Abrampa Lot k'aripa atada
14
1 Lot Sodoma p'uurude bak'ãri, jura paraaji. Maapai Amrafel rey paji Sinar eujãde; Arioc rey paji Elasar eujãde; Quedorlaómer rey paji Elam eujãde; Tidal rey paji Goyim eujãde. 2 Mãgà reyrãpa mãik'aapa ãchi eere p'anadap'edaarãpa jura chõojida nãgà reyrã ome: Sodomadepema rey Bera ome; Gomorradepema rey Birsá ome; Admadepema rey Sinab ome; Zeboyindepema rey Semeber ome; Beladepema rey ome. Mãgà Bela p'uuru ichiaba Zoar apachida. 3 Ma rey joisomaarãpa pedeeteejida auk'a chõodait'ee chi apemaarã ome. Mapa ãchi soldaorã chip'e atadap'eda, cheepurujida Sidín eujã jewedaade, Mar Muerto k'ait'a. 4 Doce años wãyaaru misa, ma reyrã p'anapachida rey Quedorlaómer jua ek'ari. Mamîda ma año trecede pedeeteejida chõodait'ee ichi eere p'anadap'edaarã ome.5 Año catorcede Quedorlaómer, awaraa reyrã ichi eere p'anadap'edaarã ome wãjida Astarot Carnayin eujãdee. Mama p'anùde refaitaarã p'oyaajida. T'êepai p'oyaajida zuzitaarã Jam eujãde mãik'aapa emitaarã Save Quiriatayin eujãde. 6 Ichiaba p'oyaajida horeorã Seír ee jêra bùmãi mãik'aapa mãùrã t'êe wãjida Parán eujã jewedaadee eujã pania wêe bù ide. 7 Chewãdade Quedorlaómer, ichi eere p'anadap'edaarã ome pachejida Enmispat eujãde; mãgà eujã ichiaba t'âjarapatap'edaa Cades. Ma eujã wãyaadade peek'oojida amalecitaarã mãik'aapa amorreorã, chi Jazezón Tamar eujãde p'anadap'edaarã.
8 Sidín eujã jewedaade ma reyrã joisomaarã Sodomadepema, Gomorradepema, Admadepema, Zeboyindepema mãik'aapa Beladepema chõojida 9 Elamdepema rey Quedorlaómer, ichi eere p'anadap'edaa reyrã ome; Tidal Goyimdepema, Amrafel Sinardepema, mãik'aapa Elasardepema Arioc ome. 10 Ma eujã jewedaa Sidinde uria paraaji ne–inaa p'ãimaa k'arak'araa ome. Chi chõo atua wãdak'ãri, ma Sodomadepema rey mãik'aapa Gomorradepema rey jîchoodachida ãchi eere p'anadap'edaarã ome mãik'aapa ûk'uru ma uriade baaik'oodachida. Chi apemaarã reyrã atua wãdap'edaarã ãchi eere p'anadap'edaarã ome jîchoodachida ee jêra beemaa.
11 Mãgá rey Quedorlaómer eere p'anadap'edaarãpa p'oyaajida mãik'aapa p'e ateejida Sodomadepemaarã mãik'aapa Gomorradepemaarã, ãra ne–animalaarã, ãra net'aa paara. 12 Abram sobrino Lot Sodomade bapachi perã, iru preso ateejida ichiaba ichi net'aa ome. 13 Mamîda eperã ãchi juadeepa uchiadai badapa Abrammaa jara cheji Lot ateedap'edaa. Maapai Abram chi hebreo apatap'edaa at'ãri bapachi Mamré eujãde pak'urura jêra bùmãi. Ma Mamré amorreo paji. Ichi, chi âpemaarã Escol, Aner ome Abram eere p'anajida.
14 Abrampa Lot ateedap'edaa k'awaak'ãri, ichi te pidaarã mãik'aapa mimiapataarã chõo k'awaa beerã ichi tede waridap'edaarã chip'e atap'eda, wãjida Quedorlaómer t'êe. Abram eerepemaarã trescientos dieciocho paji. Êp'enajida Dan p'uurude. 15 P'ãrik'ua ãra atu p'anùde Abram eere p'anadap'edaarã awara–awaraa t'oodap'eda, ãra ome chõonajida. Ãchi jîchoo wãrutade Abram ichi eere p'anadap'edaarã ome t'êe wãjida Hobá p'uurude parutamaa; Damasco p'uuru norte eere. 16 Mama Abram eere p'anadap'edaarãpa p'oyaajida. Net'aa jõmaweda p'e aneejida, eperãarã jida, Lot, ichi te pidaarã ome, awaraa wêraarã atee wãdap'edaarã paara. Ichiaba Quedorlaomerpa net'aa jãri atee wãdap'edaa paara aneejida.
Melquisedecpa Abrammaa pedee pia jarada
17 Abrampa ichi eere p'anadap'edaarã ome Quedorlaómer mãik'aapa reyrã iru eere p'anadap'edaarã p'oyaajida. Ãpùtee chewãdade Sodomadepema rey Abram ome unuit'ee cheji eujã jewedaa Savede; ichiaba t'âjarapatap'edaa Reyde. 18 Mama bùde Salén p'uurudepema reypa pan, vino ome aneeji. Ma rey t'âjarapachida Melquisedec. Mãgà Tachi Ak'õre Waibùa–it'ee p'aare mimia oopachi.
19 Mãgùpa Abrammaa ma pan, vino ome teek'ãri, na pedee pia jaraji:
—Tachi Ak'õre Waibùa, chi pajã mãik'aapa eujã oodapa pù pia ak'ù bait'eeda aji. 20 Iru jõmaarã k'ãyaara waibùara bùda aji, pù k'aripada perã pù k'îra unuamaa iru p'anapataarã p'oyaamerã.
Mãpai Abrampa Melquisedecmaa teeji net'aa diezdepema chaa aba jãri atadap'edaa Quedorlaómer juak'aawa.
21 Maap'eda Sodomadepema reypa Abrammaa mãgaji:
—Mùmaa eperãarã teepáde aji. Jõdee pù net'aa ome beepáde aji.
22 Mamîda Abrampa p'anauji:
—Tachi Ak'õre, chi pajã mãik'aapa eujã ooda k'îrapite mùa nãga jara bù. 23 Pù net'aa apida ata k'inia–e bù. Jâk'ara pùjida ata k'inia–e mù chanclade jâit'ee. Mùa k'inia–e bù pùa jaramerã pù k'aurepa mù p'arat'ara bù. 24 Mùchi–it'ee maarepida ata k'inia–e bù; aba mù ome nipapataarãpa chik'o k'odap'edaa. Mamîda net'aa teepáde aji, mù k'õp'ãyoorã Mamremaa, Anermaa mãik'aapa Escolmaa, ãrapa ma chõodade mù k'aripadap'edaa perã.