Tachi Ak'õrepa Sodoma mãik'aapa Gomorra p'uuru jõpit'aada
19
1 K'eu wãk'ãri, ma angeleerã omé Sodoma p'uurude panajida. P'uuru t'îupata k'ait'a eperãarã chip'epatamãi Lot su–ak'ù baji. Lotpa ma angeleerã unuk'ãri, bainâ beep'eda, ãra auteebaiji. 2 Mãpai mãgaji:—Eperãarã poro waibùarã, mùa k'inia bù parã mù temaa chedamerã, mùa parã k'aripa k'inia bairã. Mama parã bùùrù sùùdai mãik'aapa k'ãidai. Nu tap'edaweda parã ode pia wãdayada aji.
Mamîda ma angeleerãpa mãgajida:
—Gracias. Pù tede k'ãida–e. Plazade k'ãidait'eeda ajida.
3 Mamîda Lotpa jara bùpa wãjida iru temaa. Mama panadak'ãri, Lotpa chik'o joopip'eda, ãramaa teeji pan levadura wêe bù ome k'odamerã.
4 Teeda p'anùde k'ãidai naaweda, Sodoma p'uurudepema ùmùk'îraarã; k'ûtrãarã, chonaarã paara chejida mãik'aapa te wap'ùra atajida. 5 Mãpai Lotmaa biajida:
—¿Sãma p'anùma ajida, jã eperãarã omé chedap'edaa? Taawaa uchia p'e atapáde ajida. Tai ãra ome auk'a k'ãidait'ee.
—K'õp'ãyoorã, mù chupùria k'awaadapáde aji. K'achia oonaadapáde aji, mùa auteebaida eperãarã ome. 8 Mùa k'au awêraarã teeyada aji. Mãùrã waide ùmùk'îraarã ome k'ãida–e p'anù. Pãchia oo k'iniata oodai mãùrã ome. Mamîda na eperãarãmaa ne–inaa k'achia oonaadapáde aji, mùa ãra auteebaida perã mù tede p'aneedamerã.
9 Mamîda ma ùmùk'îraarãpa k'iniada–e paji. Mapa mãgajida:
—¡Pù nãpema–epù! ¡Tai chok'apari–epù! ¡Ãyaa wãpáde ajida, maa–e pùrã pùmaa ne–inaa audupùara k'achia oodayada! ajida.
Lot jita atadait'ee paji mãik'aapa ichi tedepema puerta ãrit'aadait'ee paji. 10 Mamîda angeleerãpa juadeepa teedaa jidiu atajida mãik'aapa chi puerta jâa nâbùjida. 11 Mãpai ma ùmùk'îraarã; k'ûtrãarã, chonaarã paara tau p'ãriuk'oodachida. Ma puerta maarepida unudak'aa paji ma angeleerãpa tau p'ãriupik'oodap'edaa perã.
12 Mãpai ma angeleerãpa Lotmaa iidijida:
—¿Na p'uurude awaraa eperãarã paraak'ã ajida, pùa atee k'inia bù pùchideerã ome? Ma eperãarã jõmaweda atap'eda ãchi net'aa ome, wãdapáde ajida, 13 na p'uurudeepa ãyaa, taipa nãpemaarã jõmaweda peek'oodait'ee perã. Tachi Ak'õrepa ãchi ome waa choo–eda aji, jõmaarã k'îrapite audú ne–inaa k'achia ooi awaa p'anadairã. Na p'uuru jõt'aadait'eeda ajida.
14 Mãpai Lot wãji chi wiurã padait'ee padaarãmaa jarade auk'a ma p'uurudeepa ãyaa uchiadamerã.
—¡Isapai chedapáde aji, p'uurudeepa taawaa, Tachi Ak'õrepa na p'uuru jõt'aait'ee perã!
Mamîda ãchia Lot pedee ijãada–e paji k'îsiadap'edaa perã iru pedidata bù.
15 Tap'edapodopa angeleerãpa Lotmaa mãgajida:
—¡Isapai p'irabáiji mãik'aapa wåji pùchi wêra ome, pù k'aurã omé ome! ¡Piu k'iniada–e p'anù pùrã, wåtù taipa na p'uurudepemaarã jõmaweda peek'oodait'ee perã!
