paji. Ma arameorã Padán Aram eujãde p'anapachida. 21 Rebeca warra t'ok'aa pada perã, iru pari Isaacpa Tachi Ak'õremaa ùt'aa t'âpachi warra teemerã. Tachi Ak'õrepa ûriji irua ùt'aa iidida. Rebeca biak'oo beeji. 22 Mamîda chi warrarã bide chõo p'anapachida. Mapa Rebecapa k'îsiaji: “Nãgá bait'ee pùrã, mù ¿k'ãare–it'ee chok'ai baima?” aji. Maap'eda ichia Tachi Ak'õremaa ùt'aa iidiji.
23 Tachi Ak'õrepa p'anauji:
—Pù bide p'anùùrãdeepa uchiadait'eeda aji, p'uuru waibùa omé. T'odai naaweda, ma warrarã omé chõomaa p'anadait'ee. Aba waibùara pait'eeda aji, chi apema k'ãyaara; mãgá chi naapema chi t'êepema jua ek'ari bait'ee.
24 T'ok'ãri, warra omé t'oji. 25 Chi naapema k'ara p'oree, k'arara bada perã, t'â bùjida Esaú.b 26 Chi t'êepema chi naapema bùùrùde jita bada perã, t'â bùjida Jacob.c
Isaac sesenta años iru baji Rebecapa ma warrarã t'ok'ãri.
Esau–it'ee p'ua–e paji chi ak'õrepa net'aa atabëiit'ee pada
27 Ma warrarã wari wãjida. Tawara p'aneedak'ãri, Esaú nejùrùyaa bapachi. Jõdee Jacob teeda beei awaa bapachi. 28 Isaacpa Esaú audú k'inia iru bapachi irua nejùrùdadepema warraa k'opachi perã. Jõdee Rebecapa Jacob k'iniara iru bapachi.
29 Ewari aba Jacobpa lenteja joomaa baji. Mãga nùde Esaú mêepa pacheji. Sê mãik'aapa jarrapisia nâbaji, audú nipada perã.
Mapa Esaupa mãgaji:
30 —Mùmaa k'opipáde aji, ma lenteja p'oree, mù jarrapa piu wã perã. (Ma lenteja p'oree iidida k'aurepa Esaú ichiaba t'âjarapachida Edom; jara k'inia bù “p'oree”.)
31 Mãpai Jacobpa p'anauji:
—Pùa mùmaa teeru pùrã mù ak'õrepa pùmaa net'aa atabëiit'ee bùdepema iru piuk'ãri, mãgara k'opiyada aji.
32 Esaupa mãgaji:
—Pia bùda aji. Mù jarrapa piu wãpù. Piuru pùrã, ¿k'ãare–it'ee mùa naapema warrapa net'aa jâapari k'inia bayama? aji.
33 Mãpai Jacobpa mãgaji:
—Juraapáde aji, Tachi Ak'õre k'îrapite pùa wãara ma net'aa mùmaa teeit'ee.
—Mãgada, aji Esaupa.
Mãgá Esaupa ichi ak'õre net'aa jâait'ee pada Jacobmaa teeji.
34 Mãpai Jacobpa k'opiji pan lenteja ome.
Esaupa k'op'eda mãik'aapa ne–inaa top'eda, wãji, maarepida k'îsia–ee ichia jaradade chi âpemamaa.