Tachi Ak'õrepa Abrahammaa warra oopida
18
1 Maapai Abraham at'ãri bapachi Mamré eujãde pak'urura jêra badamãi. Ewari aba imat'ùpa Abraham ichi te ne–edee ooda t'îupatamãi su–ak'ù bù misa, Tachi Ak'õrepa ichi unupiji. 2 Abrahampa ak'ùk'ãri, unuji eperãarã õpee ak'ùnâ p'anù ichi k'îrapite. Unu ataruta, ãra auteebaiji mãik'aapa bedabaidachi ãra k'îrapite ichi tau bùùrù eujãde t'õbairumaa. 3 Mãpai irua mãgaji:—Mùchi Waibùa, chupùria k'awáaji. Âraweda wãnaadapáde aji. 4 Pùa k'inia bù pùrã, pania atapiit'ee jîru sùùdamerã mãik'aapa âidamerã pak'uru ek'ari, k'ûrasaa bairã. 5 Parã nama wãyaa wãda perã, mùa chik'o joopiit'ee k'odamerã, wãdai naaweda.
—Pia bùda ajida. Pùa jaradak'a oopáde ajida.
6 Aramata Abraham ichi te ne–edee oodade t'îuji mãik'aapa Saramaa mãgaji:
—Isapai harina pipùara bù veinte kilo atapáde aji, mãik'aapa maat'ùp'eda, pan âpùpáde aji.
7 Mãpai Abraham p'iraji ichi p'ak'a p'e iru badamaa mãik'aapa p'ak'a chak'e aba pipùara bù jùrùt'eraji. Mãgà teeji ichi mimiaparimaa peemerã mãik'aapa chuumerã. Aramata ma mimiaparipa ooji chiparipa jaradak'a. 8 Ma p'ak'a chiara chuuda awara Abrahampa teeji queso p'ak'a juba ome. Ichi juadoopa ma chik'o ãramaa teenaji k'odamerã ma pak'uru ek'ari k'ûrasaa badamãi.
9 Ãra nek'omaa p'anù misa, Abraham arii baji. Aupadak'ãri, Abrahammaa iidijida:
—¿Sãma bùma ajida, pù wêra Sara?
—Teeda bùda aji.
10 Mãpai Tachi Ak'õrepa mãgaji:
—Añomaa mù waya cheit'eeda aji. Maapai pù wêra Sarapa warra t'oit'eeda aji.
Mãùmisa Sarapa Abraham ãpùteik'a eereepa ûrimaa baji ãchi te ne–edee ooda t'îupatamãiipa. 11 Abraham chonaa baji. Ma awara chi wêra Sara chõtrãa baji; waa bi k'ayaak'aa paji. 12 Maperã Sarapa ma pedee ûrik'ãri, ëidachi mãik'aapa k'îsiaji: “¿Sãgá o–îa warra oodaima tai nãgá chonaa chitoonùta?”
13 Mãpai Tachi Ak'õrepa Abrahammaa iidiji:
—¿Sãap'eda Sara ëidachima? aji. ¿Ijãa–e bùk'ã warra t'oi, chõtrãa bù mîda? 14 ¿K'ãare net'aata Ak'õre Waibùapa p'oyaa oo–e paima? aji. Añomaa mù waya cheit'ee mãik'aapa Sarapa warra t'oit'eeda aji.
15 Mãga ûrik'ãri, Sara p'eradaida perã, meraji:
—Mù ëi–e bajida aji.
Mamîda Tachi Ak'õrepa p'anauji:
—Mùa k'awa bùda aji, pù ëida.
