Tachi Ak'õrepa k'awada Abrahampa ichide wãara ijãa bù
22
1 Taarã pak'ãri, Tachi Ak'õrepa k'awa k'inia baji Abrahampa ichide wãara ijãa bù wa ijãa–e bù.Mapa Abraham t'â jaraji:
—¡Abraham!
Abrahampa p'anauji:
—Nama bùda aji.
2 Tachi Ak'õrepa mãgaji:
—Pù warra apai iru bù, pùa k'inia iru bù, Isaac atap'eda, wãpáde aji, Moria eujãdee mù–it'ee peep'eda, paa jõpimerã altar ârù mùa jarait'ee ee nok'ode.
3 Aù norema tap'edaweda Abrahampa chi burro atap'eda, t'ùpù puuji ma primicia–it'ee. T'ùpù ma burro ârù bùp'eda, atanaji chi mimiapataarã omé, chi warra Isaac, mãik'aapa wãjida Tachi Ak'õrepa jaradamaa.
4 K'ãima õpeemaa Abrahampa t'ùmùweda unuji Tachi Ak'õrepa ee jarada. 5 Mãpai chi mimiapataarãmaa mãgaji:
—Nama burro ome p'aneedapáde aji. Mù wãit'ee mù warra ome Tachi Ak'õremaa ùt'aa t'âde. Maap'eda, chedait'eeda aji.
6 Abrahampa ma t'ùpù Isaac ik'ia ârù bùji. Mãpai lowero mãik'aapa t'ùpùtau atap'eda, ãchi omeeweda wãjida.
7 Ma wãdade Isaacpa iidiji:
—¿Tate?
Abrahampa p'anauji:
—¿K'ãarema aji, warra?
Isaacpa mãgaji:
—Tachia t'ùpù mãik'aapa t'ùpùtau iru p'anùda aji. ¿Mamîda sãma bùma aji, oveja chak'e, peep'eda, Tachi Ak'õre–it'ee paa jõpidait'ee?
8 Abrahampa p'anauji:
—Tachi Ak'õrepa ichiak'au teeyada aji, oveja paa jõpidait'ee.
Mãgá wãjida. 9 Tachi Ak'õrepa jaradamãi panadak'ãri, Abrahampa altar ooji mãik'aapa t'ùpù k'îra p'e ataji. Mãpai chi warra Isaac jâ ataji mãik'aapa bùji altarde ma t'ùpù ârù.
—¡Abraham, Abraham!
—Mù nama bùda aji.
12 Mãpai ma angelpa mãgaji:
—Pù warra peenaapáde aji. Mùa k'awa bù pù wãara Tachi Ak'õre Waibùade ijãa bù mãik'aapa iru waawee bù, pù warra apai iru bù irumaa teeit'ee wãak'a–e pada perã.
13 Abrahampa ak'ùk'ãri, unuji oveja ùmùk'îra cachode jõi nâbù pak'uru jep'edaa bù juade. Atanap'eda mãik'aapa peep'eda, Tachi Ak'õre–it'ee paa jõpiji ichi warra pari.
14 Ma t'êepai Abrahampa ma ee t'â bùji “Tachi Ak'õrepa teepari ne–inaa falta bù”. Mapa at'ãri jarapata: “Ee nok'ode Ak'õre Waibùapa ne–inaa falta bù teepari.”
—Tachi Ak'õre Waibùapa nãga jara bù: “Pù warra apai iru bù mùmaa teeit'ee wãak'a–e pada perã, mùchi t'âde mùa nãga juraaru. 17 Mùa pù bendiciait'ee. Pùdeepa uchiapiit'ee warrarã chok'ara, lucero pajãde nâbaparik'a mãik'aapa ipu nãusaa p'usa ide paraaparik'a. Ãra chõodak'ãri, ãchi k'îra unuamaa iru p'anapataarã ichita p'oyaadait'ee. 18 Pùdeepa uchiadait'eerã k'ap'ùa mùa na p'ek'au eujãdepemaarã pia ak'ùit'eeda aji, pùa ooda perã mùa jaradak'a.”
19 Maap'eda Abraham Isaac ome wãjida chi mimiapataarãpa nùmaa p'anadap'edaamaa. T'êepai wãjida Berseba p'uurudee ichi te pidaarã p'anapatap'edaamaa.
Najordeepa uchiadap'edaarã
20 Taarã pak'ãri, Abrahampa ûriji ichi ëreerãpa jara pëidap'edaa. Mãgá k'awaji ichi âpema Najor wêra Milcapa warrarã t'oda. 21 Chi naapema t'â bùjida Uz. Aù eere t'oji Buz; aù eere Quemuel. Quemueldeepa uchiaji Aram. 22 Ma t'êepai t'oji Quésed, Jazó, Pildás, Yidlaf mãik'aapa Betuel. 23 Ma Betuel Rebeca ak'õre paji. Ma warrarã ocho t'oji Abraham âpema Najor wêra Milcapa. 24 Ma awara Najorpa warrarã ooji chi wêra k'ãipari Reumá ome. Mãùrã paji Tébaj, Gaján, Tajás mãik'aapa Macá.