Tachi Ak'õrepa eperãarã pedee awara–awaraa bùk'ooda
11
1 Eperãarã na p'ek'au eujã jõmaade wãdai naaweda, na p'ek'au eujãde p'anapatap'edaarã at'ãri pedee apai pedeepachida. 2 Oriente eereepa chewãdade Sinar eujã jewedaa unu chedak'ãri, mama p'aneejida.3 Mãga nùde eperãarã ãchi pitapai pedeeteejida:
—Ladrillo oodáma ajida, mãik'aapa t'ùpùtaude paadáma. Te oodait'eeda ajida.
Ma te oo k'inia p'anajida ladrillodee jùrrùk'a bù ome, mãudee oodai k'ãyaara cementok'a bù ome.
4 Maap'eda mãgajida:
—P'uuru oodáma ajida, mãik'aapa aùde torre oodáma Tachi Ak'õre eujãde panadait'ee. Mãgá jõmaarãpa tachi t'o p'anadayada ajida, mãik'aapa waa ãyaa wãda–e pait'ee.
5 Mamîda Tachi Ak'õre edaa cheji ma p'uuru mãik'aapa torre oomaa p'anù ak'ùde. Mãga unuk'ãri, 6 k'îsiaji: “Ãchi p'uuru apai p'anadairã mãik'aapa pedee apai pedee p'anadairã, na mimia oomaa p'anù. Nãgùta ãrapa oo atajidara, ¿k'ãare net'aata ooda–e payama? aji. 7 Wãdáma ãchi pedee awara–awaraa pedeepide. Mãgá chip'edaidak'ãri mimiadait'ee, ûrida–e pait'ee.”
8 Mãga ooji Tachi Ak'õrepa. Ãchi pedee awara–awaraa bùk'ooji mãgà mimia oonaadamerã mãik'aapa wãdamerã eujã bee chaa. 9 Ma mimia p'anadap'edaamãi pedee awara–awaraadaidap'edaa perã, t'âjarapata ‘torre Babel’.a
Noé warra Semdeepa uchiadap'edaarã
(1 Crónicas 1.24-27)
10 Nãgùùrã paji Semdeepa uchiadap'edaarã.
Tachi Ak'õrepa na p'ek'au eujã ûut'aada t'êepai, año omeede Sem warra Arfaxad t'oji. Ma warra t'ok'ãri, Sem cien años iru baji. 11 Maap'eda Sem quinientos años waa baji na p'ek'au eujãde. Mãga nùde awaraa warrarã, k'aurã ome t'ojida.
12 Arfaxad treinta y cinco años iru baji chi warra Selaj t'ok'ãri. 13 Maap'eda Arfaxad cuatrocientos tres años waa baji na p'ek'au eujãde. Mãga nùde awaraa warrarã, k'aurã ome t'ojida.
14 Selaj treinta años iru baji chi warra Éber t'ok'ãri. 15 Maap'eda Selaj cuatrocientos tres años waa baji na p'ek'au eujãde. Mãga nùde awaraa warrarã, k'aurã ome t'ojida.
16 Éber treinta y cuatro años iru baji chi warra Péleg t'ok'ãri. 17 Ma t'êepai Éber cuatrocientos treinta años waa baji na p'ek'au eujãde. Mãga nùde awaraa warrarã, k'aurã ome t'ojida.
18 Péleg treinta años iru baji chi warra Reú t'ok'ãri. 19 Maap'eda Péleg doscientos nueve años waa baji na p'ek'au eujãde. Mãga nùde awaraa warrarã, k'aurã ome t'ojida.
20 Reú treinta y dos años iru baji chi warra Serug t'ok'ãri. 21 Maap'eda Reú doscientos siete años waa baji na p'ek'au eujãde. Mãga nùde awaraa warrarã, k'aurã ome t'ojida.
22 Serug treinta años iru baji chi warra Najor t'ok'ãri. 23 Maap'eda Serug doscientos años waa baji na p'ek'au eujãde. Mãga nùde awaraa warrarã, k'aurã ome t'ojida.
24 Najor veintinueve años iru baji chi warra Téraj t'ok'ãri. 25 Maap'eda Najor ciento diecinueve años waa baji na p'ek'au eujãde. Mãga nùde awaraa warrarã, k'aurã ome t'ojida.
26 Téraj setenta años iru bak'ãri, chi warrarã Abram, Najor mãik'aapa Jarán t'ojida.
Terajdeepa uchiadap'edaarã
27 Terajdeepa uchiadap'edaarã nãgùùrã paji: Abram, Najor mãik'aapa Jarán.
Jarandeepa warra uchiaji. T'âjarapachida Lot. 28 Jarán chi ak'õre Téraj k'ãyaara naapùara jai–idaaji Ur p'uurude, Caldea eujãde. Ichi t'odamãi piuji. 29 Téraj warra Abram miak'ãiji Saray ome. Jõdee chi âpema Najor miak'ãiji Milca ome. Mãgà wêra Jarán k'au mãik'aapa Iscá âpewêra paji. 30 Saray warra t'ok'aa paji.
31 Téraj Caldea eujãdeepa uchiaji, Ur p'uurudeepa, wã k'inia bada perã Canaán eujãdee. Ateeji chi warra Abram, chi wêra Saray mãik'aapa chi ãichak'e Lot. Mamîda Canaán eujãde panada–e paji. Jarán p'uuru apatap'edaade panadak'ãri, p'aneejida. 32 Mama Téraj jai–idaaji doscientos cinco años iru bak'ãri.