Abrahampa chi warra Isaac–it'ee wêra jùrùda
24
1 Sara jai–idaada t'êepai, Abraham taarã chonaa baji, mãik'aapa Tachi Ak'õrepa iru bendiciaji ne–inaa jõmaade.2 Ewari aba Abrahampa t'âji ichi mimiapataarã poro waibùa mãik'aapa mãgaji:
—Mù warra Isaac–it'ee na Canaán eujãdepema wêra k'inia–e bùda aji. Pùchi jua bàji mù mak'arade 3 mãik'aapa Tachi Ak'õre, ùt'aripemaarã Ak'õre Waibùa, na eujãdepemaarã Ak'õre Waibùa k'îrapite juráaji pùa Canaandepema wêra atapi–e pait'ee mù warramaa. 4 Ma k'ãyaara wåji mù ëreerã eujãdee mãik'aapa mama wêra jùrùpáde aji.
5 Mãpai ma mimiapataarã poro waibùapa mãgaji:
—Mamîda wêra mùa unuru che k'inia–e pùrã, mùa ¿sãga ooyama? aji. Mãgara ¿pù warra mamaa ateeik'ã? aji.
6 Abrahampa mãgaji:
—Mãga–eda aji. 7 Tachi Ak'õre Waibùa, chi ùt'ari baparipa mù uchiapiji mù ak'õreerã eujãdeepa mãik'aapa mù aneeji na eujãde mù, mùchideerã ome nama p'anapataadamerã irua jaradak'a. Iruata pù k'aripait'ee. Irua ángel pëiit'eeda aji, pù naa, pùa wêra unumerã mãik'aapa ãpùtee aneemerã. 8 Chi wêra pù ome che k'inia–e bù pùrã, p'oyaa oo–e mùa oopi bùk'a. Mùa pù ùtrùa–e pait'ee. Mamîda mùa k'inia–e bù mù warra mamaa wãmerã.
9 Mãpai ma mimiapataarã poro waibùapa ichi jua Abraham mak'arade bùji mãik'aapa Tachi Ak'õre k'îrapite juraaji ooit'ee Abrahampa jaradak'a. 10 Maap'eda Abraham net'aa iru badadepema net'aa pi–ia p'e ataji. Camello diez ârù bùp'eda, wãji Abraham âpema Najor p'uurudee. Mãgà p'uuru Mesopotamia eujãde bù. 11 K'ewara panaji p'uuru k'idaa pania t'ùpatamãi. Mama ma hora wêraarã pania t'ùde chepachida. Pozo k'ait'a ichi camello âipip'eda, 12 Tachi Ak'õremaa ùt'aa iidimaa beeji: “Tachi Ak'õre Waibùa, pù mù chipari Abraham Ak'õre Waibùa. Mù, mù chipari ome chupùria k'awaapáde aji. Ak'ùpipáde aji, pùa mù chipari Abraham k'inia iru bapari mãik'aapa mù k'aripapáde aji, chi warra–it'ee wêra unu atamerã. 13 Mù nãpai pozo k'ait'a beeit'ee nãpema wêraarã pania t'ùde cheruta misa. 14 Mùa wêramaa jarak'ãri: ‘Mù chupùria k'awáaji mãik'aapa pania topíji pùa chok'ode ateerudepema’ nãga p'anaupíji: ‘Tóji mãik'aapa mùa pania teeit'ee pù camelloorãmaa.’ Mãgapù mùa k'await'ee chisãgà wêrata pùa k'inia bù. Ma awara mãgá k'await'eeda aji, pùa wãara mù chipari k'aripamaa bù.”
15 Ùt'aa t'âmaa bù misa, unuji wêra chewã chok'o ome pania t'ùde. Mãgà t'âjarapachida Rebeca. Iru Betuel k'au paji. Mãgà Betuel Abraham âpema Najorpa ooda paji chi wêra Milca ome. 16 Rebeca k'îra wãree baji. Waide ùmùk'îra ome k'ãi–e baji. Iru pozode pak'ãri, chi chok'o ipuruji mãik'aapa ãpùtee wãit'ee paji.
17 Mamîda ma mimiapataarã poro waibùa iru t'êe p'iraji mãik'aapa pania iidiji:
—Mù chupùria k'awaapáde aji. Pù chok'odepema pania ma–ãri topipáde aji.
18 Ma wêrapa mãgaji:
—Topáde aji.
Aramata ma chok'o ik'iadeepa edaa jirap'eda, topiji.
19 To aupak'ãri, Rebecapa ma mimiapataarã poromaa mãgaji:
—Mùa pù camelloorãmaa pania teeit'eeda aji, ãchia to k'iniata todamerã.
20 Aramata ichi chok'o weeji ne–animalaarã topatamãi. Mãpai pania waibùa uaji ma camello jõmaarãmaa topiit'ee.
21 Mãga bùde ma mimiaparipa k'îup'ee ak'ùmaa baji. Pia k'awa k'inia baji nata wãara chi wêra jùrù bada; Tachi Ak'õrepa unupida.
