Eperãarã k'achia p'aneedap'edaa
6
1 Maapai na p'ek'au eujãde eperãarã cho–k'ara îwajida. 2 Angeleerãpa eperãarã k'aurã k'îra wãree unudak'ãri, miak'ãijida ãchia k'inia p'anadap'edaarã ome.3 Mãga unuk'ãri, Tachi Ak'õrepa mãgaji:
—Eperãarã ichita chok'ai p'anapi–e pait'ee, na p'ek'au eujãdepema perã. Ciento veinte añopai choodait'eeda aji.
4 Mãgá angeleerã araa padak'ãri eperãarã k'aurã ome, ãchi warrarã ûk'uru gigante uchiajida. Mamîda t'êepai ichiaba gigante paraaji. Chonaarãwedapemaarãpa mãgùùrã t'o p'anapachida, ne–inaa k'îra t'ãdoo oopatap'edaa perã.
5 Maapai Tachi Ak'õrepa eperãarã pia ak'ù–e paji, audú ne–inaa k'achia ooi awaa p'anapatap'edaa perã mãik'aapa k'îsia k'achia aupai k'îsiapatap'edaa perã.
6 Mapa t'ãri p'ua bap'eda, Tachi Ak'õrepa mãgaji:
7 —Páripù na eperãarã oojik'ate aji. Eperãarã mùchia ooda jõt'aait'ee. Ichiaba ne–animalaarã taunomaa, tausaaree beerã jõpiit'eeda aji, chi eujãde bipa urt'îu nîuteepata mãik'aapa ipanaarã paara.
8 Mamîda Noepa Tachi Ak'õrede ijãa bapachi. Mapa Tachi Ak'õrepa iru pia ak'ùpachi.
Noepa barco waibùa ooda
9 Noé nãga bapachi. Noé t'ãri pia bapachi. Oopachi Tachi Ak'õrepa oopi bùk'a. Apemaarã iru ik'aawa p'anapatap'edaarãpa audú ne–inaa k'achia oopachida mîda, irua mãga ook'aa paji. Tachi Ak'õrepa k'inia bùk'a oopachi. 10 Noepa warrarã õpee iru baji. T'âjarapachida Sem, Cam mãik'aapa Jafet.
11 Tachi Ak'õre–it'ee na p'ek'au eujãde audú k'achia paraaji. Eperãarã chîara ome chõopachida mãik'aapa peepachida. 12 Eperãarãpa ne–inaa k'achia k'îra t'ãdoo oo wãpachida, k'îra nejasiada–ee.
13 Mãga unuk'ãri, Tachi Ak'õrepa Noemaa mãgaji:
—K'îsia iru bùda aji, eperãarã jõt'aait'ee, na p'ek'au eujãde ne–inaa audú k'achia oomaa p'anadairã. Maperãpù na p'ek'au eujã jõmaweda jõt'aait'eeda aji. 14 Pù, pùchideerã ome madeepa chok'ai uchiadamerã, barco waibùa oopáde aji. Ma barco nãga ooipia bù. Pak'uru k'ayoo k'arak'araa jùrùipia bù. Mãgee pak'urudee barco ooit'ee. Ma pak'uru jùrrùpa sooipia bù taawaik'a eere mãik'aapa edajãare. Ichiaba barco edajãde cuarto ooipia bù. 15 Nãga ooipia bù chi waibùa: ciento treinta y cinco metros chi teesoo; veintidós metros ap'eda waa metro esa–auk'a chi jobùa; trece metros ap'eda waa metro esa–auk'a chi ùt'ùa. 16 Piso õpee óoji. Chi te k'iru k'ait'a metro esa–auk'a aù ek'ari, ventana óoji mãik'aapa puerta aba bàji ma barco bi abaade. 17 Mùa eujã jõmaweda ûut'aait'ee paniapa. Eujãde chok'ai beerã jõmaweda jõt'aait'ee. 18 Mamîda pù ome mùa pacto ooit'ee. Pù, pùchideerã ome k'aripait'ee. Ma barcode pùa t'îupiit'ee pù wêra, pùchi warrarã mãik'aapa ãchi wêraarã. 19 Ichiaba ne–animal chaachaadepema pùa barcode ateeit'ee; chi ùmùk'îra, chi wêra ome. Mãgá ne–animalaarã pùk'a chok'ai uchiadait'ee. 20 Mãgá omee–omee t'îupíji ne–animalaarã k'îra t'ãdoo: tausaaree, taunomaa, eujãde bipa urt'îu nîuteepata mãik'aapa ipanaarã, mãgá chok'ai uchiadamerã. 21 Chik'o p'epáde aji, parãpa mãik'aapa ma ne–animalaarãpa k'odamerã barcode p'anaruta misa.
22 Noepa jõma ooji Tachi Ak'õrepa jaradak'a.