Abrahampa chupùria iidida Sodoma pidaarã pari
16 Maap'eda ma chedap'edaarã p'irabaijida mãik'aapa wãjida Sodoma p'uurudee. Abrahampa waawipai k'õp'ãyanaji. 17 Ode wãdade Tachi Ak'õrepa k'îsiaji: “Mùa ooit'ee bù Abrahammaa jaraipia bùda aji. 18 Irudeepa p'uuru chok'ara uchiapiit'ee mãik'aapa iru k'ap'ùa na p'ek'au eujãdepemaarã jõmaarã–it'ee mùa ne–inaa pia ooit'ee. 19 Mùa iru jùrùt'eraji mù ûraa jarateemerã ichi warrarãmaa mãik'aapa ichi te pidaarãmaa. Mãgá ãrapa k'awaadai oodait'ee mùa jara bùk'a mãik'aapa auk'a k'awaadai t'ãri pia nipapataadait'ee mù k'îrapite. Mãga p'anadak'ãripù, mùa jaradak'a ãramaa pia ooit'ee.” 20 Mãga k'îsiap'eda, Tachi Ak'õrepa mãgaji Abrahammaa:
—Jõmaarãpa jarapata Sodomadepemaarã, Gomorradepemaarã ome audú ne–inaa k'achia ooi awaa p'anapata. 21 Ârá araa wãit'eeda aji, k'await'ee wãara ãchia audú k'achia ooi awaa p'anù wa mãga–e.
22 Omeeweda wãjida Sodomadee. Mamîda Abraham Tachi Ak'õre ome beeji. 23 Abraham iru k'ait'apai wãp'eda, iidiji:
—¿Peeit'eek'ã aji, eperãarã pia beerã k'achia beerã ome auk'a? 24 ¿Chupùria k'awa–ek'ã aji, cincuenta t'ãri pia beerã paraa pùrã? Cincuenta paraa pùrã, ¿ma p'uuru jõmaweda jõpiit'eek'ã? aji. 25 ¡Mãga oonáaji! Audú ne–inaa k'achia ooda–e p'anù pùrã, ¿sãga ãra auk'a jõpiima? Pùa eperãarã jõmaarã ak'ùpari mãik'aapa pùa aupai jarai chisãgùùrãpa pia oopata; chisãgùùrãpa k'achia oopata. ¡Chi pia beerã jõpinaapáde! aji.
26 Mãpai Tachi Ak'õrepa mãgaji:
—Cincuenta t'ãri pia beerã unuru pùrã Sodoma p'uurude, mãgara ma p'uuru jõmaweda jõpi–eda aji.
27 Mamîda Abrahampa waya iidiji:
—Mù chupùria k'awaapáde aji. Mùa k'awa bù pùta Jõmaarã Ak'õre Waibùa; jõdee mù eperã jîp'aa. 28 Mamîda mùa k'awa k'inia bù eperã pia beerã cuarenta y cincopai paraa pùrã, ¿ma p'uuru jõmaweda jõpiit'eek'ã? aji.
Tachi Ak'õrepa p'anauji:
—Cuarenta y cinco t'ãri pia beerã unuru pùrã, mãgara p'uuru jõmaweda jõpi–eda aji.
29 Mãpai Abrahampa mãgaji:
—Cuarenta paraa pùrã, ¿jõmaweda jõpiit'eek'ã? aji.
Tachi Ak'õrepa p'anauji:
—Cuarenta unuru pùrã, mãgara jõmaweda jõpi–eda aji.
30 Mamîda Abrahampa waya iidiji:
—Mù ome k'îraunaapáde aji, audú iidimaa bairã. Mamîda mùa k'awa k'inia bù eperã pia beerã treintapai paraa pùrã, ¿jõmaweda jõpiit'eek'ã? aji.
Ak'õrepa p'anauji:
—Treinta unuru pùrã, mãgara jõmaweda jõpi–eda aji.
31 Abrahampa waya mãgaji:
—Mùchi Waibùa, mù k'ùùrù k'isua pùk'a bù nãgá audú iidimaa bairã. Mamîda pia beerã veintepai paraa pùrã, ¿jõmaweda jõpiit'eek'ã? aji.
Tachi Ak'õrepa p'anauji:
—Veinte unuru pùrã, mãgara jõmaweda jõpi–eda aji.
32 Mãpai Abrahampa iidiji:
—Aai Tachi Ak'õre, mù chupùria k'awaapáde aji. K'îraunáaji mùa audú iidimaa bairã. Nadeepa waa mùa iidi–e pait'ee. Eperã pia beerã diezpai paraa pùrã, ¿ma p'uuru pidaarã jõmaweda jõpiit'eek'ã? aji.
—Ma eperãarã diez k'aurepa p'uuru pidaarã jõmaweda pee–eda aji.
33 Tachi Ak'õre Abraham ome pedee aupak'ãri, wãji. Mãpai Abraham ichi temaa cheji.