Tachi Ak'õrepa Abrammaa ne–inaa pia ooit'eeda ada
17
1 Abram noventa y nueve años iru bak'ãri, Tachi Ak'õrepa ichi unupip'eda, mãgaji irumaa:—Mù Jõmaarã Ak'õre Waibùa. T'ãri pia nipaparíiji mù k'îrapite. 2 Mãgá mùa ooit'ee pù ome pacto oodade jaradak'a. Pùdeepa warrarã chok'ara uchiapiit'eeda aji.
3 Mãpai Abram bedabaidachi Tachi Ak'õre k'îrapite ichi tau bùùrù eujãde t'õbairumaa.
Mãga nùde Tachi Ak'õrepa mãgaji:
4 —K'irãpapáde aji, mùa pacto ooda pù ome. Pùdeepa warrarã chok'ara uchiapiit'ee. Ma awara pùdeepa p'uuru chok'ara uchiadait'ee. 5 Waa Abram ada–eda aji. Idideepa t'âjarapataadait'ee Abraham,a mùa pù p'uuru pidaarã k'îra t'ãdoo ak'õre papiit'ee perã. 6 Pùdeepa mùa uchiapiit'ee p'uuru chok'ara mãik'aapa reyrã. 7 Mùa pù ome pacto oodade jaradak'a ichita ooit'eeda aji, pù ome mãik'aapa pùdeepa uchiadait'eerã ome. Mù ichita pù mãik'aapa ãra Ak'õre Waibùa pait'ee. 8 Pùmaa mãik'aapa ãramaa mùa teeit'ee Canaán eujã jõmaweda; pù awaraa eujãdepemak'a baparimãi. Pù mãik'aapa pùdeepa uchiadait'eerã na eujã chipariirã ichita padait'ee mãik'aapa mùmaa ùt'aa t'âpataadait'ee.
9 Ichiaba Tachi Ak'õrepa mãgaji Abrahammaa:
—Mamîda pù mãik'aapa pùdeepa uchiadait'eerã jõmaarã ome mùa pacto oodade jaradak'a oodapáde aji. 10 Nãgá ak'ùpidai mùa pactode jaradak'a oo k'inia p'anù. Pùa mãik'aapa pùdeepa uchiadait'eerãpa tauchaa bùpítù parã ùmùk'îraarã k'ap'ùade. 11 Ùmùk'îraarã me e t'ùùdapáde aji. Mãga oodak'ãri, ak'ùpidait'ee mù pedee ijãa p'anù. 12 Idideepa tauchaa bàtù jõma warrarã t'odap'edaa k'ap'ùade. Mãga óotù warrarã t'odadeepa k'ãima ocho pak'ãri; parã esclavoorã warrarã jida ichiaba. 13 Mãga oodapáde aji, ùmùk'îraarã jõmaarãmaa; parã tede t'odap'edaa, chi netodap'edaa paara. Apida mãga oo–ee baik'araa bù. Mãga oodak'ãri, ma tauchaa ichita iru p'anadait'ee pãchi k'ap'ùade mãik'aapa pãchi piurutamaa k'irãpadait'ee mùa pacto ooda parã ome. 14 Chi mãga oo k'inia–e bù uchiapidapáde aji, parã t'ãideepa, mù pactode jara bùk'a oo k'inia–e bairã.
15 Ichiaba Tachi Ak'õrepa mãgaji Abrahammaa:
—Pù wêra waa Saray t'âjarapataada–eda aji. Idideepa t'âjarapataadait'eeda aji, Sara.b 16 Mùa iru bendiciait'ee. Warra t'opiit'ee. Irudeepa warrarã chok'ara uchiadait'eeda aji, mãik'aapa ma warrarãdeepa reyrã chok'ara uchiadait'eeda aji. Ichiaba irudeepa p'uuru chok'ara uchiadait'eeda aji.
17 Waya Abraham bedabaidachi Tachi Ak'õre k'îrapite ichi tau bùùrù eujãde t'õbairumaa mãik'aapa ëidachi ichi t'ãridepai k'îsiaru misa: “¿Ùmùk'îra cien años iru bùpa warra ooik'ã? ¿Sarapa warra t'oik'ã aji, noventa años iru bùta?”
18 Mãga k'îsiap'eda, Abrahampa Tachi Ak'õremaa mãgaji:
—Mùa k'inia bùda aji, mù warra Ismaelmaa pùa ne–inaa pia oomerã. ¿Pùa jaradak'a oo–e paik'ã mù warra Ismael k'ap'ùa pari?
19 Tachi Ak'õrepa p'anauji:
—Mùa jarajida aji, pù, pùchi wêra ome warra aba oodait'ee. T'â bùit'ee Isaac. Iru ome mãik'aapa irudeepa uchiadait'eerã ome ichita ooit'ee pù ome pacto oodade jaradak'a. 20 Pùa iididak'a mùa ichiaba Ismael bendiciait'ee. Irudeepa warrarã chok'ara uchiapiit'ee. Irudeerã p'uuru waibùa pait'ee mãik'aapa eperãarã poro waibùarã doce uchiadait'ee. 21 Mamîda mùa pactode jaradak'a ooit'ee Isaac ome. Añomaa Sarapa ma warra t'oit'eeda aji.
22 Tachi Ak'õre Abraham ome pedeep'eda, wãji. 23 Aù ewateweda Abrahampa tauchaa bùpiji chi warra Ismael k'ap'ùade, ichi k'ap'ùade paara. Ichiaba tauchaa bùpiji ichi esclavoorã k'ap'ùade; ichi tede t'odap'edaarã, chi netoda awaraarã juak'aawa paara. Abrahampa mãùrãdepema ùmùk'îraarã jõmaweda k'ap'ùade tauchaa bùpiji Tachi Ak'õrepa jaradak'a. 24 Mãgá tauchaa ùmùk'îraarã k'ap'ùade bùpik'ãri, Abraham noventa y nueve años iru baji. 25 Ismael trece años iru baji. 26 Ma ewateweda Abrahampa mãik'aapa chi warra Ismaelpa tauchaa bùpijida ãchi k'ap'ùade. 27 Ichiaba ma ewate Abraham mimiapataarãpa auk'a tauchaa bùpijida ãchi k'ap'ùade. Mãga oojida chi mimiapataarã ùmùk'îraarã Abraham tede t'odap'edaarãpa, chi awaraa eujãdepemaarã juak'aawa netodap'edaarãpa paara.