Abraham Abimélec ome
20
1 Maapai Abraham banaji Néguev eujãde. Beeji Guerar p'uurude, Cades punto Sur punto esajîak'a. 2 Mama p'anùde ma p'uurudepema rey waaweepa Abrahampa jaraji chi wêra Sara ichi âpewêra. Mapa Guerardepema rey Abimelecpa Sara ichi temaa aneepiji chi wêra papiit'ee. 3 Mamîda ma ewate p'ãrik'ua Abimélec k'ãimok'araaji.Ma k'ãimok'araa bùde Tachi Ak'õrepa jaraji:
—Pù piuit'eeda aji, chîara wêra atada perã.
4 Mamîda Abimelecpa at'ãri Sara t'õbai–e bada perã, p'anauji:
—Mùchi Waibùa, ¿sãgá mù piupiyama aji, at'ãri ma wêra t'õbai–e bùta? 5 Abrahampa mùmaa chi âpewêrada aji. Chi wêrapa pida auk'a mãga jaraji. Mùa ãchi pedee ijãaji. T'ãri jîp'a mãga ooji. Maarepida k'achia oo–e pajida aji.
6 Mãpai ma k'ãimok'araade Tachi Ak'õrepa p'anauji:
—Mùa k'awa bùda aji, pùa ãra pedee ijãada. Mapa ma wêra t'õbaipi–e paji, ne–inaa k'achia mù k'îrapite oonaamerã. 7 Mamîda ârá ma wêra teepáde aji, chi ùmùk'îramaa, iru mù pedee jarapari perã. Iruata pù pari mùmaa chupùria iidiit'eeda aji, pù piunaamerã. Mamîda ma wêra pëi–e pùrã chi k'imamaa, pù, pùchideerã ome piudait'eeda aji.
8 Aù norema tap'eda Abimélec p'irabaip'eda, ma k'ãimok'araada nepùrùji ichi mimiapataarãmaa. Mãga ûridak'ãri, p'eradachida.
9 Ma t'êepai Abimelecpa Abraham t'â pëiji mãik'aapa irumaa mãgaji:
—¡Pù k'aurepa mù perá piujida! aji. ¿Sãap'eda mù, mùchi jua ek'ari p'anùùrã ome k'achiade baaipi k'inia bùma? aji. Mãga ooik'araa bùda aji. 10 ¿K'ãata k'îsia bajima aji, ma seewa mùmaa jarak'ãri?
Mãgá Abimelecpa Abraham ùtrùat'aaji.
11 Mãpai Abrahampa p'anauji:
—Mùa k'îsiaji nãpemaarãpa Tachi Ak'õre Waibùa waaweedak'aa. Ãchobee baji mù peedai jîak'aapa mù wêra k'ap'ùa. 12 Mamîda wãara jarajida aji, jarak'ãri iru mù âpewêra. Iru mù ak'õre k'au; mamîda mù nawedeepa uchiada–e. Mapa mùa ataji mùchi wêra papiit'ee. 13 Tachi Ak'õrepa jarak'ãri mù uchiamerã mù ak'õre tedeepa, mùa Saramaa mãgaji: “Pùa mù wãara k'inia iru bù pùrã, tachi unurutaarãmaa jarapáde aji, pù mù âpewêra, pù k'ap'ùa mù peenaadamerã.”
14 Mãpai Abimelecpa Sara teeji Abrahammaa. Ma awara teeji ovejaarã, p'ak'aarã, esclavoorã esclavaarã ome.
15 Mãpai Abrahammaa mãgaji:
—Na eujã mëreda aji. Jùrùt'erapáde aji, parã aùde p'anapataadamerã.
16 Mãpai Saramaa mãgaji:
—Mùa ne–inaa teeda pù âpemamaa p'arat'a tau mil vale bùda aji. Ma ne–inaa k'aurepa parã ome nipapataarãdepema apidaapa pù ãpùte pedee k'achia jaradaik'araa bùda aji.
17-18 Abimelecpa Sara atak'ãri ichi wêra papiit'ee, Tachi Ak'õrepa iru tedepema wêraarã jõmaweda k'ayaapiji warra t'onaadamerã. Mapa Abimelecpa Sara teek'ãri Abrahammaa, irua rey Abimélec pari, chi wêra pari mãik'aapa ãchi tede mimiapataarã pari ùt'aa iidiji. Mãgá Tachi Ak'õrepa ãra jõmaweda jùpaji warrarã t'odamerã.