Génesis
Tachi Ak'õrepa na p'ek'au eujã ooda mãik'aapa naapùara eperãarã p'anapatap'edaa
Tachi Ak'õrepa na p'ek'au eujã mãik'aapa pajã ooda
1
1 Naapùara Tachi Ak'õrepa pajã mãik'aapa eujã ook'ãri, 2 jõma p'ãriu baji. Pania aupai ûu baji. Waa ne–inaa wê–e paji. Iru Jaure pania ârù nipapachi. Tachi Ak'õrepa na p'ek'au eujã mãik'aapa pajã nãgá ooji.3 Tachi Ak'õrepa jaraji:
—Âdaapáde aji.
Mãpai âdaaji.
4 Âdaak'ãri, Tachi Ak'õrepa mãgaji:
—Pia bùda aji.
Mãpai ma âdaa p'ãriudeepa awara bùji. 5 Ma âdaa t'â bùji ewari mãik'aapa p'ãriu t'â bùji p'ãrik'ua. Mãgá ooji ewari, p'ãriu ome, k'ãima abaade.
6 Mãpai Tachi Ak'õrepa jaraji:
—Pania ûk'uru ùt'aa wãpáde aji.
7 Mãga paji. Tachi Ak'õrepa ewaraa k'obùji pania ûk'uru aù edaik'a eere beemerã; ûk'uru aù ùt'aik'a eere beemerã. 8 Ma ewaraa k'obùmaa t'â bùji pajã. Ma jõma k'ãima omeede ooji.
9 Mãpai Tachi Ak'õrepa jaraji:
—Pania pajã ek'ari bù ãyaa beepáde aji, eujã uchiamerã.
Mãga paji. 10 Chi p'oo bùmaa t'â bùji eujã; paniamaa t'â bùji p'usa. Tachi Ak'õrepa ichia ooda pia unuji. 11 Mãpai irua jaraji eujãde ne–inaa k'arra k'îra t'ãdoo t'onomerã; p'ûajara k'îra t'ãdoo chi tau t'onomerã mãik'aapa pak'uru k'îra t'ãdoode nejõ chaumerã. Irua jaradak'a mãga paji. 12 Eujãde uchiaji ne–inaa k'arra k'îra t'ãdoo, p'ûajara chi tau t'onopari mãik'aapa pak'uru nejõ chaupari.
Ma jõma oop'eda, Tachi Ak'õrepa mãgaji:
—Pia bùda aji.
13 Ma jõma k'ãima õpeede ooji.
14 Mãpai Tachi Ak'õrepa jaraji:
—Pajãde paraapáde aji, ne–inaa âdaapari ma k'aurepa eperãarãpa k'awadamerã ãstaawa, p'ãrik'ua, año, atane mãik'aapa fiesta ewari. 15 Ma pajãde ne–inaa âdaapari k'aurepa na eujã âdaa bapari.
Mãga paji. 16 Tachi Ak'õrepa ne–inaa omé ooji pajãde bùit'ee. Chi waibùara bù ooji ãstaawa âdaamerã. Jõdee chi ma–ãriara bù ooji p'ãrik'ua âdaamerã. Ichiaba ooji lucero p'ãrik'ua âdaadamerã. 17 Tachi Ak'õrepa ma ne–inaa âdaapari bùji pajãde eujã ârù âdaamerã 18 mãik'aapa ãstaawa, p'ãriu ome awara beemerã. Mapa ãstaawa ak'õrejîru jêrapari mãik'aapa p'ãrik'ua atane âdaapari.
Mãga oo aupak'ãri, mãgaji:
—Pia bùda aji.
19 Ma jõma k'ãima k'îmariide ooji.
20 Mãpai Tachi Ak'õrepa jaraji:
—Toida paraapáde aji, chik'o k'îra t'ãdoo.
Ichiaba jaraji:
—Paraapáde aji, ipanaarã eujã ârù wãabaidamerã. Mãpai paraaji. 21 Tachi Ak'õrepa p'usadepema ne–inaa jõmaweda chok'ai bee ooji, nemîsia paara. Ichiaba ooji toidapema ne–inaa jõmaweda chok'ai bee mãik'aapa ne–inaa jõmaweda chok'ai bee eujã ârù wãabaipata.
22 Ichia ooda pia beek'ãri, Tachi Ak'õrepa na pedee pia jaraji ma toidapema ne–inaa chok'ai beerãmaa:
—Warrarã chok'ara oodapáde aji.
Auk'a jaraji ipanaarãmaa:
—Ipana chak'eerã chok'ara oodapáde aji.
23 Ma jõma k'ãima joisomaade ooji.
24 Mãpai Tachi Ak'õrepa jaraji:
—Eujãde paraapáde aji, ne–animalaarã k'îra t'ãdoo; taunomaa, tausaaree mãik'aapa eujãde bipa urt'îu nîuteepata paara.
26 Mãpai Tachi Ak'õrepa mãgaji:
—Ârá oodáma aji, eperã tachik'a bamerã. Eperãarãpa ãchi jua ek'ari iru p'anadait'ee nãgee ne–animalaarã k'îra t'ãdoo: chik'o; ipanaarã; ne–animalaarã taunomaa, tausaaree bee paara; ne–animalaarã eujãde bipa urt'îu nîuteepata.
27 Tachi Ak'õrepa eperã ichik'a ooji; ùmùk'îra, wêra ome. 28 Tachi Ak'õrepa ma eperãarã pia ak'ùji. Mapa na pedee pia jaraji:
—Warrarã chok'ara oodapáde aji, mãik'aapa parã jua ek'ari iru p'anadapáde aji, na eujã, chik'o, ipanaarã mãik'aapa ne–animalaarã, chi bipa urt'îu nîuteepata paara.
29 T'êepai mãgaji:
—Parã–it'ee oojida aji, ne–inaa k'arra k'îra t'ãdoo, chi tau t'onopari ome, mãik'aapa pak'uru chi nejõ chaupari ome. Ma jõmaadepema ne–inaa chauru parãpa k'odait'eeda aji. 30 Ma awara ne–animalaarã, chi tausaaree beerãpa, chi bipa urt'îu nîuteepataarãpa mãik'aapa ipanaarãpa paara k'odait'eeda aji, ne–inaa k'iru, p'ûajara k'îra t'ãdoo.
Mãga paji.
31 Tachi Ak'õrepa jõma ichia ooda ak'ùk'ãri, mãgaji:
—Pia bùda aji.
Ma jõma k'ãima seide ooji.