16 Mamîda Lot audupai taarãdaida perã, angeleerãpa iru, chi wêra, chi k'aurã ome juadeepa ãyaa ateejida. Mãga oojida Tachi Ak'õrepa ãra chupùria k'awaada perã.
17 P'uurudeepa t'ùmà panadak'ãri, ángel abaapa mãgaji:
—¡Eedee p'iradapáde! aji. ¡Ãpùtee ak'ùnáatù mãik'aapa ak'ùnâ p'aneenáatù na eujã jewedaade wãyaapari ode! Ee jêra beemaa wãdapáde aji, piunaadamerã.
18 Mamîda Lotpa mãgaji:
—Mãga–eda aji. Mù chupùria k'awaadapáde aji. 19 Wãara, parãpa tai chupùria k'awaa p'anù, k'aripamaa p'anadairã tai piunaadamerã. Mamîda tai jã eede panada–e pai. Nama ode wãdade tai piudayada aji. 20 Nama k'ait'a p'uuru k'aipee bù. Araadai jãmaa wãdait'ee. ¡Jãmaa pëipáde aji, maa–e pùrã tai piudayada! aji.
21 Mãpai abaapa mãgaji:
—Pùa jaradak'a ooit'eeda aji. Ma p'uurude p'anùùrã pee–eda aji, parã mamaa wãruta perã. 22 Mamîda isapai mamaa wãdapáde aji, parã panadai naaweda, mùa maarepida p'oyaa oo–e perã.
Ma p'uuru t'âjarapachida Zoar.
23 Tap'edaweda Lot paji Zoar p'uurude. 24 Mãpai Tachi Ak'õrepa ùt'ariipa pëiji hielo k'oi tauk'a, t'ùpùtau ome Sodoma ârù mãik'aapa Gomorra ârù. 25 Ma eujã jewedaade beeda p'uurudepemaarã jõmaweda jõ atapëiji; ãchia ne–uudap'edaa paara. Aba Zoar p'uuru aupai jõt'aa–e paji. 26 Mamîda chewã nidade Lot wêrapa ãpùtee ak'ùk'ãri, t'ã padachi mãik'aapa mãuk'a padachi.
27 Aù norema Abraham tap'edaweda wãji Tachi Ak'õre ome pedeemaa badamaa. 28 Ak'ùk'ãri Sodoma, Gomorra p'uurumaa, ma eujã jewedaa jõmaweda nari jârak'awaa nâbaji. 29 Mãgá Tachi Ak'õrepa Lot bapariidamãi jõmaweda jõt'aaji. Mamîda Abraham k'aurepa Lot jõpi–e paji.
Lotdeepa uchiadap'edaarã
30 Ma t'êepai Lot waawee beeji Zoar p'uurude beeit'ee. Mapa chi k'au omé iru bada ome mêe wãjida, ee paraamaa. Mama mãu te uriade p'aneejida.
31 Mama p'anùde ewari aba chi k'au naapemapa mãgaji chi t'êepemamaa:
—Mù ak'õre chonaadaruda aji. Nama wê–e ùmùk'îraarã tachi atadait'ee ãchi wêraarãk'a na eujãdepemaarãpa oopatak'a. 32 Maperã vino topidáma mù ak'õremaa, iru piu beemerã. Mãpai iru ome k'ãidáma. Mãgá biak'oodayada aji, mãik'aapa tachideepa uchiadait'eerã paraait'eeda aji.
33 Ma ewateweda p'ãrik'ua chi ak'õre vinopa piupit'aajida. Mãùmisa chi k'au naapema k'ãiji iru ome. Mamîda piu bada perã, Lotpa k'awa–e paji chi k'au jêra beek'ãri mãik'aapa p'irabaik'ãri.
34 Aù norema chi naapemapa mãgaji chi t'êepemamaa:
—Nuweda mù k'ãijida aji, mù ak'õre ome. Waya piupidáma vinopa pù idi p'ãrik'ua iru ome k'ãimerã. Mãgá tachi omeeweda warra t'odayada aji.