22 Ma topida t'êepai, Abraham mimiaparipa ma wêramaa k'âdepema nêedee teeji. Mãgà perá seis gramos iru baji. Jâ bùji ma wêra k'âde. Ichiaba pulsera omé nêedee teeji. Mãgà cien gramos waa iru baji. 23 Mãpai ma mimiaparipa iidiji:
—¿Pù ak'õre, k'asaa t'âjarapatama? aji. ¿Paraak'ã aji, pùmãi sãma k'ãiit'ee mù, mù k'õp'ãyoorã jida?
24 Ma wêrapa p'anauji:
—Mù Betuel k'auda aji. Ma Betuel Najorpa ooda chi wêra Milca ome. 25 Paraada aji, p'ûajara p'ooda camelloorã aùde jêra p'aneedamerã mãik'aapa net'a tau k'odamerã. Ichiaba parã k'ãidamerã paraada aji.
26 Mãpai Abraham mimiapari bedabaidachi mãik'aapa Tachi Ak'õremaa nãga ùt'aa t'âji: 27 “¡Wãara pù mù chipari Abraham Ak'õre Waibùa! Pù ichita t'ãri pia bapari iru ome. Pùa mù pia ak'ù bajida aji, Abraham ëreerãmaa aneeda perã.”
28 Rebeca p'iradachi teedaa chi nawemaa jarade.
29 Chi âpema Labán teeda bada perã, p'ira wãji ma pania t'ùpatamaa Abraham mimiapari k'îrachuude. 30 Mãga ooji ma k'âdepema, pulsera omé nêedee teeda chi âpewêramaa unuda perã mãik'aapa ûrida perã chi âpewêrapa nepùrùda. Labanpa Abraham mimiapari ununaji ma pania t'ùpata k'ait'a chi camelloorã ome. 31 Labanpa mãgaji:
—Temaa chepáde aji. Tachi Ak'õrepa pù bendiciapari. Nama taawa beenaapáde aji, mùa nek'opari, k'ãipari iru bairã pù–it'ee, pù camelloorã–it'ee.
32 Mãpai teedaa wãjida. Labanpa camelloorã ârùùpa net'aa ùrabai atap'eda, nek'opiji mãik'aapa pania aneeji ma mimiapari chi k'õp'ãyoorã ome jîru sùùdamerã. 33 Ichiaba chik'o aneeji ãra–it'ee.
Mamîda Abraham mimiaparipa mãgaji:
—Ne–inaa parãmaa jara–emaa p'oyaa chik'o k'o–eda aji.
Labanpa p'anauji:
—Jarapáde aji.
34 Mãpai ma mimiaparipa nãga nepùrùji:
—Mù Abraham mimiaparida aji. 35 Tachi Ak'õrepa Abraham bendiciapari perã irua iru bù ovejaarã, p'ak'aarã, nêe, p'arat'a, mimiapataarã, camelloorã, burroorã. 36 Ma awara Abraham wêra Sarapa warra aba t'oji chõtrãa baji mîda. Mãgùpa ichi net'aa jõmaweda jâait'ee. 37 Abrahampa mù pëiji wêra jùrùde chi warra–it'ee. Irua k'inia–e bù ichi bapari Canaán eujãdepema wêra atamerã. Mapa Tachi Ak'õre k'îrapite mùmaa juraapiji Canaandepema wêra atapi–e pait'ee chi warramaa. 38 Ma k'ãyaara mù pëiji namaa, ichi ak'õre eujãde, ichi ëreerã t'ãide wêra jùrùmerã chi warra–it'ee. 39 Mãga jarak'ãri, mùa irumaa iidiji: “Mamîda Mùchi Waibùa, chi wêra mù ome che k'inia–e bù pùrã, ¿sãgapù ooyama?” aji. 40 Mãpai irua p'anauji: “Mù Tachi Ak'õre ode nipaparida aji. Iruata pù k'aripait'ee. Irua ángel pëiit'ee pù ome pia wãmerã ode wãde mãik'aapa wêra unumerã mù ak'õre ëreerã t'ãide. 41 Chi wêra ëreerãpa iru pëi k'iniada–e p'anù pùrã pù ome, p'oyaa oo–e pait'eeda aji, Tachi Ak'õre k'îrapite pùa juraadak'a.”
42 ’Mãgá idi k'ewara mù paji ma pania t'ùpatamãi. Mù pachek'ãri, nãga ùt'aa t'âmaa beeji mù chipari Abraham Ak'õre Waibùamaa: “Pùa wãara mù k'aripa bù pùrã na wã nide, 43 mù nama bù misa na pania t'ùpatamãi, wêra chepíji. Mãgùmaa mùa pania iidiit'ee. Jarait'ee: ‘Chupùria k'awáaji mãik'aapa pùchi chok'odepema pania ma–ãri mùmaa topíji.’ 44 Mãga bùde ma wêramaa jarapíji: ‘Topáde aji, mãik'aapa mùa pù camelloorãmaa ichiaba pania teeit'eeda aji, ãchia to k'iniata todamerã.’ Mãgapù mùa k'awayada aji, chisãgà wêra pùa jùrùt'erada mù chipari warra–it'ee.”
