Noedeepa uchiadap'edaarã
(1 Crónicas 1.5-23)
10
1 Na p'ek'au eujã ûuda t'êepai, nãgà eperãarã Noé warrarã Semdeepa, Camdeepa, Jafetdeepa uchiajida.2 Jafet warrarã paji Gómer, Magog, Maday, Javán, Tubal, Mésec mãik'aapa Tirás.
3 Gómer warrarã paji Asquenaz, Rifat mãik'aapa Togarma.
4 Javandeepa uchiajida Elisá, Tarsis, Quitín mãik'aapa Rodanín.
5 Mãùrã paji Jafetdeepa uchiadap'edaarã. Mãùrã audú p'anapachida p'usa ide. Ëreerã chaa eujã iru p'anajida mãik'aapa pedee awara–awaraa pedeepachida.
6 Camdeepa uchiajida Cus, Misrayin, Fut mãik'aapa Canaán.
7 Cusdeepa uchiajida Seba, Javilá, Sabtá, Ragama mãik'aapa Sabteca. Ragamadeepa uchiajida Sabá mãik'aapa Dedán.
8 Cusdeepa uchiaji Nimrod, naarapema eperã na eujãde waibùara bada. 9 Tachi Ak'õrepa k'inia bada perã, Nimrod nejùrùyaa bapiji.
Madeepa jarapata: “Pù Nimrodk'a nejùrùyaa bapari Tachi Ak'õrepa k'inia badak'a.”
10 Nimrod rey beek'ãri, ichi jua ek'ari iru baji nãgà Sinar eujã jewedaadepema p'uuru: Babel, Érec, Acad mãik'aapa Calné. 11 Ma eujãdeepa wãji Asur eujãdee. Mama bùde irua nãgà p'uuru ooji: Nínive, Rejobot Ir, Cala, 12 p'uuru waibùa Resén; Nínive, Cala esajîak'a bada.
13 Misrayindeepa uchiajida ludeorã, anameorã, leabitaarã, naftuitaarã, 14 patruseorã, caslujitaarã mãik'aapa caftoritaarã. T'êepai ma caftoritaarãdeepa uchiajida filisteorã.
15 Canaandeepa uchiaji Sidón, chi warra naapema. Ma t'êepai uchiaji Het. Hetdeepa uchiajida hititaarã. 16 Canaandeepa uchiajida jebuseorã, amorreorã, gergeseorã, 17 heveorã, araceorã, sineorã, 18 arvadeorã, zemareorã mãik'aapa jamatitaarã. T'êepai ma cananeorã awara–awaraa p'anapachida. 19 Ma cananeorã p'anapachida Guerar eujãdeepa Sidón p'uurudeepa Gaza p'uuru parumaa mãik'aapa Sodoma, Gomorra, Admá, Zeboyín p'uuru parumaa mãik'aapa Lasa p'uuru parumaa.
20 Ma jõmaweda Camdeepa uchiadap'edaarã paji. Eujã awara–awaraade p'anapachida mãik'aapa pedee awara–awaraa pedeepachida.
21 Noé warra Sem, Jafet naapema paji. Irua ichiaba warrarã ooji. Irudeepa uchiajida Éber ichideerã ome.
22 Semdeepa uchiajida Elam, Asur, Arfaxad, Lud mãik'aapa Aram.
23 Chi warra Aramdeepa uchiajida Uz, Hul, Guéter mãik'aapa Mas.
24 Chi warra Arfaxaddeepa uchiaji Selaj. Selaj Éber ak'õre paji.
25 Ma Eberdeepa warrarã omé uchiajida. Aba t'âjarapachida Péleg, jara k'inia bù “t'ooda”, iru bapariik'ãri, na p'ek'au eujãdepemaarã t'oodap'edaa perã. Péleg âpema t'âjarapachida Joctán.
26 Joctandeepa uchiajida Almodad, Sélef, Jazar Mávet, Yeraj, 27 Hadorán, Uzal, Diclá, 28 Obal, Abimael, Sabá, 29 Ofir, Javilá mãik'aapa Jobab. Mãùrã paji Joctandeepa uchiadap'edaa. 30 Mãùrã p'anapachida Mesá eujãdeepa Sefar eujãde parumaa; ma ee jêra bùmãi oriente eere.
31 Ma jõmaweda Semdeepa uchiadap'edaarã paji. Eujã awara–awaraade p'anapachida mãik'aapa pedee awara–awaraa pedeepachida.
32 Mãùrã Noedeepa uchiadap'edaarã paji na p'ek'au eujã ûuda t'êepai. Na p'ek'au eujã jõmaade wãjida p'anapataade, p'uuru awara–awaraa.