Al-naas al-yihibbu al-dunya
4
Al-duwaas wa l-huraaj ambeenaatku jaayiin min ween ?
Humman jaayiin min chahwaatku al-gaaʼidiin yijaahudu fi guluubku.
2 Tidooru chokhol waahid wa ma talgooh wa achaan da,
tugummu taktulu.
Tukhuttu eenku fi cheyy waahid wa ma talgooh wa tugummu tidaawusu wa tihaarubu.
Wa ma talgo al-cheyy al-tidooruuh da achaan intu ma saʼaltu Allah.
3 Wa kan tasʼalo kula,
ma talgo cheyy achaan niiyitku ma adiile.
Intu tasʼalo le chahwaatku bas.
4 Intu misil al-naas al-zannaayiin.
Khalleetu siidku Allah achaan tihibbu al-dunya.
Ma taʼarfu kadar al-naas al-yihibbu halaat al-dunya udwaan Allah ?
Wa l-naadum al-yihibb halaat al-dunya sawwa nafsah adu Allah.
5 Maktuub fi l-Kitaab <Allah yiraakhib be hamiisa al-ruuh al-khattaaha foogna>.
Ma tuguulu al-kalaam da baatil.
6 Wa l-niʼma al-Allah yantiiha kabiire.
Wa achaan da,
al-Kitaab buguul <Allah yaaba al-naas al-yistakbaro laakin hu yanti niʼma le l-naas al-yimaskunu nufuushum>.
7 Fi chaan da,
asmaʼo kalaam Allah wa agiifu didd Ibliis wa Ibliis yajri baʼiid minku.
8 Taʼaalu garrubu le Allah wa Allah yigarrib leeku.
Intu al-muznibiin,
naddufu iideenku min al-zanib.
Intu al-galibku itneen,
tahhuru nafisku.
9 Abgo haznaaniin fi chaan zunuubku wa asarkho wa abku baki chadiid.
Battaan ma tadhako,
akheer tabku.
Ma tafraho,
akheer tahzano.
10 Maskunu nufuusku giddaam Allah wa hu yarfaʼku.
Kalaam fasil
11 Ya akhwaani,
ma tuguulu kalaam fasil ambeenaatku.
Ayyi naadum al-yuguul kalaam fasil fi akhuuh walla yihaasibah,
hu da gaaʼid yuguul kalaam fasil fi wasaaya Allah wa yihaasibhum.
Wa inta al-tihaasib al-wasaaya ma gaaʼid titabbig al-wasaaya.
Laakin sawweet nafsak haakim.
12 Allah bas anta al-wasaaya wa hu bas al-haakim.
Hu wiheedah yinajji al-naas wa yahlikhum.
Inta al-tihaasib akhuuk da,
inta ke yaatu ?
Al-istikbaar
13 Wa asmaʼo kalaami,
intu al-tuguulu «
Al-yoom walla ambaakir,
aniina namchu fi hille waahide wa nagoodu hinaak sana waahide.
Wa nitaajuru wa nalgo gurus katiir ».
14 Intu ma taʼarfu chunu al-yukuun leeku ambaakir.
Hayaatku misil al-dukhkhaan al-yugumm wa ajala ke bas yichattit.
15 Akheer tuguulu «
Kan Rabbina gaal aamiin,
niʼiichu wa nisawwu cheyy misil ke walla misil ke ».
16 Wa laakin intu mustakbiriin wa kalaamku kalaam fachchaar bas.
Kulla l-istikbaar al-misil da hawaan.
17 Kan naadum yaʼarif al-kheer al-waajib yisawwiih wa ma sawwaah,
hu bigi muznib.