45 ’Mùa ma ùt'aa t'âmaa bada waide aupa–e baji unuk'ãri Rebeca cheru chok'o ome. Irua pania atap'eda, mùa iidiji: “Chupùria k'awáaji. Mùmaa pania teepáde” aji. 46 Aramata ma chok'o ichi ik'iadeepa edaa jiraji mãik'aapa mãgaji: “Tóji mãik'aapa pù camelloorãmaa ichiaba pania teeit'eeda aji, ãchia to k'iniata todamerã.” Maap'eda mùmaa mãik'aapa mù camelloorãmaa pania topiji. 47 T'êepai mùa iidiji irumaa: “¿Pù, k'ai k'auma?” aji. Mãpai irua p'anauji: “Mù Betuel k'auda aji. Betuel uchiajida aji, Najordeepa chi wêra Milca ome.” Mùa mãga ûrik'ãri, k'âdepema, pulsera omé jâ bùji. 48 Mãpai bedabaidachi gracias jarait'ee mù chipari Abraham Ak'õre Waibùamaa, iruata mù ode chewãde pia ak'ùda perã mãik'aapa nama aneeda perã, ma awara wêra Abraham ëreerãdepema mùmaa ak'ùpida perã. 49 Ârá k'îra jîp'a jarátù parãpa k'îsia p'anù mùa k'awamerã. ¿T'ãri pia oodaik'ã aji, mù chiparipa k'inia bùk'a wa mãga–e?
50 Mãpai Labanpa Betuel ome p'anaujida:
—¿Na jõma Tachi Ak'õrepa oopida–ek'ã? ajida. Taipa p'oyaa jarada–e. 51 Nama bù Rebeca. Atéeji pù chipari warra–it'ee, Tachi Ak'õrepa mãga k'inia bairã.
52 Abraham mimiaparipa mãga ûrik'ãri, bedabaidachi ichi tau bùùrù te jãde t'õbairumaa mãik'aapa gracias jaraji Tachi Ak'õremaa. 53 Mãpai ne–inaa aneedap'edaa êt'a ataji Rebecamaa teeit'ee. Teeji ne–inaa nêedee ooda, p'arat'adee ooda, p'aru paara. Ichiaba net'aa pia teeji chi âpemamaa mãik'aapa chi nawemaa. 54 Ma t'êepai Abraham mimiapari chi k'õp'ãyoorã ome nek'ojida mãik'aapa k'ãijida. Aù norema iidiji Rebeca ateeit'ee.
55 Mamîda chi nawepa chi âpema ome mãgajida:
—At'ãri k'ãima diez p'aneedapáde ajida. Maap'eda iru pù ome wãyada ajida.
56 Mamîda ma mimiaparipa mãgaji:
—Mãga–eda aji. Tachi Ak'õrepa mù k'aripaji wêra unu atamerã mù chipari warra–it'ee. Âraweda mù chiparimaa pëidapáde aji.
57 P'anaujida:
—Ma wêramaa iididáma ajida.
58 Rebeca t'â pëijida.
Mãpai irumaa iidijida:
—¿Na eperã ome wã k'inia bùk'ã? ajida.
Irua p'anauji:
—Wãit'eeda aji.
59 Mãgá pëijida Rebeca chi ak'ùpari ome, Abraham mimiapari ome mãik'aapa chi k'õp'ãyoorã ome. 60 Rebeca uchiai naaweda, irumaa nãgà pedee pia jarajida:
—Tai âpewêra, k'inia p'anùda ajida, pùa warra chok'ara t'omerã mãik'aapa pùdeepa uchiadait'eerãpa ãchi k'îra unuamaa iru p'anapataarã p'uuru p'oyaadamerã.
61 Mãpai Rebeca ichi mimiapataarã ome camello ârù bataudap'eda, wãjida Abraham mimiapari ome. Mãga paji Abraham mimiaparipa Rebeca ateeda mamãik'aapa.
62 Maapai Isaac Néguev eujãde bapachi. Waya che baji pania t'ùpatamãiipa. Mãgà pozo t'âjarapachida Lajay Roí.a 63 Mama bùde k'eupodopa p'asiade uchiak'ãri, camelloorã chewãda unuji.
64 Rebecapa ichiaba ak'ùk'ãri, Isaac unuji mãik'aapa ùrabaidachi camello ârùùpa. 65 Mãpai Abraham mimiaparimaa iidiji:
—¿K'aima aji, jã eperã p'ûajarade chewã tachimaa?
Mãpai Abraham mimiaparipa p'anauji:
—Jãgà mù chiparida aji.
Mãpai Israeldepema wêraarãpa oopatap'edaak'a ãchi ùmùk'îra ome naa unudak'ãri, Rebecapa ichi k'îra wãk'aji p'aru nãusaapa.
66 Mãpai Abraham mimiaparipa ichia ooda jõmaweda nepùrùji Isaacmaa.
67 Maap'eda Isaacpa Rebeca ateeji ichi nawe te ne–edee ooda badamaa chi wêra papiit'ee. Isaacpa chi wêra k'inia iru baji. Mãgá wêpaji ichi t'ãri p'ua bada chi nawe jai–idaada perã.