Tachi Ak'õrepa Abrammaa warra oopiit'eeda ada
15
1 Ma t'êepai ewari aba Tachi Ak'õrepa Abrammaa k'ãimok'araa pùk'a bùde pedeeji:—Abram, waaweenaapáde aji, mùa pù jâapari perã. Pùa mùde ijãapari perã, mùa pùmaa ne–inaa pia ooit'eeda aji.
2 Mamîda Abrampa p'anauji:
—Tachi Ak'õre, mù Ak'õre Waibùa, ¿pùa sãgá mù pia ooit'eema aji, mù warra wêe bùta? Mù net'aa atabëiit'eeda aji, Damascodepema Eliezer ome, mãgà mù mimiapari perã. 3 Pùa mùmaa warra tee–e bairã, mù mimiaparipa mù net'aa jâait'ee.
4 Mãpai Tachi Ak'õrepa mãgaji:
—Pù mimiaparipa pù net'aa jâa–e pait'eeda aji. Pùchi warrápata jâait'eeda aji.
5 Mãpai Tachi Ak'õrepa Abram taawaa wãpiji mãik'aapa irumaa mãgaji:
—Pia ak'ùpáde aji, pajã mãik'aapa p'oyaa juasiai pùrã, lucero juasiapáde aji. Pùdeepa uchiadait'eerã jãgá cho–k'ara paraait'eeda aji.
6 Abrampa ijãaji Tachi Ak'õrepa jarada. Maperã Tachi Ak'õrepa iru k'achia wêe unupachi. 7 Tachi Ak'õrepa waya pedeeji:
—Mù pù Ak'õre Waibùa. K'irãpapáde aji, mùata pù caldeorã eujãdepema Ur p'uurudeepa uchia atada pùmaa na eujã teeit'ee.
8 Abrampa iidiji:
—Mamîda Tachi Ak'õre, ¿sãgá mùa k'awayama aji, na eujã mù–it'ee?
9 Tachi Ak'õrepa mãgaji:
—Aneepáde aji, p'ak'a aba, chivo aba mãik'aapa oveja aba, chi año õpee iru bee. Ichiaba aneepáde aji, tortola, paloma pichón ome.
10 Abrampa ooji Tachi Ak'õrepa jaradak'a. Ma ne–animalaarã aneeji Tachi Ak'õremaa. Mãpai ma ne–animalaarã chaachaa peep'eda, t'ooji mãik'aapa chi k'ap'ùa t'ooda k'îraichaa bùji. Mamîda ma ipanaarã peep'eda, t'oo–e paji. 11 Ãkosoorã ùt'ùùpa baai chejida ma ne–animalaarã k'ap'ùa piuda k'odait'ee. Mamîda Abrampa jërek'ooji. 12 K'eu wãk'ãri, Abram tap'ok'eedachi. Mapa k'ãidachi. Mãga nùde p'eradachi, audú p'ãriudaida perã.
13 Mãga bùde Tachi Ak'õrepa mãgaji:
—Pùdeepa uchiadait'eerã p'anapataadait'eeda aji, eujã awaraade mimiamaa chîara–it'ee. Mama esclavo p'anadait'ee mãik'aapa mãpemaarãpa ãra miapi iru p'anadait'ee cuatrocientos años. 14 Mamîda mùa ichiaba miapiit'ee ma eujãdepemaarã, ãchia pùdeepa uchiadait'eerã esclavo papidait'ee perã. Maap'eda pùdeepa uchiadait'eerã net'aa pi–ia ome awara ãi wãdait'ee. 15-16 Taarã pak'ãri, pùdeepa uchiadait'eerã uchiada k'îmari uchiadap'eda, waya namaa chedait'ee. Mãgá taarãdait'ee mùa amorreorã namãik'aapa waide jëre–e pait'ee perã. Ãrapa ne–inaa audú k'achia oodak'ãrita, mùa ãra na eujãdeepa jërek'ooit'ee. Mamîda pùdeepa uchiadait'eerã chedai naaweda, pù k'ãiwee, chonaa piuit'eeda aji.
17 P'ãrik'ua pada perã, ma p'ãriude k'uuruk'a bù nãgà ome uchia chejida: ok'ok'îra urua, nari jârak'awaa mãik'aapa îpirã urua. Wãyaajida ma ne–animalaarã k'ap'ùa piuda esajîak'a.
18 Ma ewate mãga unupik'ãri, Tachi Ak'õrepa Abram ome pacto ooji. Mãgaji:
—Na eujã teeit'eeda aji, pùdeepa uchiadait'eerãmaa; Egiptode to bùmãiipa to waibùa Éufrates parumaa. 19 Pia jarait'eera teeit'ee pùdeepa uchiadait'eerãmaa nãgùùrã eujã: quenitaarã, quenizitaarã, cadmoneorã, 20 hititaarã, ferezeorã, refaitaarã, 21 amorreorã, cananeorã, gergeseorã, jebuseorã; mãgùùrã eujã.