Adanpa Eva ome Tachi Ak'õrepa jaradak'a ooda–e pada
3
1 Edén ne–uu k'ãide taama bapachi. Mãgà ik'awaara baji apemaarã ne–animalaarã tausaaree beerã Tachi Ak'õre Waibùapa ooda k'ãyaara.Mapa ewari aba taamapa ma wêramaa iidiji:
—¿Mãgara Tachi Ak'õrepa jõpiamaa bùk'ã aji, nejõ pak'uru jõmaadepema?
2 Ma wêrapa p'anauji:
—Taipa jõdaipia bù pak'uru jõmaadepema. 3 Mamîda jõdaik'araa bùda aji, pak'uru na ne–uu k'ãi esajîak'a bainâ bùdepema. Jãdepema jõruta pùrã wa t'õbairuta pùrã, Tachi Ak'õrepa: “Piudayada” aji.
4 Mãpai taamapa ma wêramaa mãgaji:
—¡Piuda–epù! 5 Tachi Ak'õrepa pia k'awa bùda aji, parãpa jã pak'urudepema jõruta pùrã, k'îsia k'awaa p'aneedait'ee mãik'aapa k'awadait'ee ne–inaa pia mãik'aapa ne–inaa k'achia. Mãgá Tachi Ak'õrek'a p'aneedait'eeda aji.
6 Ma wêrapa ma nejõ pia bù unuk'ãri, jõ k'iniadachi. K'îsiaji: “Jã jõp'eda, poro wêsaa beeit'eeda aji, Tachi Ak'õrek'a.” Mapa oro atanap'eda, jõt'aaji mãik'aapa chi ùmùk'îramaa teeji. Mãpai chi ùmùk'îrapa auk'a jõt'aaji. 7 Aramata k'îsia k'awaa p'aneejida mãik'aapa k'awajida ãchi ãk'adaa p'anù. Mãgá k'îra nejasia k'awaadak'ãri, p'aru higuera k'irudee oojida mãik'aapa jâ p'aneejida.
8 K'ewara nãu p'uak'ãri, Tachi Ak'õre Waibùa nipapachi Edén ne–uu k'ãide. Ma ewate Adanpa chi wêra ome Tachi Ak'õre cheru ûridak'ãri, pak'uru ãpùte mirudachida.
9 Mamîda Tachi Ak'õre Waibùapa Adán t'âji mãik'aapa iidiji:
—¿Sãma bùma? aji.
10 Irua p'anauji:
—Mùa pù nama ni ûrik'ãri, waaweedachida aji, ãk'adaa bada perã. Maperã mù mirudachida aji.
11 Mãpai Tachi Ak'õrepa iidiji:
—¿K'aipa jarajima aji, pù ãk'adaa bù? ¿Pùa jõjik'ã aji, nejõ mùa jõpiamaa badadepema?
12 Irua p'anauji:
—Pùa mùmaa wêra k'õp'ãyok'a teedapa ma nejõ mùmaa teejida aji. Mãpai mùa jõt'aajida aji.
13 Mãpai Tachi Ak'õre Waibùapa ma wêramaa iidiji:
—¿Sãap'eda mãga oojima? aji.
Wêrapa p'anauji:
—Taamapa mù k'ûrat'aajida aji. Maperã mùa ma nejõ jõjida aji.
14 Mãpai Tachi Ak'õre Waibùapa ma taamamaa mãgaji:
—Mãga ooda perã, mùa pù k'achiade baaipiit'ee. Pù maldicia baibairã, mùa pùmaa k'achiara ooit'ee apemaarã ne–animalaarã k'ãyaara. Idideepa pù eujãde bipa urt'îu nipapariit'ee yooro p'orade. 15 Na eperã wêradeepa uchiadait'eerãpa pùdeepa uchiadait'eerã k'îra unuamaa iru p'anadait'ee; përeerã paara auk'a. Mapa chik'îra unuamaa p'anapataadait'ee. Na eperã wêradeepa uchiait'ee abaapa pù poromãi teeit'ee. Jõdee pùa iru bùùrùde k'aat'aait'eeda aji.
16 Mãpai Tachi Ak'õrepa ma wêramaa mãgaji:
—Pù warra t'ok'ãri, p'ua ome t'oit'eeda aji. Ma awara pù ùmùk'îrapa pù chok'ait'ee, pùa iru k'inia bairã. Pù iru jua ek'ari bapariit'eeda aji.
17 Mãpai ùmùk'îramaa mãgaji:
—Pùa wêra pedee ijãaji mãik'aapa jõji ma nejõ mùa jõnaadapáde ada. Maperã pù k'aurepa eujã k'achiade baaiit'eeda aji. Pùchi chik'o k'oit'ee audú mimiait'ee piurumaa. 18 Eujãdeepa ne–ùùrù uchiait'ee mãik'aapa pùa net'a tau mêepema k'oit'ee. 19 Jùara nâbait'ee audú mimia nâbùpa. Miait'ee chik'o k'oit'ee. Pù yooro p'oradee ooda perã, piuk'ãri, waya yooro p'ora pait'eeda aji.
20 Adanpa chi wêra t'â bùji Eva,a nawe pait'ee pada perã. Eperãarã jõmaarã nawe adait'ee, jõmaweda irudeepa uchiadait'ee perã.
21 Tachi Ak'õre Waibùapa ne–animal edee p'aru ooteeji jâ p'aneedamerã. 22 Mãpai ichi t'ãridepai mãgaji: “Ârá eperãarã tachik'a p'anùda aji. K'awa p'anù ne–inaa pia mãik'aapa ne–inaa k'achia. Ârá waa jõdaik'araa bùda aji, nejõ bùùrù eperãarã ichita chok'aipiparidepema.”
23 Maperã Tachi Ak'õre Waibùapa ãchi uchiapiji Edén ne–uu k'ãideepa ne–uunadamerã. Mãgá ma eperã yoorodee ooda yoorode ne–inaa jaupachi.
24 Maap'eda Tachi Ak'õrepa ùt'aripemaarã pëiji jâadamerã Edén ne–uu k'ãi oriente eere. Ichiaba mama bùji espada t'ùpùtaudee ooda urua p'ùrrabai nâbamerã Edén ik'aawa, apida t'îunaadamerã ma nejõ bùùrù eperãarã ichita chok'aipiparimaa.