Na p'ek'au eujã ûu–ûu bap'eda, p'ooda
8
1 Mãpai Tachi Ak'õrepa chupùria k'awaaji Noé ichideerã ome mãik'aapa ne–animalaarã barcode p'anadap'edaa. Nãu eujã ârù p'uapiji pania p'oomerã. Mãgá p'oo wãji. 2 Ewaraa k'obù edaik'a eerepema pania mãik'aapa aù ùt'aik'a eerepema pania waa uchia–e paji. Ma awara Tachi Ak'õrepa waa k'oi chepi–e paji. 3 Piak'ãa p'oo wãpa, p'oo wãji. K'ãima ciento cincuenta wãyaak'ãri, p'oodachi. 4 Atane sietede ewari diecisiete ma barco p'oo beeji Ararat ee ùt'ùa bù ârù. 5 P'oo wãpa, p'oo wãpa atane diez parumaa ee nok'o unujida.6 K'ãima cuarenta parumaa Noepa chi ventana ewat'aaji. 7 Mãpai pëiji cuervo aba. Mãgà pariatua wãabaiji, eujã p'ooru misa. 8 Ma t'êepai Noepa pëiji paloma k'awaait'ee eujã p'oo bù maa–e pùrã p'oo–e bù. 9 Mamîda mãgà barcodee cheji, eujã unu–e pada perã sãma su–ak'ù beeit'ee. Mapa Noepa juade batau atap'eda, barcode t'îupiji. 10 Mapa Noepa k'ãima siete nùji mãik'aapa waya paloma pëiji. 11 Mata p'ãriupodopa ichi k'idade olivo pak'uru k'iru aneeji. Mãgá Noepa k'awaji eujã p'oo wã. 12 Awaraa k'ãima siete pak'ãri, ma paloma waya pëiji. Mamîda waa che–e paji.
13 Noé seiscientos un años iru bak'ãri, eujã p'oodachi. Naapema atanede naarapema ewaride Noepa ma barco techo ewat'aaji mãik'aapa eujã p'oo bù unuji. 14 Atane omeede ewari veintisietede eujã pia p'oo beeji.
15 Mãpai Tachi Ak'õrepa Noemaa mãgaji:
16 —Uchiapáde aji, barcodeepa pù wêra, pù warrarã pù ãiguurã ome. 17 Ichiaba uchiapíji jõmaweda ne–animalaarã parã ome barcode p'anadap'edaa; ipanaarã, ne–animalaarã taunomaa, tausaaree mãik'aapa eujãde bipa urt'îu nîuteepata paara. Ichiak'au bùpáde aji, mãgùùrã wãdamerã na p'ek'au eujã jõmaade mãik'aapa warrarã chok'ara oodamerã.
18 Mãpai Noé, chi wêra, chi warrarã chi ãiguurã ome ma barcodeepa uchiajida. 19 Ichiaba ne–animalaarã taunomaa, tausaaree, eujãde bipa urt'îu nîuteepata mãik'aapa ipanaarã auk'a uchiajida.
20 Aù t'êepai Noepa altar mãudee ooji Tachi Ak'õre–it'ee. Mãpai ataji ne–animalaarã mãik'aapa ipanaarã Tachi Ak'õre–it'ee paapatadepema; mãgee k'îra chaadepema aba. Mãpai ma ne–animalaarã peep'eda, paa jõji ma altar ârù Tachi Ak'õre–it'ee. 21 Tachi Ak'õrepa ma nari âk'ãri, t'ãri o–îa beeji mãik'aapa ichi t'ãridepai k'îsiaji: “Waa eujã ûupi–e pait'ee. Eperãarã k'ûtrãaweda ne–inaa k'achia ooi awaa p'anù mîda, waa mãgá jõpi–e pait'ee. Auk'a ne–animalaarã waa mãgá jõpi–e pait'ee. 22 Na p'ek'au eujã bù misa, ne–uudait'ee mãik'aapa ewadait'ee; jîsua oodait'ee mãik'aapa jùa chedait'ee; paraait'ee k'oijara mãik'aapa p'oojara; ãstaawa, p'ãrik'ua paara.”