Abram warra Ismael t'oda
16
1 Saray warra t'ok'aa paji. Mamîda ichia iru baji esclava Egiptodeepa aneedap'edaa. Mãgà wêra t'âjarapachida Agar.2 Mãgá Saraypa warra t'ok'aa pada perã, ichia Abrammaa mãgaji:
—Tachi Ak'õrepa mùmaa warra tee–e bairã, k'ãipáde aji, mù esclava Agar ome. Mãgá ichi k'ap'ùa mù warra paraayada aji.
Abrampa ooji chi wêrapa jaradak'a. 3 Saraypa ma Egiptodepema esclava teeji chi ùmùk'îramaa, aù ome warra oomerã ichi–it'ee. Mãga ooji diez años Canaán eujãde p'anadak'ãri.
4 Abram Agar ome beek'ãri, biak'ooji. Mamîda mãgá biak'oo beek'ãri, Agar audua beeji mãik'aapa Saray waa pia ak'ù–e paji.
5 Mãpai Saraypa Abrammaa mãgaji:
—¡Pù k'aurépata Agarpa mù pia ak'ù–e bùda! aji. Mùata iru teeji pùmaa warra oomerã iru ome. Mamîda ârá biak'oo bairã, irua mù pia ak'ù–e bù. Tachi Ak'õrepa jarai k'ai k'aurepa mù mãgá iru bù; pù k'aurepa wa mù k'aurepa.
6 Abrampa p'anauji:
—Iru pùchi esclava. Oopáde aji, pùchia oo k'iniata iru ome.
Mãpai Saraypa Agar pia–ee iru bapachi. Mapa Agar jirabodoji. 7 Mamîda Agar ode wãde Tachi Ak'õrepa ángel pëiji irumaa. Ma angelpa iru unu ataji eperãarã wê–emãi, Sur p'uurudee wãpari ode. Mama pania poátrù uchia bùmãi baji.
8 Mãpai ma angelpa Agarmaa mãgaji:
—Agar, Saray esclava, ¿sãmãik'aapa cheruma aji, mãik'aapa sãmaa wãma?
Agarpa p'anauji:
—Jirabododa aji, mù chipari ik'aawaapa.
9 Mãpai angelpa mãgaji:
—Wãpáde aji, waya Saraymaa mãik'aapa nejõmaade chok'ek'ee bapáde aji.
10 Ichiaba ma angelpa Agarmaa mãgaji:
—Pùdeepa warrarã chok'ara uchiadait'eeda aji. P'oyaa juasiada–e pait'eeda aji, chok'ara paraait'ee perã. 11 Pùa warra t'oit'ee. T'â bùit'ee Ismaela Tachi Ak'õrepa pù biapi ûrida perã. 12 Iru tausaaree bait'eeda aji, burro waide taunomaa–e bùk'a. Jõmaarã ome chõoit'ee mãik'aapa jõmaarã iru ome chõodait'ee. Baamaa bait'ee apidaa jua ek'ari. Chi âpemaarã ik'aawaapa t'ùmà bapariit'eeda aji, ãra k'îra unuamaa iru bapariit'ee perã.
13 Mama Agar Tachi Ak'õre ome pedeeda perã, Tachi Ak'õre t'â bùji “Ak'õre Waibùapa mù unupari”. Mãgaji:
—Mù Tachi Ak'õre ome unuji mîda, at'ãri chok'ai bù.
14 Maperã ma pania poátrù uchia bùmãi t'âjarapachida “chi mù unupari chok'ai bù pozo”. Ma pozo Cadedeepa Beredmaa wãpari o esajîak'a bù.