Lot Abram ik'aawaapa uchiada
13
1 Abram Egiptodeepa chi wêra ome mãik'aapa jõma chi net'aa iru bada ome wãdak'ãri, waya chejida Néguev eujãdee. Ichi âpema warra Lot ãchi ome auk'a wãji. 2 Abram p'arat'ara baji, nêe, p'arat'a, ne–animalaarã iru bada perã. 3 Neguevdeepa piak'ãa chejida Betel p'uuru k'ait'a ichi naaweda bapariidamãi; Betel p'uuru, Hai p'uuru esajîak'a. 4 Mama baji ma altar ichia naaweda ooda. Mama Tachi Ak'õremaa ùt'aa t'âji.5 Chi chîapa Abramk'a Lot jida p'arat'ara baji, ovejaarã, p'ak'aarã mãik'aapa esclavoorã iru bada perã. 6 Mamîda ãra p'anadap'edaamãi p'ûajara mak'ùara wê–e paji. Araa–e paji ãchi omeerã ne–animalaarã–it'ee. 7 Maperã Abram ne–animal ak'ùpataarã Lotdeerã ome chõopachida. Ma awara cananeorã, ferezeorã ome at'ãri ma eujãde p'anapachida.
8 Maperã ewari aba Abrampa Lotmaa mãgaji:
—Mù pù ome ëreerãda aji. Pia–e bù chõodait'ee mù pù ome maa–e pùrã mù ne–animal ak'ùpataarã përeerã ome. 9 Jãma bù eujã. Jùrùt'eráji pùchia k'iniata. Mù ik'aawaapa wãpáde aji. Pù juaraare wãru pùrã, mù juabi eere wãit'ee. Jõdee pù juabi eere wãru pùrã, mù juaraare wãit'eeda aji.
10 Mãga jarak'ãri, eede p'anajida. Maperã Lotpa t'ùmà ak'ùji eujã jewedaa Jordán to ik'aawa bada Zoar p'uuru parumaa. Ma jõmaweda pia unuji pania paraada perã Tachi Ak'õrepa Edende ne–uudak'a mãik'aapa Egipto eujãk'a. (Maapai Tachi Ak'õrepa waide jõt'aa–e baji Sodoma p'uuru Gomorra p'uuru ome.) 11 Mãgá ma eujã pia unuda perã, Lotpa eujã jewedaa jõmaweda Jordán to ide bada jùrùt'eraji. Maap'eda oriente eeree wãji. Mãgá Abram, Lot ome awara–awaraa p'aneejida. 12 Abram Canaán eujãde beeji. Jõdee Lot banaji ma eujã jewedaade p'uuru k'aipee beemãi, Sodoma p'uuru k'ait'a. 13 Sodoma pidaarã k'achia–idaa p'anapachida. Audú ne–inaa k'achia k'îra t'ãdoo oopachida Tachi Ak'õre k'îrapite.
14 Lot wãda t'êepai, Tachi Ak'õrepa Abrammaa mãgaji:
—Pù ak'ùnâ bùmãiipa ak'ùpáde aji, norte eere, sur eere, oriente eere; occidente eere paara. 15 Na eujã jõmaweda pùa unu bù mùa teeit'ee pùmaa mãik'aapa pùdeepa uchiadait'eerãmaa, ichita iru p'anadamerã. 16 Warrarã pùdeepa uchiadait'eerã p'oyaa juasia–e pait'ee. Audú chok'ara paraait'ee ipu tau nãusaak'a. Eperãarãpa ipu tau nãusaa p'oyaa juasiadak'aak'a, mãga pùk'a pùdeepa uchiadait'eerã p'oyaa juasiadak'aa pait'ee. 17 Wãpáde aji, na eujã jõmaweda ak'ùde, mùa pùmaa teeit'ee perã.
18 Mãgá Abram wãji. Mata Hebrón p'uuru k'ait'a banaji. Beeji pak'urura jêra bùmãi eperã t'âjarapatap'edaa Mamré eujãde. Arii Tachi Ak'õre–it'ee altar ooji.