Abraham wêra Sara jai–idaada
23
1-2 Taarã pak'ãri, Abraham ichideerã ome p'ananajida Quiriat Arbá p'uurude, ichiaba t'âjarapatap'edaa Hebrón. Ma p'uuru Canaán eujãde bù. Mama Sara jai–idaaji. Ciento veintisiete años iru baji. Abraham jêeji ichi wêra–it'ee, mãik'aapa chi–ùaji.3 Sara jai–idaada t'êepai Abraham wãji pedeede ma eujãde p'anapatap'edaa hititaarã ome. Mãgaji:
4 —Mù parã eujãde k'îra tewaraa mîda, k'inia bù mùmaa eujã neto pëidamerã mù wêra aùde ùait'ee.
5 Hititaarãpa p'anaujida:
6 —Eperãarã poro waibùa, ¡ûripáde! ajida. Pù k'inia p'anù tai t'ãide. Jùrùt'erapáde ajida, jãùra pipùara bù, aùde pùchi wêra ùamerã. Taidepema apidaapa pùmaa eujã wãak'ada–eda ajida, pùchi wêra aùde ùamerã.
—Wãara k'inia p'anù pùrã mùa mùchi wêra ùamerã parã eujãde, mù pari chupùria iididapáde aji, Zojar warra Efronmaa. 9 Iru eujãde bù mãu te t'âjarapata Macpela. Mãgà mùa neto k'inia bù chi valor pari. Mãgá na eujãde mùa jãùra iru bayada aji.
10 Ma hitita pida Efrón mama su–ak'ù bada perã ichi auk'aarã ome, ichia p'anauji. Ma p'uuru t'îupatamãi wãyaa wãdap'edaarã jõmaarã taide mãgaji:
11 —¡Eperãarã poro waibùa, mãga–eda! aji. Ma eujã chi mãu te ome pùmaa pari teeit'ee. Mùchi auk'aarã nama p'anùùrãpa ûri p'anù mùa jara bù. Pari teeit'eeda aji. Ma mãu tede pùchi wêra ùapáde aji.
—Chupùria k'awaapáde aji. Mù pedee ûríji. Mùa k'inia bù pùa p'arat'a jitamerã ma eujã mãik'aapa chi mãu te pari. Maap'eda mùchi wêra mama ùait'eeda aji.
14 Mãpai Efronpa p'anauji:
15 —Eperãarã poro waibùa, ûripáde aji. Ma eujã p'arat'a tau cuatrocientos vale bùda aji. Aupedeenaadáma aji, ma k'ap'ùa. Pùchi wêra mama ùapáde aji.
16 Abrahampa ijãaji. Efronpa jaradak'a hititaarã taide p'arat'a tau cuatrocientos p'aaji.
17 Mãgá Efronpa eujã Macpela mãu te ome neto pëiji Abrahammaa. Ma eujã Mamré eujã oriente eere baji. Efronpa ma eujã neto pëiji chi pak'uru aùde p'anù ome. 18 Mãga ooji hititaarã taide mãik'aapa awaraa ma p'uurude t'îupatade p'anadap'edaarã taide.