Tachi Ak'õrepa Abram jùrùt'erada
12
1 Ewari aba Tachi Ak'õrepa Abrammaa mãgaji:—Ata bëipáde aji, pù eujã, pù ëreerã, pù ak'õre te mãik'aapa wãpáde aji, mùa ak'ùpiit'ee bù eujãmaa. 2 Mùa pùdeepa p'uuru chok'ara uchiapiit'ee mãik'aapa pù bendiciait'ee. Jõmaarãpa pù t'o p'anadait'ee, pù k'ap'ùa mùa eperãarã k'aripait'ee perã. 3 Mùa pia ak'ù bait'ee pùmaa ne–inaa pia oorutaarã. Mamîda k'achia ooit'ee pùmaa ne–inaa k'achia oorutaarã. Pù k'ap'ùa na p'ek'au eujãdepemaarã jõmaweda k'aripait'eeda aji.
4 Abram wãji Tachi Ak'õrepa jaradak'a. Setenta y cinco años iru bak'ãri, Jarandeepa uchiaji Canaán eujãdee wãit'ee. Ichi ome Lot auk'a wãji. 5 Ateeji chi wêra Saray, chi âpema warra Lot, jõmaweda ichia net'aa iru bada mãik'aapa eperãarã ichi ome Jarán p'uurude p'anapatap'edaarã. Canaande panadak'ãri, 6 ãchi ma eujã jõmaade wãyaajida Siquén p'uurude parutamaa. Mama baji pak'urura jêra bù t'âjarapatap'edaa Moré. Maapai cananeorã mama p'anapachida. (Mãgùùrã Noé warra Camdeepa uchiadap'edaarã paji.)
7 Abram mama bùde Tachi Ak'õrepa ichi unupiji mãik'aapa mãgaji:
—Na eujã teeit'eeda aji, pùdeepa uchiadait'eerãmaa.
Mãpai Abrampa altar ooji Tachi Ak'õre–it'ee, mama iru ome pedeeda perã. 8 Ma t'êepai mamãik'aapa wãjida ee paraamaa, Betel p'uuru k'ait'a; oriente eere. Mama Abrampa ichi te ne–animal edee ooda baik'o bùji p'uuru omé esajîak'a. Betel p'uuru occidente eere baji. Jõdee Hai p'uuru oriente eere baji. Mama bùde Abrampa altar awaraa ooji mãik'aapa Tachi Ak'õremaa ùt'aa t'âji. 9 T'êepai piak'ãa wãjida Néguev eujãdee.
Abram Egiptode
10 Maapai ma eujãde audú jarrajara paraaji. Maperã mak'ùara chik'o wê–e paji k'odait'ee. Mapa Abram banaji Egipto eujãde.
11 Egipto k'ait'a pawãdak'ãri, Abrampa Saraymaa mãgaji:
—Ûríji. Pù k'îra wãree bairã, Egipto pidaarãpa unudak'ãri, 12 pù mù wêrada adayada aji. Mãpai mù peet'aadai pù k'ap'ùa. Mamîda pù chok'ai atabùdai ãchi pù ome p'aneedait'ee. 13 Mapa jaráji: “Mù Abram âpewêra”, mù peenaadamerã. Mãga jararu pùrã, pù k'aurepa mù pia ak'ùdayada aji.
14 Egiptode panadak'ãri, Egipto pidaarãpa Saray k'îra wãree unujida. 15 Ãchi rey Faraóna apatap'edaa ak'ùpataarãpa Saray auk'a unujida. Mapa Faraonmaa jaranajida mãik'aapa ateejida iru temaa. 16 Saray k'aurepa Faraonpa Abram pia ak'ùji. Abrammaa teeji ovejaarã, p'ak'aarã, burroorã, camelloorã, esclavoorã paara. 17 Mamîda ichiaba Saray k'aurepa, Tachi Ak'õrepa k'ayaa k'achia pëiji Faraonmaa mãik'aapa iru te pidaarãmaa.
18 Maperã Faraonpa Abram t'â pëip'eda, mãgaji:
—¿Sãap'eda jãga oojima? aji. ¿Sãap'eda nãga jara–e paji: “Na mù wêra”? 19 Ma k'ãyaara pùchi âpewêrada aji. Mapa mù wêrak'a atak'aji. Nama bùda aji, pùchi wêra. Wãdapáde aji.
20 Mãpai Faraonpa ichi soldaorãmaa jaraji Egipto eujãdeepa Abram chi wêra ome uchia pëidamerã ãchi net'aa ome.