Adán, Eva ome warrarã oodap'edaa
4
1 Adán chi wêra ome p'aneedak'ãri, chi wêra biak'oo beeji mãik'aapa ùmùk'îra warra t'oji. T'â bùjida Caín.Ma warra t'ok'ãri, Evapa mãgaji:
—Ùmùk'îra warra iru bùda aji, Tachi Ak'õrepa teeda.
2 Maap'eda awaraa warra t'oji. T'â bùjida Abel. Abelpa ovejaarã waripachi. Jõdee Caín ne–uupachi.
3 Ma t'êepai, ewari aba Cainpa Tachi Ak'õremaa primicia teeji ichi ne–uu badadepema. 4 Ichiaba Abelpa primicia teeji. Ichi ovejaarã warrarã naapùara t'odadepema peep'eda, chi traa teeji Tachi Ak'õremaa. Tachi Ak'õrepa pia ak'ùji Abel irua teeda ome. 5 Mamîda pia ak'ù–e paji Caín irua teeda ome. Maperã Caín k'îraudachi mãik'aapa k'îra pia–ee beeji.
6 Mãpai Tachi Ak'õrepa mãgaji:
—¿Sãap'eda pù jãgá k'îrau bùma? aji. 7 Pù t'ãride k'îsia pia iru bada paara, k'îra pia bak'aji. Mamîda mãga oo–e bairã, pù k'achiade baaita bùda aji. Mamîda pùa p'oyaayada aji, waa mãga ba–e pait'ee.
8 Maap'eda, ewari aba Cainpa mãgaji Abelmaa:
—Mêe wãdáma aji.
Mamîda mêe panadak'ãri, Cainpa chi âpema pee atapëiji.
9 Mãpai Tachi Ak'õrepa Cainmaa iidiji:
—¿Sãma bùma aji, pù âpema Abel?
Cainpa p'anauji:
—K'awa–e bùda aji. ¿Mù, mù âpema ak'ùparik'ã? aji.
10 Mãpai Tachi Ak'õrepa mãgaji:
—¿Sãap'eda mãga oojima? aji. Pù âpema waapa eujãdeepa mùmaa bia pùk'a nâbù, mùa pù miapimerã ma k'achia ooda k'aurepa. 11 Pù âpema mãgá peeda perã, mùa pù k'achia ooit'ee. Pù jëret'aait'ee na eujãdeepa, pùa k'achia oodamãiipa. 12 Mãgá pù âpema waa eujãde beeda k'aurepa, audú mimiaru pùjida, ne–inaa uuk'ãri, pia chau–e pait'ee naawedapemak'a. Na p'ek'au eujãde âi–ee nipapariit'eeda aji.
13 Mãpai Cainpa p'anauji:
—Mùa p'oyaa choo–eda aji, pùa jarada. 14 Idi mù na eujãdeepa jëre bù. Pùa jaradak'a âi–ee nipapariit'eeda aji. Pùa mù waa ak'ù–eda aji. Mù unurutamãi eperãarãpa mù peet'aadayada aji.
15 Mãpai Tachi Ak'õrepa mãgaji:
—Mãga–epù. Apidaapa pù peeruta pùrã, mùa mãgà eperã miapida siete miapiit'eeda aji.
Mãpai Tachi Ak'õrepa Caín tauchaa paraa bùji iru unurutaarãpa peenaadamerã. 16 Caín wãji Tachi Ak'õre ome pedee badamãiipa mãik'aapa banaji Nod eujãde; Edendeepa oriente eere.
Caindeepa uchiadap'edaarã
17 Cainpa wêra atak'ãri, chi wêra biak'oo beeji mãik'aapa ùmùk'îra warra t'oji. T'â bùjida Enoc. Maap'eda Cainpa p'uuru ooji mãik'aapa ma p'uuru ichiaba t'â bùji Enoc. 18 Enocdeepa uchiaji Irad. Iraddeepa uchiaji Mejuyael. Mejuyaeldeepa uchiaji Metusael. Metusaeldeepa uchiaji Lamec. 19 Lamecpa wêraarã omé ataji. Aba t'âjarapachida Ada; chi apema Zila. 20 Adapa ùmùk'îra warra t'oji. T'â bùjida Jabal. Irudeepa uchiajida te ne–animal edee oodade p'anapataarã mãik'aapa p'ak'a waripataarã. 21 Jabalpa âpema iru baji; t'âjarapachida Jubal. Mãgùdeepa uchiajida arpa mãik'aapa p'ip'ana chaapataarã. 22 Zilapa ichiaba ùmùk'îra warra t'oji. T'â bùjida Tubal Caín. Mãgùpa ne–inaa hierrodee, broncedee oopachi. Tubal Cainpa âpewêra iru baji. T'âjarapachida Noamá.
23 Ewari aba Caindeepa uchiada Lamecpa chi wêraarãmaa nãgà audua pedee jaraji:
—Pia ûrítù mùa jararu. Mùa eperã peeji irua mù suda perã; k'ûtrãa peeji irua mù p'ua ooda perã. 24 Apidaapa Caín peeda paara, Tachi Ak'õrepa mãgà eperã miapida siete miapik'ajida aji. Mamîda ma k'ûtrãa peeda k'aurepa apidaapa mù peeruta pùrã, Tachi Ak'õrepa mãgà eperã setenta y siete miapida miapiipia bù.
Adán warra Set t'oda
25 Cainpa Abel peeda t'êepai, Evapa waya warra t'oji. T'â bùjida Set.
Evapa warra t'ok'ãri, mãgaji:
—Tachi Ak'õrepa warra awaraa teejida aji, Abel k'ap'ùa, Cainpa peet'aada pari.
26 Taarã pak'ãri, Setpa wêra ataji mãik'aapa warra ooji. T'â bùjida Enós. Set bapariik'ãri, eperãarãpa Tachi Ak'õre Waibùamaa ùt'aa t'âmaa p'aneejida.