2
1 Mãgá Tachi Ak'õrepa ooji pajãde nâbù mãik'aapa na eujãde nâbù. 2 K'ãima sietede Tachi Ak'õrepa ichi mimia oo aupak'ãri, âiji.3 Ma ewate iru mimia jõma aupap'eda, âida perã, ma ewaridé jaraji:
—Pia bùda aji.
Ma ewari awara bùji tomia chaa eperãarã âidamerã ichi âidak'a. 4 Mãga paji Tachi Ak'õrepa na eujã, pajã ome ook'ãri.
Tachi Ak'õrepa naapema eperã ooda
5 Tachi Ak'õre Waibùapa pajã, eujã ome ook'ãri, ne–inaa k'arra, p'ûajara paara waide t'onoda–e p'anajida, Tachi Ak'õrepa k'oi waide chepi–e bada perã mãik'aapa eperãarã waide oo–e bada perã ma eujãde mimiadamerã. 6 Mãgá Tachi Ak'õrepa k'oi waide chepi–e baji mîda, ma eujã ek'ariipa pania uchiapachi. 7 Maapai Tachi Ak'õre Waibùapa eperã yooro p'oradee ooji. Yooro p'oradee oop'eda, ma eperã k'âde jãrap'uaji. Aramata chok'ai beeji. Tachi Ak'õrepa ma eperã t'â bùji Adán.a
8 Mãpai Tachi Ak'õrepa ma eperã bùji Edén ne–uu k'ãide; oriente eere. Mama Tachi Ak'õrepa ne–inaa k'arra k'îra t'ãdoo t'onopiji ma eperãpa k'omerã. 9 Ichiaba pak'uru pi–ia k'îra t'ãdoo t'onopiji nejõ chaumerã, mãgá madepema k'odamerã. Ma Edén ne–uu k'ãi esajîak'a pak'uru omé t'onopiji; aba nejõ bùùrùdepema jõdak'ãri, piuda–ee, chok'ai p'anapataadamerã; chi apema nejõ bùùrùdepema jõdak'ãri, k'îsia pia mãik'aapa k'îsia k'achia k'awadamerã.
10 Edén ne–uu k'ãi to k'âde baji. Ma todepema pania chi ne–uu k'ãide wee wãyaa baji. Ma to jua k'îmari nêra baji. 11 Chi naarapema to t'âjarapachida Pisón. Mãgà wãyaapachi Javilá eujã jõmaade, nêe paraamãi. 12 Mãpema nêe pi–ia bapari. Ichiaba ma eujãde unupata ne–inaa t'ûa bapari resina mãik'aapa mãu pi–ia ónice. 13 Aù eerepema to t'âjarapachida Guijón. Mãgà wãyaapachi Cus eujãde. 14 Aù eerepema to t'âjarapata Tigris. Mãgà wãyaapari Asiria eujã ik'aawa, oriente eere. Chi apema to t'âjarapata Éufrates.
15 Tachi Ak'õre Waibùapa ma eperã bùji Edén ne–uu k'ãide ne–inaa uumerã mãik'aapa ak'ù bamerã.
16 Mãpai Tachi Ak'õrepa Adanmaa mãgaji:
—Pùa nejõ jõ k'iniata jõpáde aji. 17 Mamîda jõnaapáde aji, jã pak'uru k'îsia pia mãik'aapa k'îsia k'achia k'awapiparidepema. Pùa jãta jõru pùrã, piuit'eeda aji.
18 Maap'eda Tachi Ak'õre Waibùapa jaraji:
—Pia–e bùda aji, ùmùk'îra ituaba bamerã. Iru–it'ee k'õp'ãyo ooteeit'eeda aji.
19 Tachi Ak'õre Waibùapa ne–animalaarã k'îra t'ãdoo mãik'aapa ipanaarã k'îra t'ãdoo yoorodee ooji. Maap'eda ichia ooda Adanmaa ateeji ma ne–animalaarã, ipanaarã jõmaweda t'â bùmerã. 20 Mãpai Adanpa t'â bùji ne–animalaarã taunomaa, tausaaree beerã mãik'aapa ipanaarã. Irua ma t'â chaa bùdak'a mãga beeji. Mãgá ne–animalaarã chok'ara paraaji mîda, ichi–it'ee k'õp'ãyo wê–e paji.
21 Mãpai Tachi Ak'õre Waibùapa Adán k'ãipiji. Mãùmisa orro aba êt'a ataji mãik'aapa waya chi chiara aù naawedapemak'a bùji. 22 Ma orrodee Tachi Ak'õrepa Adan–it'ee wêra ooteeji.
23 Adanpa unuk'ãri, mãgaji:
—Na mùk'a bùda aji, mù k'ap'ùak'a bairã mãik'aapa mù bùùrùdeepa ooda perã. T'âjaradait'eeda aji, wêra, wêra ùmùk'îradeepa ooda perã.
24 Mãgá Tachi Ak'õrepa wêra ùmùk'îradeepa ooda perã, ùmùk'îrapa atabëiit'ee chi ak'õre chi nawe ome, ichi wêra ome araa p'anadait'ee. Mãgá eperã omeeweda eperã apai pùk'a p'aneedait'ee.
25 Adán chi wêra ome ãk'adaa p'anapachida. Mamîda k'îra nejasia k'awadak'aa paji.