Abraham warra Isaac t'oda
21
1 Tachi Ak'õrepa Sara pia ooji. Ichia jaradak'a ooji Sara ome. 2 Mãgá Sara biak'oo beeji mãik'aapa Tachi Ak'õrepa jaradak'a añomaa Abraham warra paraaji, iru chonaa baji mîda. 3 Abrahampa iru t'â bùji Isaac. 4 Tachi Ak'õrepa jaradak'a tauchaa bùjida Isaac k'ap'ùade t'odadeepa k'ãima ocho pak'ãri. 5 Abraham cien años iru bak'ãri, Isaac t'oji. 6 Chi warra t'ok'ãri, Sarapa k'îsiaji: “Tachi Ak'õrepa mù o–îapa ëipiji warra t'opida perã. Jõmaweda nãga ûrirutaarã auk'a o–îa p'anadait'ee. 7 ¿K'aipa ijãak'aji mùa warra t'oi chõtrãa bùta mãik'aapa Abraham chonaa bùta? Mamîda wãara mùa iru warra t'oji.”Abrahampa Agar Ismael ome jëret'aada
8 Isaac tawara pak'ãri, chi nawepa ju amaaji. Ma ewate Abrahampa fiesta waibùa ooji.
9 Mamîda Sarapa unuji ma Egiptodepema wêra warra Ismaelpa Isaac oo iru bù. 10 Maperã Sarapa Abrahammaa jaranaji:
—Jã esclava ichi warra ome ãyaa pëipáde aji. Mù warra Isaacpa pù net'aa auk'a jâa–e pait'eeda aji, jã esclava warra ome.
11 Mãga ûrik'ãri, Abraham t'ãri p'ua beeji, Ismael ichiaba chi warra pada perã.
12 Mamîda Tachi Ak'õrepa irumaa mãgaji:
—K'îsianaapáde aji, Ismael pari wa pù esclava pari. Sarapa jara bùk'a jõmaweda oopáde aji, mùa pùmaa jaradak'a ooit'ee perã Isaacdeepa uchiadait'eerã ome. 13 Ichiaba Ismael pù warra perã, irudeepa mùa p'uuru chok'ara uchiapiit'ee.
14 Aù norema tap'edapodopa Abrahampa ne–e paniapa ipuru bù chik'o ome bùji Agar ek'arrade mãik'aapa Agar chi warra ome awara ãyaa pëiji. Mãgá ãra pariatua wãjida eujã pania wêe bùmaa Berseba p'uurudee wãpata ode. 15 Ma pania jõdaik'ãri, Agarpa Ismael bùji pak'uru jep'edaa bù ek'ari k'ûrasaa bùde. 16 Mãpai ãyaa wãji chi warramãiipa unu k'inia–e bada perã chi warra mãgá piu wã. T'ùmà su–ak'ù beek'ãri, chi warra jêe nâbeeji.
17 Tachi Ak'õrepa Agar warra jêepi ûrik'ãri, ichi angelpa mãgaji:
—¿Agar, sãga nâbùma? aji. Waaweenaapáde aji, Tachi Ak'õrepa ûrida perã pùchi warra jãma jêe nâbù. 18 Wåji pù warra atade mãik'aapa béeji iru ome. Tachi Ak'õrepa Ismael chupùria k'awaait'ee. Irudeepa p'uuru waibùa uchiapiit'eeda aji.
19 Mãpai Tachi Ak'õrepa pania poátrù uchia bùmãi Agarmaa ak'ùpiji. Mãgá irua chi ne–e iru bada paniapa ipurup'eda, Ismaelmaa topiji. 20-21 Mãgá Tachi Ak'õrepa Ismael k'aripaji. T'êepai p'ananajida Parán eujãde pania wêe bùmãi. Mama p'anùde Ismael ematrùma trù k'awaa beeji. Taarã pak'ãri, chi nawepa Egiptodepema wêra jùrùteeji.
Abrahampa pacto ooda rey Abimélec ome
22 Maapai rey Abimélec wãji Abraham badamaa pedeede. Ichi soldaorã poro waibùa Ficol auk'a wãji. Mama p'anùde Abimelecpa Abrahammaa mãgaji:
—Unu p'anùda ajida, Tachi Ak'õre Waibùapa pù k'aripapari ne–inaa jõmaade. 23 Maperã mùa k'inia bù Tachi Ak'õre Waibùa k'îrapite pùa nama jaramerã chõo–e pait'ee mùchi eere p'anùùrã ome, mùdeepa uchiadait'eerã ome. K'inia bù pùa juraamerã t'ãri pia bapariit'ee mù ome mãik'aapa nãgà eujãdepemaarã ome, mù pù ome t'ãri pia baparik'a.
24 Abrahampa p'anauji:
—Tachi Ak'õre k'îrapite mùa juraa bù: Mãga ooit'eeda aji.
25 Mamîda Abrahampa nepùrùji Abimelecmaa iru mimiapataarãpa pozo jãri atadap'edaa Abraham mimiapataarã juadeepa.
26 Mãga ûrik'ãri, Abimelecpa p'anauji:
—Mùa ârapai pù ideepa mãga k'awaa cheruda aji. K'awa–e bùda aji, k'airåpata mãga oodap'edaa.
27 Mãpai Abrahampa ovejaarã, p'ak'aarã ome atap'eda, teeji Abimelecmaa. Ma ewateweda ãra pacto oojida chõoda–ee p'anapataadait'ee. 28 Maap'eda Abrahampa ichi ovejaarã p'e iru bùdepema oveja wêra k'aipee siete awara ataji.
29 Mãga unuk'ãri, Abimelecpa iidiji:
—¿K'ãare–it'ee ma ovejaarã ãyaa atajima? aji.
30 Abrahampa p'anauji:
—Na oveja siete pùmaa teeit'eeda aji, pùa k'awaamerã mùa wãarata jaraji taipa ma pozo k'oro atada ak'ãri.
31 Maperã ma pozo t'â bùjida “Berseba”, mama Tachi Ak'õre k'îrapite juraadap'edaa perã chõoda–ee p'anapataadait'ee.
32 Mãgá pedeedap'eda, Abimélec chi k'õp'ãyo Ficol ome ãpùtee wãjida filisteorã eujãdee.