Tachi Ak'õrepa na p'ek'au eujã ûut'aada
7
1 Maap'eda, Tachi Ak'õrepa Noemaa mãgaji:—Pù aupaita bapari mùa k'inia bùk'a. Mapa pùchideerã ome t'îupáde aji. 2 Ne–animalaarã mù–it'ee paapata chi ùmùk'îra siete, chi wêra siete atéeji. Chi apema ne–animalaarã chi ùmùk'îra aba, chi wêra aba ateeipia bù. 3 Mamîda ipanaarã k'îra t'ãdoo chi ùmùk'îra siete, chi wêra siete atéeji, k'îra apida jõnaamerã. 4 K'ãima siete parumaa mùa k'oi chepiit'ee k'ãima cuarenta wãyaaru misa. Ne–inaa chok'ai bee mùa ooda jõmaweda jõt'aait'eeda aji.
5 Noepa jõmaweda ooji Tachi Ak'õrepa jaradak'a.
6 Noé seiscientos años iru bak'ãri, Tachi Ak'õrepa na p'ek'au eujã ûupiji. 7 K'oi che nâbeek'ãri, barcode t'îuk'oodachida Noé, chi wêra mãik'aapa chi warrarã, ãchi wêraarã ome. 8 Ne–animalaarã jîp'aarã ne–animalaarã Tachi Ak'õre–it'ee paapata ome auk'a t'îujida; eujãde bipa urt'îu nîuteepataarã, ipanaarã paara. 9 Tachi Ak'õrepa jaradak'a ne–animalaarã omee–omee, chi ùmùk'îra, chi wêra ome t'îujida ma barcode Noé ome.
10 K'ãima siete parumaa na p'ek'au eujã ûu–ûu beeji. 11 Atane omeede ewari diecisiete paji. Noé seiscientos años iru baji na p'ek'au eujã ûu–ûu beek'ãri. Ma ewate pania uchiaji na p'ek'au eujã ârù. Ûk'uru uchiaji Tachi Ak'õrepa ma ewaraa k'obùda edaik'a eerepema mãik'aapa ûk'uru uchiaji aù ùt'aik'a eerepema. 12 K'ãima cuarenta k'oi che nâbaji na p'ek'au eujãde. 13 Ma ewate k'oi che nâbeek'ãri, Noé t'îuji ma barcode chi warrarã Sem, Cam Jafet ome mãik'aapa chi wêra, chi ãiguurã õpee ome. 14 Ãra ome t'îujida ne–animalaarã k'îra t'ãdoo; tausaaree, taunomaa, eujãde bipa urt'îu nîuteepata, ipanaarã paara. 15 Ma ne–animalaarã jõmaweda omee–omee t'îujida Noé ome. 16 Tachi Ak'õrepa Noemaa jaradak'a t'îujida k'îra chaadepema omee–omee; chi ùmùk'îra chi wêra ome. Mãpai Tachi Ak'õrepa chi puerta jâa nâbùji.
17 Na p'ek'au eujãde k'ãima cuarenta k'oi che nâbaji. Pania ûu chewãk'ãri, ma barco bai ûu beeji. 18 Waapùara ûu chewãji. Mamîda ma barco k'ãiwee bai ûu beeji. 19 Pania ûu chewãta, ûu chewãta, ee ùt'ùara beeda k'ãyaara ùt'ùpùara ûu–ûu beeji. 20 Eujãdeepa ùt'aa siete metros ûudachi. Mãpai waa ûu–e paji. 21 Mãgá piujida jõmaweda eperãarã ipanaarã ome, ne–animalaarã tausaaree, taunomaa bee paara, chi eujãde bipa urt'îu nîuteepata paara. 22 Jõmaweda na p'ek'au eujãdepema chok'ai p'anapatap'edaa piujida. 23 Aba Noé chi barcode p'anadap'edaarã ome chok'ai p'aneejida. Apemaarã jõmaweda jõjida; eperãarã, ipanaarã, ne–animalaarã k'îra t'ãdoo. 24 K'ãima ciento cincuenta na p'ek'au eujã ûu–ûu beeji.